UNEHEMIYA 7

₁Ke kaloku kwathi, lwakwakhiwa udonga, ndazifaka iingcango; bamiswa abamasango, nabavumi, nabaLevi, ukuba bagcine umsebenzi wabo. ₂Ndamwisela umthetho uHanani umzalwana wam, noHananiya umphathi wenqaba, ngeYerusalem; ngokuba ebeyindoda enyanisekileyo, emoyikayo uThixo ngaphezu kwabaninzi. ₃Ndathi kubo, Amasango aseYerusalem makangavulwa, lide lifudumale ilanga; bathi, besemi belinda, bazivale iingcango, bazitshixe; nimise abagcini abangabemi baseYerusalem, elowo abe selugcinweni lwakhe, elowo abe phambi kwendlu yakhe. ₄Umzi ububanzi ngeenxa zombini, umkhulu; abantu bembalwa phakathi kwawo, kungakhiwanga zindlu.

₅UThixo wam wangenisa entliziyweni yam, ukuba ndibabuthe abanumzana, nabaphathi, nabantu, ukuba ndibabhalele emilibeni yokuzalwa. Ndafumana incwadi yemilibo yokuzalwa kwâbo babenyuke ekuqaleni; ndafumana kubhaliwe khona kwathiwa:

₆Ngabo aba oonyana belizwe lakwaYuda, abanyukáyo kwabathinjiweyo basemfudusweni, awayebafudusile uNebhukadenetsare ukumkani waseBhabheli, ábabuyela eYerusalem nakwaYuda, elowo wabuyela emzini wakowabo, ₇abeza noZerubhabheli, noYeshuwa, noNehemiya, noAzariya, noRahamiya, noNahamani, noMordekayi, noBhileshan, noMisperete, noBhigevayi, noNehum, noBhahana.

Inani lamadoda, abantu bakwaSirayeli, yayileli: ₈oonyana bakaParoshe ibingamawaka amabini, anekhulu elinamanci asixhenxe anababini. ₉Oonyana bakaShefatiya ibingamakhulu amathathu, anamanci asixhenxe anababini. ₁₀Oonyana baka-Ara ibingamakhulu amathandathu, anamanci mahlanu anababini. ₁₁Oonyana bakaPahati wakwaMowabhi, koonyana bakaYeshuwa noYowabhi, ibingamawaka amabini, anamakhulu asibhozo, anashumi linye linesibhozo. ₁₂Oonyana bakaElam ibiliwaka, elinamakhulu amabini, anamanci mahlanu anabané. ₁₃Oonyana bakaZatu ibingamakhulu asibhozo, anamanci mané anabahlanu. ₁₄Oonyana bakaZakayi ibingamakhulu asixhenxe, anamanci mathandathu. ₁₅Oonyana bakaBhinwi ibingamakhulu amathandathu, anamanci mané anesibhozo. ₁₆Oonyana bakaBhebhayi ibingamakhulu amathandathu, anamanci mabini anesibhozo. ₁₇Oonyana baka-Azegadi ibingamawaka amabini, anamakhulu mathathu, anamanci mabini anababini. ₁₈Oonyana baka-Adonikam ibingamakhulu amathandathu, anamanci mathandathu anesixhenxe. ₁₉Oonyana bakaBhigevayi ibingamawaka amabini, anamanci mathandathu anesixhenxe. ₂₀Oonyana baka-Adin ibingamakhulu amathandathu, anamanci mahlanu anabahlanu. ₂₁Oonyana baka-Atere kaHezekiya ibingamashumi asithoba anesibhozo. ₂₂Oonyana bakaHashum ibingamakhulu amathathu, anamanci mabini anesibhozo. ₂₃Oonyana bakaBhetsayi ibingamakhulu amathathu, anamanci mabini anabané. ₂₄Oonyana bakaHarifi ibilikhulu, elinashumi linye linababini. ₂₅Oonyana baseGibheyon ibingamashumi asithoba anabahlanu. ₂₆Amadoda aseBhetelehem naseNetofa ibilikhulu, elinamanci asibhozo anesibhozo. ₂₇Amadoda aseAnatoti ibilikhulu, elinamanci mabini anesibhozo. ₂₈Amadoda aseBhete-azemavete ibingamashumi amané anamabini. ₂₉Amadoda aseKiriyati-yeharim, neKefira, neBheroti ibingamakhulu asixhenxe, anamanci mané anamathathu. ₃₀Amadoda aseRama neGabha ibingamakhulu amathandathu, anamanci mabini ananye. ₃₁Amadoda aseMikimas ibilikhulu, elinamanci mabini anamabini. ₃₂Amadoda aseBheteli neAyi ibilikhulu, elinamanci mabini anamathathu. ₃₃Amadoda enye iNebho ibingamashumi amahlanu anamabini. ₃₄Oonyana bomnye uElam ibiliwaka elinamakhulu amabini, anamanci mahlanu anabané. ₃₅Oonyana bakaHarim ibingamakhulu amathathu, anamanci mabini. ₃₆Oonyana baseYeriko ibingamakhulu amathathu, anamanci mané anabahlanu. ₃₇Oonyana baseLodi neHadidi neOno ibingamakhulu asixhenxe, anamanci mabini anamnye. ₃₈Oonyana baseSenaha ibingamawaka amathathu, anamakhulu asithoba, anamanci mathathu.

₃₉Ababingeleli: oonyana bakaYedaya, bendlu kaYeshuwa, ibingamakhulu asithoba, anamanci asixhenxe anabathathu. ₄₀Oonyana bakaImere ibiliwaka, elinamanci mahlanu anababini. ₄₁Oonyana bakaPashure ibiliwaka, elinamakhulu amabini, anamanci mané anesixhenxe. ₄₂Oonyana bakaHarim ibiliwaka elinashumi linye linesixhenxe.

₄₃AbaLevi: oonyana bakaYeshuwa noKademiyeli, koonyana bakaHodeva, ibingamashumi asixhenxe anabané.

₄₄Iimvumi: oonyana baka-Asafu ibilikhulu, elinamanci mané anesibhozo.

₄₅Abamasango: oonyana bakaShalum, oonyana baka-Atere, oonyana bakaTalemon, oonyana baka-Akubhi, oonyana bakaHatita, oonyana bakaShobhayi, ibilikhulu, elinamanci mathathu anesibhozo.

₄₆Abakhonzi betempile: oonyana bakaTsiha, oonyana bakaHasufa, oonyana bakaTabhahoti, ₄₇oonyana bakaKerosi, oonyana bakaSiha, oonyana bakaPadon, ₄₈oonyana bakaLebhana, oonyana bakaHagabha, oonyana bakaSalemayi, ₄₉oonyana bakaHanan, oonyana bakaGidele, oonyana bakaGahare, ₅₀oonyana bakaRehaya, oonyana bakaRetsin, oonyana bakaNekoda, ₅₁oonyana bakaGazam, oonyana bakaUza, oonyana bakaPaseha, ₅₂oonyana bakaBhetsayi, oonyana bakaMehunim, oonyana bakaNefishesim, ₅₃oonyana bakaBhakebhuki, oonyana bakaHakufa, oonyana bakaHarehure, ₅₄oonyana bakaBhatseliti, oonyana bakaMehida, oonyana bakaHarsha, ₅₅oonyana bakaBharkosi, oonyana bakaSisera, oonyana bakaTama, ₅₆oonyana bakaNetsiha, oonyana bakaHatifa.

₅₇Oonyana babakhonzi bakaSolomon: oonyana bakaSotayi, oonyana bakaSoferete, oonyana bakaPerida, ₅₈oonyana bakaYahala, oonyana bakaDarkon, oonyana bakaGidele, ₅₉oonyana bakaShefatiya, oonyana bakaHatili, oonyana bakaPokerete-tsebhayim, oonyana baka-Amon.

₆₀Bonke abakhonzi betempile, noonyana babakhonzi bakaSolomon, ibingamakhulu amathathu, anamanci asithoba anababini.

₆₁Ngabo aba abenyuka bevela eTelemela, naseTele-harsha, naseKerubhiadoni-mere; ke ababanga nakuzixela izindlu zooyise nomnombo wabo, ukuba ngabakwaSirayeli na: ₆₂oonyana bakaDelaya, oonyana bakaTobhiya, oonyana bakaNekoda, babengamakhulu omathandathu, anamanci mané anababini.

₆₃Ke kubabingeleli: oonyana bakaHabhaya, oonyana bakaHakotse, oonyana bakaBharzilayi, owazeka umfazi ezintombini zikaBharzilayi waseGiliyadi, wabizwa ngegama lazo: ₆₄abo bakúfuna ukubhalwa kwabo kwababhalelwáyo emilibeni yokuzalwa, abakufumana; bangcola ke, ababa sebubingelelini. ₆₅Irhuluneli yathi kubo, mabangadli nto kwezingcwele kanye, kude kuvele umbingeleli oneeUrim neeTumim.•

₆₆Lonke ibandla lindawonye ibe ingamawaka angamashumi amané anamabini, anamakhulu mathathu, anamanci mathandathu; ₆₇zizodwa izicaka zabo ezi nezicakakazi zabo ezi, zingamawaka asixhenxe, anamakhulu amathathu, anamanci mathathu anesixhenxe; zineemvumi neemvumikazi ezingamakhulu amabini, anamanci mané anantlanu.

₆₈Amahashe abo ibingamakhulu asixhenxe, anamanci mathathu anamathandathu; oondlebende babo ibingamakhulu amabini, anamanci mané anabahlanu; ₆₉iinkamela ibingamakhulu amané, anamanci mathathu anantlanu; amaesile ibingamawaka amathandathu, anamakhulu asixhenxe, anamanci mabini.

₇₀Inxenye yeentloko zezindlu zooyise yanikela emsebenzini. Irhuluneli yanikela ebuncwaneni igolide eliwaka leedarike,• namashumi amahlanu ezitya zokutshiza, namashumi amathathu eengubo zangaphantsi zababingeleli, nesilivere engamawaka amahlanu eemina.• ₇₁Inxenye yeentloko zezindlu zooyise yanikela ebuncwaneni bomsebenzi igolide engamawaka amashumi amabini eedarike, nesilivere engamawaka amabini, anamakhulu amabini eemina. ₇₂Okwanikwayo ngabanye abantu ibe iyigolide engamawaka amashumi amabini eedarike, nesilivere engamawaka amabini, namashumi amathandathu anesixhenxe eengubo zangaphantsi zababingeleli.

₇₃Bahlala ke ababingeleli, nabaLevi, nabamasango, neemvumi, nenxenye yabantu, nabakhonzi betempile, namaSirayeli onke emizini yakomawabo.

Ithe yakufika inyanga yesixhenxe, baba oonyana bakaSirayeli besemizini yakomawabo.