U‐Yoshuwa 20

₁WABUYA wateta uyehova ku‐Yoshuwa, esiti: ₂Teta nosapo luka‐Sirayeli, usiti: Zinikeleni izixeko zesipepelo, endanditeta ngazo kuni ngesandla sika‐Mosesi: ₃ukuba kusabele kona umbulali ombulele umntu ubomi ngesiposo, kungengokwazi; zoba yindawo yokupepela kuni ngenxa yompindezeli wegazi. ₄Waeya kusabela kwesinye ezixekweni ezo, eme emnyango wesango lesixeko, atete amazwi ake ezindlebeni zabadala besosixeko, abaya kumamkela esixekweni kubo, bamnike indawo, ukuba ahlale nabo. ₅Naxeshekweni umpindezeli wegazi amputumayo, abayi kunikela umbulali lowo esandleni sake; ngokuba engambetanga ummelwane wake ngokwazi, engamtiyanga ngamaxesha apambili kanjako. ₆Waeya kuhlala kwesosixeko, ade eme ebusweni bentlanganiso ukuba kugwetywe, umhlaumbi kude kufe umperisite omkulu oya kubako ngezontsuku; andule abuye umbulali lowo, eze esixekweni sakowabo, nasendlwini yake, esixekweni apo abesaba kona.

₇Lwaza lwahlula i‐Kedeshe yase‐Galili entabeni yakwa‐Nefatali, ne‐Shekeme entabeni yakwa‐Frayime, ne‐Kiriyate‐areba, ekwa yiyo i‐Hebrone, entabeni yakwa‐Juda.

₈Napesheya kwe‐Yoredane malungana ne‐Jeriko ngasempumalanga, lwanika i‐Betsere esentlango, ezweni elibutafa, kwisizwe sika‐Rubene; ne‐Ramote ese‐Gileyadi, kwisizwe sika‐Gadi; ne‐Golane ese‐Bashane, kwisizwe sika‐Manase.

₉Zizo ezi izixeko ezibe zimiselwa lwonke usapo luka‐Sirayeli, nowasemzini obepambukele pakati kwalo, ukuba asabele kona osukuba ebulala umntu ngesiposo; aze angafi ngesandla sompindezeli wegazi, engekemi ebusweni bentlanganiso.