IEKSODUS 25

₁Wathetha uYehova kuMoses, wathi, Thetha koonyana bakaSirayeli, bandizisele umrhumo. ₂Nowuthabatha umrhumo wam ebantwini bonke abanikela ngokuqhutywa yintliziyo. ₃Nguwo lo ke umrhumo eniya kuwuthabatha kubo: igolide, nesilivere, nobhedu; nento emsi nemfusa nebomwu, ₄nelinen ecikizekileyo, noboya beebhokhwe; ₅nezìntsu zeenkunzi zezimvu, zenziwe zayingqombela, nezikhumba zamahlengezi; ₆nemingampunzi, ioli yesikhanyiso, ubulawu beoli yentambiso, nobesiqhumiso esiqholiweyo; ₇amatye ebherilo,• namatye okufakwe e-efodini,• nawobengo; ₈bandènzele indawo engcwele, ndihlale phakathi kwabo. ₉Njengako konke endikubonisa kona: ngokomfanekiso womnquba, nomfanekiso weempahla zawo zonke, ize nenjenjalo ukuwenza.

₁₀Mabenze ityeya yomngampunzi. Ubude bayo mabube ziikubhite• zombini ezinesiqingatha, ububanzi bayo bube yikubhite enesiqingatha, ukuphakama kwayo kube yikubhite enesiqingatha; ₁₁uyàleke ngegolide ecocekileyo, uyàleke ngaphakathi nangaphandle, uze uyithi jize ngesithsaba segolide; ₁₂woyityhidela amakhonkco egolide abe mané, uwafake emilenzeni yayo yominé, amakhonkco abe mabini ngeli icala, amakhonkco abe mabini ngelinya icala; ₁₃wenze izibonda ngomngampunzi, uzàleke ngegolide, ₁₄uzifake izibonda ezo emakhonkcweni asemacaleni etyeya, ithwalwe ngazo ityeya leyo. ₁₅Zoba semakhonkcweni etyeya izibonda ezo; maze zingàrholwa kuyo. ₁₆Isingqino, endiya kukunika sona, uze usibeke etyeyeni.

₁₇Uze wenze isihlalo sokucamagusha ngegolide ecocekileyo. Ubude baso mabube ziikubhite ezimbini ezinesiqingatha, ububanzi baso bube yikubhite enesiqingatha. ₁₈Uze wenze iikerubhi• zibe mbini ngegolide; ukuzenza wozikhanda, zivele eziphelweni zozibini zesihlalo sokucamagusha; ₁₉wenze ikerubhi ibe nye ivele esiphelweni seli icala, enye ikerubhi ivele esiphelweni seliya, esihlalweni sokucamagusha; wòzenza iikerubhi zivele eziphelweni zaso zozibini. ₂₀Maze iikerubhi ziwolule amaphiko phezulu, zisisithelise ngamaphiko azo isihlalo sokucamagusha, ubuso bazo bukhangelane, bubheke esihlalweni sokucamagusha ubuso beekerubhi ezo.

₂₁Uze usibeke isihlalo sokucamagusha phezu kwetyeya; ufake etyeyeni isingqino endiya kukunika sona. ₂₂Ndiya kuhlangana nawe khona, ndithethe nawe ndisesihlalweni sokucamagusha, phakathi kweekerubhi zombini eziphezu kwetyeya yesingqino, ngeento zonke endiya kukuwisela umthetho ngazo koonyana bakaSirayeli.

₂₃Uze wenze netafile ngomngampunzi. Ubude bayo boba ziikubhite ezimbini, ububanzi bayo bube yikubhite, ukuphakama kwayo kube yikubhite enesiqingatha; ₂₄uyàleke ngegolide ecocekileyo, uyenzele isithsaba segolide esithi jize. ₂₅Uze uyenzele udini olungangobubanzi besandla ngeenxa zonke, ulwenzele udini lwayo isithsaba segolide esithe jize. ₂₆Woyenzela amakhonkco egolide abe mané, uwafake amakhonkco omané ezimbombeni zoné ezisemilenzeni yayo yominé. ₂₇Oba kufuphi nokuhlangana kodini amakhonkco lawo, abe ziindawo zokufaka izibonda zokuyithwala itafile; ₂₈uzenze izibonda ezo ngomngampunzi, uzàleke ngegolide, ithwalwe ngazo itafile.

₂₉Uze wenze izitya zayo, neenkamba zayo, neendebe zayo, nemicephe yayo ekuya kuthungwa ngayo; uzenze ngegolide ecocekileyo; ₃₀ubeke etafileni izonka zokubonisa, phambi kwam ngamaxesha onke.

₃₁Uze wenze nesiphatho sezibane ngegolide ecocekileyo. Ukusenza, wòsikhanda isiphatho eso: isikhondo saso, nesibili saso, neendebe zaso, namaqhina aso, neentyantyambo zaso zivele kwakuso; ₃₂amasebe amathandathu avele emacaleni aso; amasebe amathathu esiphatho avele kweli icala laso, amasebe amathathu esiphatho avele kweliya icala laso.

₃₃Zoba ntathu iindebe ezifana neentyantyambo zeamangile,• zinamaqhina neentyantyambo, kweli isebe; neendebe ezintathu ezifana neentyantyambo zeamangile, zibe zinamaqhina neentyantyambo, kweliya isebe; makube njalo kumasebe omathandathu avela esiphathweni eso. ₃₄Zoba né iindebe esiphathweni, ezifana neentyantyambo zeamangile, zinamaqhina aso neentyantyambo zaso; ₃₅ibe liqhina phantsi kwamasebe omabini livele kuso, ibe liqhina phantsi kwamasebe amabini livele kuso, ibe liqhina phantsi kwamasebe amabini livele kuso, abe ngawamasebe amathandathu avelayo esiphathweni eso. ₃₆Amaqhina awo, namalungu awo avele kuso, sonke siphela masibe ngumkhando omnye wegolide ecocekileyo.

₃₇Uze wenze izibane zaso zibe sixhenxe, uzimise izibane zaso, zikhanyisele icala elikhangelene nomphambili waso. ₃₈Nozenza izifinyiso zaso, neengcedevu zaso, ngegolide ecocekileyo. ₃₉Nosenza ngetalente• yegolide ecocekileyo, sona nezo mpahla zonke. ₄₀Khangela ke, uzènze ngokomfuziselo wazo, owawubona entabeni.