UYOBHI 9

₂Okwenene, ndiyazi ukuba kunjalo;

Ke angáthini na umntu lo ukuba lilungisa phambi koThixo?

₃Ukuba úthe yena wafuna ukubambana naye,

Ubengemphenduli namnye umbuzo kweliwaka.

₄Úlumkile ngentliziyo, ukhaliphile ngamandla:

Ngubani na okha agogotye kuye, aze asinde?

₅Uloshenxisa iintaba zingazi,

Ukuba azibhukuqe ngomsindo wakhe;

₆Ulogungqisa ihlabathi, lisuke endaweni yalo,

Zididizele iintsika zalo;

₇Ulothetha elangeni lingaphumi,

Azitywine, azivingce, iinkwenkwezi ngeenxa zonke;

₈Ulotwabulula ixulu eyedwa,

Anyathele emimangweni yolwandle;

₉Ulowenza iinkwenkwezi zeBhere,• namaKroza, nesiLimela,

Neengontsi zasezantsi.

₁₀Ulowenza izinto ezinkulu ezingenakugocwagocwa,

Nemisebenzi ebalulekileyo engenakubalwa.

₁₁Yabona, udlula phezu kwam, ndingamboni;

Uthi phe, ndingamqondi,

₁₂Yabona, exwila, ngubani na ongamnqandayo?

Ngubani na ongáthi kuye, Wènza ntoni na?

₁₃UThixo akawunqandi umsindo wakhe;

Bayasibekeka phantsi kwakhe abancedi bakaRahabhi.

₁₄Ndingáthini na ke mna ukumphendula,

Ndiwakhethe amazwi am okuphendula kuye?

₁₅Nokuba bendililungisa mna, bendingemphenduli;

Ndingátarhuzisa kuphela kumgwebi wam.

₁₆Ukuba bendithe ndabiza, wandiphendula,

Bendingekholwa ukuba ulibekele indlebe ilizwi lam;

₁₇Kanye ubeya kundityumza ngoqhwithela,

Awandise amanxeba am ngelizé,

₁₈Angàndiphi nokuba ndiphefumle;

Ke ubeya kundihluthisa ngobukrakra.

₁₉Ukuba yinto yamandla ekhalipha, úthi, Ndim okhoyo!

Ukuba yinto yomgwebo, úthi, Ngubani na oya kundimema?

₂₀Ukuba bendithe ndalilungisa, umlomo wam ubuya kundigweba;

Ukuba bendithe ndagqibelela, ubeya kundenza umjibilizi.

₂₁Ndigqibelele; àndiwukhathalele umphefumlo wam;

Ndiyabucekisa ubomi bam.

₂₂Kúnye oko; ngenxa yoko ndithi,

Ogqibeleleyo nongendawo úyabatshabalalisa.

₂₃Ukuba iziniya ithe yabulala ngesiquphe,

Úya kugculela ukuqotywa kwabamsulwa.

₂₄Ihlabathi linikelwe esandleni sabangendawo;

Uyabugqubuthela ubuso babagwebi balo.

Ukuba kanti akunjalo, kwenziwe ngubani na ke?

₂₅Imihla yam ikhawulezé ngaphezu kwesigidimi;

Ibalekile, ayibonanga kulungileyo;

₂₆Ithe phe njengemikhombe yeengcongolo,

Njengokhozi luxwila ixhoba.

₂₇Ndákuthi, Ndiya kuyilibala inkalazo yam,

Ndibuyeke ubuso bam, ndincumeze,

₂₈Ndisuka ndinxunguphale ziimbulaleko zam zonke,

Ndazi ukuba akuyi kuthi ndimsulwa.

₂₉Kuthiwa ndingongendawo mna;

Yini na le nto ndifumana ndizixhamla?

₃₀Nokuba bendithe ndazihlamba ngamanzi ekhephu,

Ndazihlambulula izandla zam ngesepha,

₃₁Úbuya kundithi gxwa emhadini,

Ndibe lisikizi nakwiingubo zam.

₃₂Kuba akamntu yena, njengam nje, ukuba ndimphendule,

Siyé ndawonye ematyaleni.

₃₃Akukho mahluli phakathi kwethu,

Wokubeka isandla sakhe phezu kwethu sobabini.

₃₄Makayisuse intonga yakhe kum,

Isothuso sakhe masingandidandathekisi:

₃₅Ndothetha ke ndingamoyiki;

Kuba andivi kunjalo mna eluvalweni lwam.