ZAKARIA 3

₁Ndi hone a tshi ntsumbedza Joshua tshifhe muhulu o ima phanḓa ha muruṅwa wa Muṋe washu, Saṱhane ó ima thungo ya tshauḽa tshawe uri a mu pomoke. ₂Muṋe washu a amba na Saṱhane a ri, “Nṋe Yahavee ndi a u kaidza iwe Saṱhane! Nṋe Yahavee ane nda funa Jerusalema ndi a u kaidza! Uyu munna a si luhuni lu khou dugaho lwe lwa fungulwa muliloni naa?”

₃Joshua o vha o ima phanḓa ha muruṅwa wa Muṋe washu o ambara zwiambaro zwa tshika. ₄Muruṅwa a amba na vhe vha vha vho ima phanḓa hawe a ri, “Mu bvuleni zwiambaro zwa dzitshika.” Ndi hone a tshi amba na Joshua a ri, “Vhona, ndo u rula milandu yau, ndi ḓo u ambadza zwiambaro zwa maṱeleṱele.”

₅Nṋe nda ri, “Ṱhohoni mu ambadzeni muṅadzi u si na tshika.” Ndi hone vha tshi mu ambadza muṅadzi u si na tshika, vha mu ambadza zwiambaro, muruṅwa wa Muṋe washu ó ima henefho tsini.

₆Muruṅwa wa Muṋe washu a laya Joshua a ri,

₈“ ‘Iwe Joshua tshifhe muhulu thetshelesa, na avha vhotshifhe nga iwe vhane wa vha navho ndi vhavhulungi vha tshiga tsha zwithu zwi kha ḓi ḓaho, zwauri ndi ḓo ḓisa muḓinḓa wanga a no pfi Ḓadzwane ḽa Dafita. ₉Vhonani tombo ḽe nda ḽi vhea phanḓa ha Joshua! Tombo ḽeneḽo ḽa u thoma-thoma ḽi ḽavheleswa nga maṱo maṱanu na mavhili. Ndi ḓo phula tshisima khaḽo. Ndi ḓo rula milandu ya shango heḽino nga ḓuvha ḽithihi fhedzi, Nṋe Yahavee Mulangazwoṱhe.

₁₀“ ‘Musi wonoyo muṅwe na muṅwe waṋu u ḓo vhidza muhura wawe uri a ḓe a dzule fhasi ha munḓirivhe wawe na muhuyu wawe,’ hu amba Yahavee Mulangazwoṱhe.”