Ingoma ka‐Solomone 3

₁Pezu kwesilili sam ebusuku, ndafuna lowo umpefumlo wam umtandayo; ndamfuna, kanti andamfumana. ₂Ndati: Ndosuka ke, ndihambahambe esixekweni, ezitarateni nasezindaweni ezibanzi; ndiya kumfuna lowo umpefumlo wam umtandayo: ndamfuna, kanti andamfumana. ₃Abalindi abahambahambayo esixekweni bandifumana; endati kubo: Nimbonile na lowo umpefumlo wam umtandayo? ₄Bekungumganyana kodwa bendigqitile kubo, xeshekweni ndamfumana lowo umpefumlo wam umtandayo; ndambamba, bendingavumi ukumyeka, ndada ndamzisa endlwini kama̔, nasenkambilini yowandizalayo. ₅Ndiyanifungisa, nina zintombi zase‐Yerusaleme! ngamabadikazi, nangamaxamakazi asendle, ukuba ningavusi, nokuba ningavuseleli utando lwam, lude luvume.

₆YINTO nina le inyuka elubala, njengemiqulu yomsi, iqunyiselwe ngemore nangentlakamhlope, ngezicoleko zonke zomtengi? ₇Bona ke, yipalankine yake u‐Solomone: amaṙoti angamashumi matandatu ayayingqonga, kuwo amaṙoti akwa‐Sirayeli: ₈onke epete iziṙele, eqelene nokulwa; amanye ngamanye eneziṙele zawo ngasematangeni awo, ngenxa yezoyikiso ebusuku. ₉Uzenzele ipalankine ukumkani, u‐Solomone, ngemiti yase‐Lebanone. ₁₀Intsika zayo wazenza ngesilivere, isixaso sayo ngegolide, isihlalo sayo ngesibomvu; umpakati wayo usetyenziwe ngotando zintombi zase‐Yerusaleme. ₁₁Pumani, nina zintombi zase‐Ziyone! niye kumkangela ukumkani, u‐Solomone, enekrone owamvatisa ngayo unina ngomhla wokutshata kwake, nangomhla wokuvuya kwentliziyo yake.