VHUṰALI 9

₁Mudzimu wa vhokhotsi ashu,

Muṋe washu wa khathutshelo,

Iwe wo vhumbaho zwithu zwoṱhe nga ipfi ḽau,

₂wa vhumba na muthu nga vhuṱali hau

uri a vhuse zwivhumbwa zwe wa zwi sika,

₃a lange shango e mukhethwa a tshi ita zwi re zwone,

a haṱule nga mbilu i fulufhedzeaho

a sa piringanyi khaṱhulo,

₄nṋee vhuṱali,

vhu thukhaho kha khuluṋoni yau,

u songo nndandula

nda si tsha vha muṅwe wa vhana vhau.

₅Ndi phuli yau,

ndi ṅwana wa phuli yau ya musadzi,

ndi muthu a shayaho nungo,

a thi nga lalami,

a thi ṱalukanyi khaṱhulo na milayo.

₆Vhukuma

nangwe vhukati ha vhana vha vhathu

ha nga wanala muthu a re muvhuya o khunyelelaho,

hone arali a tshi shaya vhuṱali vhu bvaho kha Iwe,

u ḓo vha a si tshithu.

₇Iwe wo nnanga

uri ndi vhuse vhathu vhau,

ndi haṱule vhana vhau vha vhatuka na vha vhasidzana.

₈Wo nndaya wa ri ndi fhaṱe thembele thavhani yau khethwa,

na aḽiṱari fhano muḓini hune wa dzula hone.

Ndi tshifanyiso tsha dennde khethwa

ye wa i dzudzanya tsha kale na kale.

₉Zwino Iwe u dzula na vhuṱali,

vhu ḓivha mishumo yau,

ho vha vhu hone zwiḽa u tshi sika shango,

hone vhu ṱalukanya zwine zwa takadza maṱo au,

na zwine zwa elana na milayo yau.

₁₀Vhu rume

vhu tshi bva ḽiṱaḓuluni ḽau ḽikhethwa,

vhu ḓise vhu tshi bva kha khuluṋoni yau ya vhugala,

uri vhu vhe na nṋe vhu shume na nṋe,

ndi kone u ḓivha zwine zwa u takadza,

₁₁ngauri vhu ḓivha zwithu zwoṱhe ha zwi ṱalukanya;

vhu ḓo nnyendedza nga vhusedzi kha zwine nda ita,

ha nndinda nga vhugala haho.

₁₂Ndi hone u tshi ḓo takalela zwoṱhe zwine nda ita,

nda ḓo kona u haṱula vhathu vhau ndi sa ṱaluli,

nda vha o fanelaho khuluṋoni ya khotsi anga.

₁₃Muthu wa ṋama

ane a ḓivha mihumbulo ya Mudzimu ndi nnyi?

Ndi nnyi ane a nga kona u vhona zwine Muṋe washu a zwi funa?

₁₄Hufha kuhumbulele

kwa vhathu vha ṋama ku kwa mahandana,

ngelekanyo dzashu dzi tshi thenga-thenga.

₁₅Mimuya yashu i ziamedzwa nga mivhili i sinaho,

mushasha uyu wa vumba

u lemela muhumbulo nga u ṱolou ḽa mbilu.

₁₆Zwi re shangoni na zwone zwi ri konḓela u zwi anganya;

na zwine ra zwi swikela zwi a ri konḓela u zwi wana,

huno zwi re ḽiṱaḓulu zwi nga ṱoṱoredzwa nga nnyi?

₁₇Ndi nnyi we a vha a tshi nga vhuya a ḓivha mihumbulo yau arali u songo mu ṋea Vhuṱali,

wa rumela Muya Mukhethwa wau a tshi bva ṱaḓulu?

₁₈Nḓila dza vha re shangoni dzo onyoloswa nga u ralo,

vhathu vha guda zwine zwa u takadza,

vha tshidzwa nga hone vhuṱali.