U‐Jobi 28

₁Okunene kuko isipumelo kwisilivere, nendawo kwigolide abayicokisayo. ₂Isincete siyasuswa ehlabatini, nelitye liyanyibilikiselwa ubedu. ₃Uyabekela ubumnyama incam; kwa kude kupele kanye uyapanda amatye esitokotoko nesitunzi sokufa. ₄Uyanqikela ituba kude nalapo kumiwayo; belityelwe lunyawo, bayalengalenga; bekude nabantu, bayajingajinga. ₅Umhlaba, kupuma kuwo isonka, nangapantsi kwawo, kupenulwa okungati ngumlilo. ₆Yindawo yesafire amatye awo; namagada egolide akuyo. ₇Indlela, akuko ntakakazi eyaziyo yona; neliso lexalanga alike liyikangele; ₈aziyinyatelanga izilo ezir̔atshileyo; ayidlulanga pezu kwayo ingonyama enomsindo. ₉Uyolula isandla sake pezu kwelitye elilukuni; uyapenula intaba kwa sezingcanjeni zazo. ₁₀Pakati kwelwalwa uyacandela imijelo; nako konke okunqabileyo liyakubona iliso lake. ₁₁Uyavingca izelo, zingacapazi; nokufihlakeleyo uyakukupela ekukanyeni.

₁₂Kodwa ubulumko, kupina buya kufunyanwa? ipina ke indawo yengqondo? ₁₃Akwaziwa ngumntu inani labo; abufunyanwa elizweni labahleliyo kanjalo. ₁₄Inzulu iti: Abuko kum; nolwandle luti: Abuko nam. ₁₅Igolide enqabileyo ayiyi kunikwa esikundleni sabo; nesilivere ayiyi kulinganiselwa ixabiso labo. ₁₆Abungelinganiswe negolide yase‐Ofire, nesadonutse enqabileyo, nesafire. ₁₇Igolide nekrisitale aziyi kufaniswa nabo; nokwanana kwabo akuyi kuba ngempahla zegolide ecokisiweyo. ₁₈Akuyi kukankanywa ikorali neperule; nokuzuzwa kwobulumko kupezu kwokwerubi. ₁₉Itopaze yakwa‐Kushe ayiyi kufaniswa nabo; abuyi kulinganiswa negolide entle.

₂₀Kodwa ubulumko, buvela pina? nendawo yengqondo ipina ke? ₂₁bufihlakele nje emehlweni abo bonke abahleliyo, busitele nasezintakeni zezulu. ₂₂Intshabalalelo nokufa kuti: Udumo lwayo siluvile ngendlebe zetu.

₂₃Utixo uyaqonda indlela yabo, uyayazi yena indawo yabo. ₂₄Ngokuba ekangela ngasezincameni zomhlaba; uyabona ngapantsi kwezulu lonke. ₂₅Akuba ebewenzela umoya ubunzima, namanzi wawacwangcisa ngomlinganiso; ₂₆nxa wenzelayo imvula ummiso, nombane wendudumo indlela; ₂₇wandula wabubona, wabushumayela; wabuqinisa, ewe, wabupengulula. ₂₈Wayesiti kuye umntu: Bona ke, ukwoyika inkosi, oko kububulumko; nokumka enkohlakalweni kuyingqondo.