UYOBHI 5

₁Khawubize kambe, ukuba úkho na owokuphendula.

Ùya kubheka kuwuphi na kwabangcwele?

₂Kuba ingqumbo iyambulala osisimathane,

Nekhwele liyambulala osisiyatha.

₃Ndimbonile mna osisimathane emila;

Ndaza ndalishwabulela ngesiquphe ikhaya lakhe.

₄Bakude nosindiso abantwana bakhe,

Batyunyuzwa esangweni bengenamhlanguli;

₅Ekubeni abalambileyo besidla uvuno lwakhe,

Balurhole naseluthangweni lwesiphingo;

Abanxaniweyo bazonda ubutyebi babo.

₆Kuba inkohlakalo ayiphumi eluthulini,

Nobuni abuntshuli emhlabeni;

₇Hayi, umntu uzalelwa ububi,

Njengokuba iintlantsi zinyuka ukubaleka kwazo.

₈Ke mna bendiya kusingisa kuThixo,

Indawo yam ndiyibhekise kuThixo,

₉Owenza izinto ezinkulu ezingenakugocwagocwa,

Imisebenzi ebalulekileyo engenakubalwa;

₁₀Ulonika imvula phezu kobuso bomhlaba,

Ase amanzi phezu kwamaphandle,

₁₁Ukuba abathobekileyo abamise ezindaweni eziphakamileyo,

Abanezimnyama zokuzila banyukele elusindisweni.

₁₂Utshitshisa iingcinga zabo banobuqhophololo,

Zingenzi nto izimasekileyo izandla zabo.

₁₃Ubambisa izilumko kubuqhophololo bazo,

Iqhinga labanobuqokolo lingxamiseke ke.

₁₄Emini baqubisana nobumnyama,

Baphuthaphuthe kwemaqanda, ngathi kusebusuku.

₁₅Usindisa ihlwempu ekreleni, emlonyeni wabo,

Nasesandleni sowomeleleyo.

₁₆Kubekho ke ithemba kosweleyo,

Ubugqwetha buwuvale umlomo wabo.

₁₇Yabona, únoyolo mntu owohlwaywa nguThixo!

Musa ke ukukucekisa ukuthethisa kukaSomandla!

₁₈Kuba wénza buhlungu, abophe;

Úyaphalusa, ziphilise izandla zakhe.

₁₉Ezimbandezelweni ezintandathu úya kukuhlangula,

Nakwezisixhenxe akuyi kuchukunyiswa bububi;

₂₀Endlaleni úkukhulula ekufeni

Emfazweni úkukhulula ekuxatyelweni ngekrele,

₂₁Eziniyeni yolwimi ùzinyezwe,

Ungoyiki imbuqo, yakufika.

₂₂Imbuqo nendlala ùya kuyihleka,

Nerhamncwa lasendle ungaloyiki.

₂₃Kuba ùnqophisene namatye asendle,

Amarhamncwa asendle axolelene nawe;

₂₄Uya kwazi ukuba uxolo yintente yakho,

Ulivelele ikhaya lakho, ungaphosani nanto;

₂₅Uyàzi ukuba ininzi imbewu yakho,

Nenzala yakho injengomfuno wehlabathi.

₂₆Ùya kungena engcwabeni womeléle,

Njengokungeniswa kwesithungu ngexesha laso.

₂₇Bôna, oku sìkugocágocile, kunjalo;

Kúve, ukwazi wena ngokwakho.