IZIKRONIKE I 11

₁Abuthelana ke onke amaSirayeli kuDavide eHebron, athi, Uyabona, silithambo lakho, siyinyama yakho; ₂kwangaphambili, oko uSawule ebengukumkani, ibinguwe obuphuma ungena namaSirayeli; wathi uYehova uThixo wakho kuwe, Wena uya kubalúsa abantu bam amaSirayeli; wena uya kuba yingànga yabantu bam amaSirayeli. ₃Afika onke amadoda amakhulu akwaSirayeli kukumkani eHebron, wenza umnqophiso nawo uDavide eHebron, phambi koYehova; amthambisa uDavide ukuba abe ngukumkani kumaSirayeli, ngokwelizwi likaYehova ngesandla sikaSamuweli.

₄Wahamba uDavide namaSirayeli onke, waya eYerusalem (yiYebhusi ke leyo), apho abekhona amaYebhusi, abemi belo zwe. ₅Bathi abemi beYebhusi kuDavide, Akusayi kungena apha. Wayithimba uDavide imboniselo yeZiyon (ngumzi kaDavide ke lowo). ₆Wathi uDavide, Owaxabele amaYebhusi kwasentloko, woba yintloko nomthetheli. Wenyuka kwasentloko uYowabhi unyana kaTseruya, waba yintloko ke. ₇UDavide wahlala emboniselweni apho; ngenxa yoko bathi ngumzi kaDavide. ₈Wawakha umzi, wajikelezisa ngeenxa zonke, wathabathela eMilo, wajikelezisa. UYowabhi wawasindisa amaqongqolo aloo mzi. ₉UDavide waya eba mkhulu ngokuba mkhulu; uYehova wemikhosi ubenaye.

₁₀Zizo ezi iintloko zamagorha abekuDavide, esomelezana naye ebukumkanini bakhe kunye namaSirayeli onke, ukuba amenze ukumkani, ngokwelizwi likaYehova kumaSirayeli. ₁₁Lilo eli inani lamagorha kaDavide: nguYashobheham unyana kaHakimoni, intloko yabaphathi-mikhosi. Yena wathi rhuthu intshuntshe yakhe kumakhulu amathathu, awahlatywayo ngasihlandlo sinye. ₁₂Emva kwakhe nguElazare unyana kaDodo, umAhowa, owayengomnye kumagorha amathathu. ₁₃Yena wayenoDavide ePas-damim; amaFilisti ayebuthelene khona ukuba alwe. Kwakukho khona isiqwenga somhlaba, sinerhasi ichumile; basaba abantu ebusweni bamaFilisti. ₁₄Wesuka yena wamisa esazulwini sesiqwenga eso, wasithimba, yena wawabulala amaFilisti; uYehova wenza ke usindiso olukhulu.

₁₅Kwehla isithathu sabaziintloko emashumini amathathu, saya kuDavide eweni, emqolombeni waseAdulam; yaye impi yamaFilisti imise iintente entilini yamaRafa. ₁₆UDavide oko ubesemboniselweni apho; ikampu yamaFilisti oko ibiseBhetelehem. ₁₇Wanqwena uDavide wathi, Akwaba, bethu, bendingasezwa amanzi equla laseBhetelehem elisesangweni! ₁₈Atyhudisa empini yamaFilisti amadoda amathathu lawo, akha amanzi equleni laseBhetelehem elisesangweni, awathwala awazisa kuDavide. Akavuma ke uDavide ukuwasela; wawathululela phantsi, phambi koYehova, wathi, ₁₉Makube lee kum, Thixo wam, ukwenza oko. Igazi lala madoda, eliyimiphefumlo yawo, ndolisela yini na? ngokuba awazisa encamé imiphefumlo yawo. Akavuma ke ukuwasela. Enza ezo zinto amagorha lawo mathathu.

₂₀UAbhishayi, umninawa kaYowabhi, yena waye eyintloko yamathathu. Yena wathi rhuthu intshuntshe yakhe kumakhulu amathathu, wabinza. Waba negama ke kulawo mathathu. ₂₁Kulawo mathathu wayezukile kunamabini, waba ngumthetheli wawo ke; àkafika kodwa kulawa mathathu.

₂₂UBhenaya unyana kaYoyada, unyana wendoda enobukroti yaseKabhetseli, ezenzo zininzi, yena wabulala iingwanyalala ezimbini zakwaMowabhi; yena wehla, wabulala ingonyama emhadini phakathi, mhla ngekhephu. ₂₃Yena wabulala indoda engumYiputa, indoda enewonga, ekubhite• zintlanu; umYiputa lowo ephethe intshuntshe enjengomthi wabaluki beengubo. Wehla ke waya kuyo ephethe intonga, wayihlutha intshuntshe esandleni somYiputa lowo, wambulala kwangentshuntshe yakhe. ₂₄Wenza ezo zinto uBhenaya unyana kaYoyada; waba negama ke kwisithathu eso samagorha. ₂₅Yabona, wayezukile yena kunamashumi amathathu lawo; kodwa àkafika kwamathathu lawa. UDavide wammisa ephakathini lakhe.

₂₆Amagorha anobukroti ayengooAsaheli, umninawa kaYowabhi; uElihanan, unyana kaDodo, waseBhetelehem; ₂₇uShamoti waseHarodi; uHeletse umPelon; ₂₈uIra unyana kaIkeshe, waseTekowa; uAbhihezere waseAnatoti; ₂₉uSibhekayi umHusha; ₃₀uIlayi umAhowa; uMaharayi waseNetofa; uHelede unyana kaBhahana, waseNetofa; ₃₁uItayi unyana kaRibhayi, waseGibheha yoonyana bakaBhenjamin; uBhenaya wasePiraton; ₃₂uHurayi wasezihlanjeni zaseGahashe; ₃₃uAbhiyeli waseArabha; uAzemavete waseBhaharum; uEliyabha waseShahalebhon; ₃₄uBhene-hashem waseGizon; uYonatan unyana kaShage, umHarari; ₃₅uAhiyam unyana kaSakare, umHarari; ₃₆uElifali unyana kaUre; uHefere umMekera; ₃₇uAhiya umPelon; uHetsero waseKarmele; uNaharayi unyana kaEsebhayi; ₃₈uYoweli umzalwana kaNatan; ₃₉uMibhehare unyana kaHagri; uTseleke umAmon; uNaharayi waseBheroti, umphathi weentonga zikaYowabhi unyana kaTseruya; ₄₀uIra umItri; uGarebhe umItri; ₄₁u-Uriya umHeti; uZabhadi unyana ka-Alayi; ₄₂uAdina unyana kaShiza, umRubhen, intloko yamaRubhen, enamashumi amathathu; ₄₃uHanan unyana kaMahaka; noYoshafati waseMeten; ₄₄u-Uziya waseAshterati; uShama noYehiyeli, oonyana bakaHotam waseArahere; ₄₅uYedihayeli unyana kaShimri, noYoha umzalwana wakhe, umTitsi; ₄₆uEliyeli umMahavi; noYeribhayi noYoshafiya, oonyana bakaElinaham; ₄₇noItema umMowabhi; uEliyeli, no-Obhedi, noYahasiyeli waseMetsobhaya.