U‐Jobi 22

₁WANDULA wapendula u‐Elifazi um‐Temani, wati:

₂Indoda ingamnceda utixo na, njengokuba olumkileyo ezinceda? ₃Kungumhlali kusomandla na ukuba ulungile? kuyinzuzo kusinina, ukuba uzenze indlela zako zifezekile? ₄Kungenxa yokukwoyika aya kupika nawe na? wongena nawe ekugwebeni na? ₅Asi yenkulu na inkohlakalo yako? nezono zako asi zezingenasipelo na? ₆Ngokuba utabatile umbambiso kubazalwana benu kungeko tuba, nabazé ubahlubileyo izivato zabo. ₇Ocubukileyo akumsezanga ngamanzi, nolambileyo umvimbile isonka. ₈Kanti indoda yamandla umhlaba ubungowayo; nomntu obukiweyo wahlala kuwo. ₉Abahlolokazi ubandulule zé, nenkedama ingalo zazo zityunyuzwe. ₁₀Ngako oko uṙauliwe yimigibe; siti isoyiko sikutuse ngokubaqa: ₁₁umhlaumbi bubumnyama, ude ungaboni, ize ingxokolo yamanzi ikugubungele.

₁₂Utixo akasenyangweni yezulu na? kaukangele ukuba pezulu kwenkwenkwezi, ukupakama kwazo! ₁₃Kanti ute: Angati nina utixo ukwazi? Angagweba emva kwesitokotoko na? ₁₄Amafu abungqingqwa ayintsiteliso kuye, ukuba akaboni; uyahamba pezu kwesazinge sezulu. ₁₅Uke wagqala na indlela yakudala, leyo bayinyatelayo abantu abakohlakeleyo? ₁₆ababebanjiwe lingekabiko ixesha nje; umsinga ubugalelwa pezu kwesisekelo sabo: ₁₇ababesiti kutixo: Pambuka kuti: nakanjako: Angenza nto nina usomandla kuti? ₁₈nangona ebenguye owazalisayo izindlu zabo ngobutyebi. Kodwa, iqinga labakohlakeleyo malibe kude kum! ₁₉Bayabona abalungileyo, bavuye ke; omsulwa uyabahleka, esiti: ₂₀Ngenyaniso abasisukeleyo batshatyalalisiwe; nesisalela sabo umlilo usidlile.

₂₁Uz’ uti ke wazane naye, ube noxolo; ngezizinto kuya kuza kuwe okulungileyo. ₂₂Zuwamkele umteto emlonyeni wake, uwabekele amazwi ake entliziyweni yako. ₂₃Nxa ubuyelayo kusomandla, uya kwakiwa; inkohlakalo uya kuyikwelelisa kude ezintenteni zako. ₂₄Uze ubeke igolide pezu kwotuli, neyase‐Ofire pakati kwembokoto zemilanjana: ₂₅waye usomandla eya kuba zigolide zako, nemfumba zesilivere kuwe. ₂₆Ngokuba oko uya kuziyolisa kusomandla, upakamisele kutixo ubuso bako. ₂₇Uya kutandaza kuye, wokuva ke; nezibambiso zako uya kuzifeza. ₂₈Ewe, uya kwahlula into, yaiya kuqiniswa kuwe; napezu kwendlela zako kwokazimla ukukanya. ₂₉Nxa batotyelwa pantsi, woza uti: Kuko ukupakama; waeya kumsindisa okedamileyo. ₃₀Uya kumsindisa ongemsulwa; oya kusindiswa ngobumhlope bezandla zako.