UHEZEKILE 28

₁Kwafika ilizwi likaYehova kum, lisithi, ₂Nyana womntu, Yithi kwingànga yeTire, Itsho iNkosi uYehova ukuthi, Ngenxa enokuba intliziyo yakho iphakamile, usithi, NdinguThixo, ndihleli esihlalweni soThixo embilinini yeelwandle; phofu ùngumntu, ungeThixo, nakuba uyenzé intliziyo yakho yanjengentliziyo yoThixo: ₃yabona, ùlumke kambe nangaphezu koDaniyeli; zonke izinto ezisitheleyo azisithelisiwe kuwe. ₄Ngobulumko bakho nangengqondo yakho ùzenzele ubuhandiba, wangenisa igolide nesilivere ebuncwaneni bakho. ₅Ngobuninzi bobulumko bakho ubandisile ubuhandiba bakho, ngorhwebo lwakho, yaphakama intliziyo yakho ngobuhandiba bakho.

₆Ngako oko, itsho iNkosi uYehova ukuthi, Ngenxa enokuba wayenza intliziyo yakho yanjengentliziyo yoThixo, ₇ngako oko, uyabona, ndiya kukuzisela abasemzini, abangcangcazelisi basezintlangeni; baburholele ubuhle bobulumko bakho amakrele abo, bakuhlambele ukubengezela kwakho. ₈Baya kukuhlisela emhadini, ufe ngokufa kwababuleweyo, embilinini yeelwandle.

₉Wòtsho ubuye utsho na ukuthi, NdinguThixo, phambi kombulali wakho? ungumntu nje, ungeThixo, esandleni sokuhlabayo. ₁₀Ùya kufa ukufa kwabangalukileyo ngesandla sabasemzini, ngokuba ndithethile; itsho iNkosi uYehova.

₁₁Kwafika ilizwi likaYehova kum, lisithi, ₁₂Nyana womntu, mphakamisele isimbonono ukumkani waseTire, uthi kuye, Itsho iNkosi uYehova ukuthi, Wena lutywino lwesakhiwo esilinganiselweyo kakuhle, uzeleyo bubulumko, umhle kwaphela. ₁₃Ubuse-Eden emyezweni kaThixo; onke amatye anqabileyo abe esisigubungelo sakho: isardiyo,• netopazi,• nedayimani,• nekrizolite,• nebherilo,• neyaspisi,• nesafire,• nekarbhunkolo,• nesmarado,• negolide; umsebenzi weengqondi zakho nowamankazana akho waye ukuwe; ngemini yokudalwa kwakho ezo zinto zalungiswa. ₁₄Waye uyikerubhi• ethanjisiweyo, egqubuthelayo; ndakwenza ke, waba sentabeni engcwele kaThixo, wahambahamba phakathi kwamatye anomlilo.

₁₅Wagqibelela ngeendlela zakho, kususela kwimini yokudalwa kwakho, kwada kwafumaneka ubugqwetha kuwe. ₁₆Ngobuninzi borhwebo lwakho umbilini wakho wazala kukugonyamela, wóna ke. Ndiya kulahla wena, ngokwento engcolileyo, umke entabeni kaThixo; ndikutshabalàlise, kerubhi igqubuthelayo, usuke phakathi kwamatye anomlilo. ₁₇Intliziyo yakho iphakamile ngenxa yobuhle bakho, ubonákalisile ubulumko bakho kunye nokubengezela kwakho. Ndikukhahlela emhlabeni ndikwènze ube ngumbonelo phambi kokumkani. ₁₈Ngobuninzi bobugwenxa bakho, ebugqwetheni borhwebo lwakho, uzihlámbele iingcwele zakho; ndivelisa ke umlilo kwaphakathi kwakho; úya kukutshisa wona, ndikwènze ube luthuthu emhlabeni, emehlweni abo bonke abakubonayo. ₁₉Bonke abakwaziyo ezizweni baya kumangaliswa nguwe, usuke ube sisikhwankqiso, ungabuyi ubekho naphakade.

₂₀Kwafika ilizwi likaThixo kum, lisithi, ₂₁Nyana womntu, bhekisa ubuso bakho eTsidon, uprofete ngayo. ₂₂Yithi, Itsho iNkosi uYehova ukuthi, Uyabona, ndikuchasile, Tsidon; ndiya kuzizukisa phakathi kwakho; bazi ukuba ndinguYehova, ekwenzeni kwam izigwebo kuyo, ndizingcwàlisele kuyo. ₂₃Ndiya kuthumela kuyo indyikitya yokufa negazi ezitratweni zayo; bawe abangxwelerhiweyo phakathi kwayo likrele, eliyifikelayo ngeenxa zonke; bazi ukuba ndinguYehova.

₂₄Akuyi kuba sabakho meva anobuhlungu, naluviko lwenza buhlungu, kwindlu kaSirayeli, luphuma kubo bonke abangeenxa zonke kuyo, abayicukuleyo; bazi ke ukuba ndinguYehova. ₂₅Itsho iNkosi uYehova ukuthi, Ekuyibutheni kwam indlu kaSirayeli, ezizweni abaphangalaliswe kuzo, ndiya kuzingcwalisela kubo emehlweni eentlanga, bahlale emhlabeni wabo, endawunika umkhonzi wam uYakobi. ₂₆Baya kuhlala kuwo bekholosile, bakhe izindlu, batyale izidiliya, bahlale bekholosile ekwenzeni kwam izigwebo kubo bonke ababacukulayo, abangeenxa zonke kubo; bazi ukuba ndinguYehova uThixo wabo.