U‐Jobi 15

₁WABUYA wapendula u‐Elifazi um‐Temani, wati:

₂Umntu olumkileyo uya kupendula na ngokwazi okungumoya: nombilini wake wowuzalisa na ngomoya wasempumalanga; ₃etetelela nje ngamazwi angenakunceda, nangeziteto angezuze nto ngazo? ₄Wena kambe uyatshitshisa ulwoyiko; uyabandeza ububedesho pambi kwotixo. ₅Ngokuba umlomo wako usifundisa inkohlakalo yako, nakuba uqasha ulwimi lwabanamaqokolo. ₆Ngumlomo wako okugwebayo, asi ndim; ewe, owako umlomo uyanqi̔na ngakuwe.

₇Ubuzalwa ungumntu wokuqala na? ubuveliswa zingekabiko induli na? ₈Wabupulapula esihlelweni sikatixo na? uzibambele wena ubulumko na? ₉Yinto nina uyaziyo, esingayazi tina? yinto nina uyiqondayo, engenati yona? ₁₀Kuko kwa lowo oyingwevu nalowo olixego pakati kwetu, egqitisile uyihlo ngobudala nje. ₁₁Zincinane na kuwe izonwabiso zikatixo, nelizwi elitetwayo kakuhle ngakuwe? ₁₂Yinina ukuba intliziyo yako iyakukukulisa? namehlo ako ayapanyazela nina; ₁₃ukuba uwusonga umoya wako ngakuye utixo, nokuba uwapumisa amazwi anjalo emlonyeni wako?

₁₄Yinto nina umntu, ukuba abe ehlambulukile? nozelweyo ngumfazi, ukuba abe elungile? ₁₅Bona ke, akatembi kubo abangcwele bake; nawo amazulu akamhlope emehlweni ake. ₁₆Kancinane kangakananina ngakumbi ke oko kuzondekileyo nokudlubukileyo, — umntu oselayo inkohlakalo njengamanzi?

₁₇Ndokutyela: pulapula kum; oko ndikubonileyo, ndiya kubalisa kona; ₁₈abate abalumkileyo bakushumayela, abakusitelisa, kuvela koyise babo: ₁₉obekunikwa kubo bodwa ilizwe, nxa kungadlulanga owasemzini pakati kwabo.

₂₀Yonke imihla okohlakeleyo uyabulawa bubuhlungu, nenani leminyaka limfihlelwe umbandezeli. ₂₁Intlokoma yezoyikiso isezindlebeni zake: eluxolweni umtimbi uya kumzuma. ₂₂Akakolwa ukuba wobuya ebumnyameni, koko ukuba ulindelwe iṙele. ₂₃Uyapalapalela isonka, esiti: Sipina? uyazi ukuba umhla wobumnyama seulungisiwe ngasesandleni sake. ₂₄Ubunzima noxinezeko ziyamtusa; ziyameyisa njengokumkani olungele ukulwa. ₂₅Ngokuba ebesolula isandla sake ngakuye utixo, wazikalipisa ngakuye usomandla: ₂₆ebembalekela ngentamo, ngembumbulo ezibukubuku zamakaka ake. ₂₇Nakuba abegubungela ubuso bake ngokutyeba kwake, wenza nengxeba zamanqata esinqeni sake: ₂₈uya kuma noko ezixekweni ezitshatyalalisiweyo, ezindlwini ekungeko ohlala kuzo, ezilungele ukufunjiswa. ₂₉Akayi kuba sisityebi, kanjalo ayiyi kumana ibako indyebo yake; imfuyo yabo ayiyi kutwabulukela pezu kwomhlaba. ₃₀Akayi kumka ebumnyameni; ihlumelo lake ilangatye liya kulomisa; woda emke ngomoya womlomo wake.

₃₁Makangatembi kokungendawo ulukuhliwe ngako: ngokuba okungendawo kuya kuba ngumvuzo wake: ₃₂ungekafiki umhla wake kwozalisekiswa; nesebe lake aliyi kuba luhlaza. ₃₃Uya kuvutulula idreyive emuncu yake, njengomti weveyine; nentyatyambo yake uya kuyiwisa, njengomnquma. ₃₄Ngokuba umhlambi womginwa woba budhlolo; nentente zesincwancwaniso umlilo uya kuzigqiba. ₃₅Bayamita ububi, bazale inkohlakalo; umbilini wabo uyalungisa inkohliso.