UYOBHI 23

₂Nanamhlanje inkalazo yam ineenkani,

Isandla sam sinzima phezu kokugcuma kwam.

₃Yoo! Andaba bendisazi apho ndingamfumana khona,

Ndize esihlalweni sakhe!

₄Bendiya kulicacisa phambi kwakhe ityala lam,

Ndiwuzalise umlomo wam ngeziganeko.

₅Andaba bendikwazi ukuthetha abeya kundiphendula ngako,

Ndiyiqonde into abeya kuyithetha kum.

₆Wóbambana nam ngamandla amakhulu na?

Hayi! Kodwa ke wóndigqala.

₇Oko othe tye ubeya kubonisana naye,

Ndisinde kumgwebi wam, kuphele.

₈Yabona, ndisinga phambili, angabikho;

Nangasemva, ndingàmnakani;

₉Ngasekhohlo, ekusebenzeni kwakhe, ndingàmalami;

Xa atyekela ngasekunene, ndingàmboni.

₁₀Kuba úyayazi indlela enam;

Endicikidile, bendiya kuphuma njengegolide.

₁₁Unyawo lwam lubambé umkhondo wakhe,

Ndayigcina indlela yakhe, andathi gu bucala.

₁₂Emthethweni wemilebe yomlomo wakhe andisukanga;

Ndiwabekile amazwi omlomo wakhe kunowam ummiselo.

₁₃Ke yena umi ndaweninye, ngubani na ongambuyisayo?

Umphefumlo wakhe ukhanukile, úya kwenza oko.

₁₄Kuba uya kukufeza oko ndikumiselweyo;

Zininzi ke izinto ezinje kuye.

₁₅Ngenxa yoko ndikhwankqiswe ebusweni bakhe.

Ndakukugqala, ndisuka ndinkwantye nguye.

₁₆UThixo uyiqobisile intliziyo yam.

USomandla undikhwankqisile.

₁₇Kuba andibhangiswanga ngenxa yobumnyama,

Nangenxa yobuso bam obugutyungelwe sisithokothoko.