Amaculo 22

₁TIXO wam, Tixo wam! undishiyile nganina? ukude nganina ekusizweni kwam, nasemazwini okukala kwam? ₂Tixo wam! ndiyabiza emini, kanti akupenduli; nasebusuku, kanti akuko ukuti cwaka kum. ₃Kodwa wena uyingcwele, uhleli ezindunyisweni zo‐Sirayeli. ₄Obawo betu batembela kuwe; batemba, wabakulula ke. ₅Balilela kuwe, basindiswa ke; batembela kuwe, abadaniswa ke. ₆Kuloko mna ndingumsundu, andinguye umntu; ndiyinto yokugxekwa eluntwini, neyokudelwa ngabantu. ₇Bonke abandibonayo bayandihleka; bawakamisa umlomo, bahlunguzela intloko, besiti: ₈Wayama uyehova, makamsindise; makamkulule, ngokuba ekoliswa nguye. ₉Kodwa wena ungobendiku̔pa esiswini; wanditembisa ndisemabeleni kama̔. ₁₀Bendilahlelwe kuwe kwa sesizalweni; ungutixo wam kwa sesiswini sikama̔.

₁₁Zungabi kude nam, ngokuba ubunzima bukufupi, kungeko noncedayo. ₁₂Inkunzi ezininzi zindingqongile; inkunzi ezinamandla zase‐Bashane zindiṙaulile. ₁₃Zandakamela ngemilomo yazo, njengengonyama eqwengayo nekonyayo. ₁₄Ndipalaziwe njengamanzi; amatambo am onke aṙunekile: intliziyo yam injengomtwebeba; inyibilikile pakati kwamatumbu am. ₁₅Ukwomelela kwam kwomile njengecepe lompanda; ulwimi lwam lunamatele ekuhlangutyeni lam; undibekile elutulini lwokufa. ₁₆Ngokuba izinja zindingqongile; intlanganiso yabenzi bokungalungileyo indipahlile; bahlaba izandla zam nenyawo zam. ₁₇Ndingabala onke amatambo am: bona bayakangela, bayandibonela. ₁₈Bayabelana izivato zam; napezu kwengubo yam bayenza amaqashiso. ₁₉Kodwa wena, Yehova! zungabi kude nam: Mandla am! kauleza ukuza kundisiza. ₂₀Hlangula eṙeleni umpefumlo wam, nasemandleni enja udwa lwam. ₂₁Ndisindise emlonyeni wengonyama: undivile wandisindisa ezimpondweni zenyati.

₂₂Ndoshumayela igama lako kubazalwana bam; pakati kwentlanganiso ndokubonga. ₂₃Nina nimoyika uyehova, mbongeni; nonke nina nzalo ka‐Yakobi, mdumiseni; nimhlonele, nonke nina nzalo ka‐Sirayeli. ₂₄Ngokuba ubuhlwempu behlwempu engabudelanga, engabuzondanga kanjalo; akalifihlelanga nobuso bake; wati, lakulilela kuye, waliva. ₂₅Kwoba ngawe ukubonga kwam entlanganisweni enkulu; izibambiso zam ndozifeza ebusweni babamoyikayo. ₂₆Abalulamileyo botya bahlutiswe; baya kubonga uyehova abo bamfunayo: intliziyo yenu iya kupila kude kube ngunapakade. ₂₇Zonke izipelo zomhlaba zokumbula zibuyele kuyehova: zonke izizalwane zezizwe zobedesha ebusweni bako. ₂₈Ngokuba ubukumkani bo bukayehova: nguye umpatibukosi pakati kwezizwe. ₂₉Zonke izityebi zomhlaba zotya zibedeshe; bonke abahlela elutulini bogoba pambi kwake; nalowo ongenakupilisa umpefumlo wake. ₃₀Kwobako inzalo emkonzayo: kwobaliswa ngenkosi esizukulwaneni. ₃₁Baya kuza, bashumayele ubulungisa bake ebantwini abaya kuzalwa, ukuba wenzile oku.