Eyokuqala ka‐Samyali 24

₁KWAYE kute, akuba u‐Saule ebuyile ekulandeleni ama‐Filistiya, kwaxelwa kuye ngokuti: Nanku u‐Davide entlango yase‐Hene‐gedi. ₂Wandula u‐Saule watabata amadoda anyuliweyo angamawaka matatu kubo bonke o‐Sirayeli, waya ukumfuna u‐Davide namadoda ake pezu kwelwalwa zamagogo. ₃Wada wafika ezibayeni zegusha ngasendleleni, apo ubukona umqolomba; waza wangena u‐Saule ukugubungela inyawo zake. Kekaloku u‐Davide namadoda ake bahlala emacaleni omqolomba. ₄Aza amadoda ka‐Davide ati kuye: Nangu umhla uyehova wati ngawo kuwe: Bona ke, ndiya kunikela utshaba lwako esandleni sako, uze wenze kulo njengokulungileyo emehlweni ako. Wesuka u‐Davide, watsheca kakuhle isondo lengubo ka‐Saule. ₅Kwaye kute emveni kwoko, ukuba intliziyo ka‐Davide yambeta, ngenxa yokuba ebetshecile isondo lengubo ka‐Saule. ₆Wayesiti kumadoda ake: Ubunzima mabube kum buvela kuyehova, ukuba ndiyenza lento kwinkosi yam, kumtanjiswa kayehova, yokuba ndisolule isandla sam ngakuye! ngokuba engumtanjiswa kayehova yena. ₇Kwa njalo u‐Davide wakalimela amadoda ake ngamazwi lawo, engawavumelanga ukuba asukele ngakuye u‐Saule. Wada u‐Saule wesuka emqolombeni, wahamba endleleni.

₈Wesuka no‐Davide emveni kwoko, wapuma emqolombeni, wamemeza emva kwo‐Saule, esiti: Nkosi yam, kumkani! Wati akukangela u‐Saule emva kwake, watoba u‐Davide ngobuso ngasemhlabeni, waziqubuda. ₉Wayesiti u‐Davide ku‐Saule: Yinina ukuba upulapule amazwi abantu, besiti: Nanku u‐Davide efuna ilishwa lako? ₁₀Bona ke, kwa namhla nje amehlo ako abonile okokuba uyehova wakunikela namhla esandleni sam emqolombeni; kwaye kutiwa mandikubulale; kodwa iliso lam belinosizi pezu kwako; ndandisiti: Andiyi kusolula isandla sam ngakuyo inkosi yam; ngokuba ingumtanjiswa kayehova. ₁₁Kanjalo, bawo! kangela, ewe, kangela isondo lengubo yako esandleni sam; ngokuba ngokutsheca kwam isondo lengubo yako, ndingakubulalanga nje, yazi ubone ukuba akuko esandleni sam inkohlakalo nesilandu, nokuba andonanga ngakuwe; noko wena uyazingela umpefumlo wam, ukuba uwususe. ₁₂Uyehova uya kugweba pakati kwam nawe, ewe uyehova uya kundipindezelela kuwe; kodwa isandla sam asiyi kuba ngakuwe; ₁₃njengokuba usiti umzekeliso wabakudala: Inkohlakalo iyapuma kubakohlakeleyo; kodwa isandla sam asiyi kuba ngakuwe. ₁₄Upumile emva kwobanina ukumkani wo‐Sirayeli? uyaputuma wena emva kwobanina? emva kwenja efileyo! emva kwentakumba inye! ₁₅Ngako uyehova makabe ngumgwebi, agwebe pakati kwam nawe, abone, apikise upikiso lwam, andikulule esandleni sako.

₁₆Kwaye kute, nxa u‐Davide abegqibile ukuteta lamazwi ku‐Saule, wandula u‐Saule wati: Lilizwi lako na eli, nyana wam Davide? Waza u‐Saule wapakamisa ilizwi lake, walila. ₁₇Wayesiti ku‐Davide: Wena undigqitisile ngobulungisa; ngokuba wena undivuzile ngokulungileyo, kanti mna ndikuvuzile ngokukohlakeleyo. ₁₈Kanjako wena uxelile namhla okokuba undenzele okulungileyo; ekubeni uyehova ebendiyekelele esandleni sako, kodwa akundibulalanga. ₁₉Ngokuba nxa indoda ilufumeneyo utshaba lwayo, iya kulundulula ngendlela elungileyo na? Ngako uyehova makabuyekeze kuwe okulungileyo ngenxa yoko ukwenzileyo kum namhla nje. ₂₀Nakaloku, bona ke, ndiyazi ngenyaniso ukuba woba ngukumkani, nokuba ubukumkani bakwa‐Sirayeli buya kuma esandleni sako. ₂₁Ngako kaloku ndifungele uyehova ukuba akuyi kunqamla inzalo yam emva kwam, nokuba akuyi kutshabalalisa igama lam kuyo indlu kabawo. ₂₂Wandula u‐Davide wafungela u‐Saule. Wasuka u‐Saule wagoduka; kodwa u‐Davide namadoda ake benyukela enqatyeni.