UHABHAKUKI 3

₂Yehova, ndiluvile udaba lwakho, ndoyika;

Yehova, wuphilise umsebenzi wakho phakathi kweminyaka,

Wázise phakathi kweminyaka;

Ekugugumeni kwakho khumbula inceba.

₃UThixo uza evela kwaTeman,

OyiNgcwele evela ezintabeni zaseParan. (Phakamisani.)

Igubungele amazulu indili yakhe,

Ihlabathi lizele yindumiso yakhe.

₄Ubumhlophe bakhe busuke baba njengokukhanya;

Yimithi emacaleni akhe;

Kulapho ke ukuzimela kwamandla akhe.

₅Phambi kwakhe kuhamba indyikitya yokufa,

Kulandele icesina ezinyaweni zakhe.

₆Úmi, walishukumisa ihlabathi;

Úkhangele, wazishukumisa iintlanga;

Zaba nkumenkume iintaba zanini,

Zasibekeka iinduli zasephakadeni;

Iindlela zakhe yena zisephakadeni.

₇Ndiboné iintente zakwaKushan zisenkathazweni;

Amalengalenga elizwe lakwaMidiyan adidizela.

₈Yabe iyimilambo na, Yehova,

Yabe iyimilambo, kusini na, owavutha ngayo na umsindo wakho?

Yabe ilulwandle, kusini na,

Owaphuphumela lona umsindo wakho,

Ukuze nje ukhwele emahasheni akho,

Ezinqwelweni zakho zokusindisa?

₉Sizihlubile sazihluba isaphetha sakho;

Zifungelwe ilizwi iintonga zokohlwaya. (Phakamisani.)

Ihlabathi uligqobhoza imilambo.

₁₀Zikubonile, ziyankwantya iintaba,

Kudlule isiphango samanzi;

Amanzi anzongonzongo akhupha isandi sawo,

Aziphakamisela phezulu izandla zawo.

₁₁Latshona ilanga nenyanga ekhayeni lazo,

Ngokukhanya kweentolo zakho ezihambayo,

Ngobumhlophe bokubengezela kwezikhali zakho.

₁₂Ùlinyathela ilizwe ubhavuma,

Unyhashe iintlanga unomsindo.

₁₃Ùphuma ukuba usindise abantu bakho,

Ukuba usindise umthanjiswa wakho;

Uphaluse intloko endlwini yongendawo,

Usihlube isiseko sakhe, ude use entanyeni. (Phakamisani.)

₁₄Ùyihlaba ngeentonga zakhe intloko yezimpi zakhe,

Ezigalelekayo zisiza kundichitha;

Ezikuvuyelela kwazo ngathi ziza kudla olusizana entsithelweni.

₁₅Ùnyathela ulwandle ngamahashe akho,

Isiyaluyalu samanzi amaninzi.

₁₆Ndithe ndakuva, saxuxuzela isisu sam,

Umlomo wam wabebezela seso sithonga;

Kwangena impehla emathanjeni am, ndagungqa apho ndimi khona;

Ukuba ndilindèle imini yembandezelo,

Eza ebantwini oya kubangenela.

₁₇Nokuba umkhiwane awusayi kutyatyamba,

Kungabikho ndyebo emidiliyeni;

Nokuba isiqhamo somnquma asiyi kuba siso,

Amasimi angabi nakudla,

Iphele esibayeni impahla emfutshane,

Kungabikho nkomo esitalini:

₁₈Mna ke ndiya kudlamka ndikuYehova,

Ndigcobe ndikuThixo umsindisi wam.

₁₉Úngamandla am uYehova iNkosi;

Uzenza iinyawo zam, zibe njengezamaxhamakazi,

Andinyathelise emimangweni yam.