UYOBHI 38

₂Ngubani na lo usitha icebo

Ngokuthetha okungenakwazi?

₃Khawuwabhinqise njengomfo amanqe akho,

Ndikubuze, undazise.

₄Ùbuphi na wena ukuseka kwam ihlabathi?

Xela, ukuba ùyazi, ùyaqonda.

₅Ngubani na omise imilinganiso yalo, ukuba uyazi?

Ngubani na ololulele ulutya lokulinganisa?

₆Zifakwe ntwenini na izikhondo zeentsika zalo?

Ngubani na owabeka ilitye lalo lembombo,

₇Ekumemeleleni kunye kwamakhwezi okusa,

Beduma bonke oonyana bakaThixo?

₈Ngubani na owaluvingceláyo ulwandle ngeengcango

Ekutyhobozeni kwalo, luphuma esizalweni;

₉Ekulwambathiseni kwam ngamafu,

Ekulusongeleni ngesithokothoko;

₁₀Ndakùlusikelela umda wam,

Ndakùmisa imivalo neengcango;

₁₁Ndathi, Fika apha, ungegqithi;

Eme apha amaza akho akratshayo?

₁₂Ngemihla yakho wakha wayiwisela umthetho na intsasa,

Wasazisa isifingo indawo yaso;

₁₃Ukuba sibambe amasondo ehlabathi,

Bavuthulùlwe kulo abangendawo?

₁₄Liguquka njengodongwe lomsesane wokutywina,

Zizimise ngokwazo izinto njengasesambathweni;

₁₅Abangendawo bavínjwe ukukhanya kwabo,

Nengalo ephakamileyo yaphulwe.

₁₆Ùye wafika na emithonjeni yolwandle?

Wahambahamba ezingontsingontsini zenzonzobila?

₁₇Ùwatyhilelwe na amasango okufa?

Namasango ethunzi lokufa wawabona?

₁₈Ùbugqalile na ububanzi behlabathi?

Xela, ukuba ùyakwazi oko konke.

₁₉Iphi na indlela esa ekhayeni lokukhanya,

Nobumnyama iphi na indawo yabo,

₂₀Ukuba ubùse emdeni wabo,

Ukuba uqonde iindlela zendlu yabo?

₂₁Ùyazi kambe, ngokuba wawusewuzelwe oko

Lilikhulu nenani lemihla yakho!

₂₂Ùfikelele na ebuncwaneni bekhephu?

Ubuncwane besichotho wabubona,

₂₃Endabuqwebela ixesha lembandezelo,

Imini yokudibana nemfazwe?

₂₄Iphi na indlela yalapho kwabiwa khona ukukhanya?

Yalapho luphangalaliswa khona ulophu lwasempumalanga ehlabathini?

₂₅Ngubani na ogqobhozela isiphango umjelo,

Ogqobhozela umbane weendudumo indlela;

₂₆Ukuba ine ezweni elingenamntu,

Entlango, apho kungekho mntu;

₂₇Ihluthise intshabalala yakwantshabalala,

Intshulise uhlaza oluphumayo?

₂₈Inoyise na imvula?

Ngubani na ozala amathontsi ombethe?

₂₉Uphuma umkhenkce esizalweni sikabani na?

Neqabaka yasezulwini izalwa ngubani na?

₃₀Amanzi ayaqina njengelitye,

Nobuso bamanzi anzongonzongo bubambene.

₃₁Ùnokuwabopha na amaqhina esiLimela,

Uzicombulule izintya zamaKroza?

₃₂Ùnokuyivelisa na imilindo yeenyanga ngexesha layo,

Uzalathise iinkwenkwezi zeBhere• nabantwana bayo?

₃₃Ùyayazi na imimiselo yezulu?

Umise ulawulo lwalo ehlabathini?

₃₄Ùnokuliphakamisela emafini na izwi lakho,

Ukuze ubuninzi bamanzi bukugubungele?

₃₅Ùnokuyithuma na imibane, ihambe ithi kuwe, Sikho?

₃₆Ngubani na omise ubulumko ezintsweni?

Ngubani na onike imboniseli ingqondo?

₃₇Ngubani na obala iingqimba zamafu ngobulumko?

Ngubani na othulula iintsuba zezulu.

₃₈Emelelweni wothuli, lube lutyhido,

Amagada anamathelane?

₃₉Ingonyamakazi ùnokuyizingelela inyamakazi na,

Uzalise iphango leengonyama ezintsha,

₄₀Xa zincathamayo ezikhundleni zazo,

Zihlale ezindadeni, zilalele?

₄₁Ngubani na olungisela ihlungulu umfunzelo walo,

Xa amathole alo azibika kuThixo,

Ebhadu-bhadula, engenakudla?