VHUṰALI 5

₁Ndi hone muvhuya

a tshi ḓo livhana

na vhakandeledzi vhawe

vhe vha nyadza u tambula hawe,

a ima phanḓa havho a sa ofhi.

₂Vha ḓo mu vhona

vha tetemela nga nyofho khulu,

vha akhamala

vha tshi vhona uri o tshidzwa zwí songo lavhelelwa.

₃Vha ḓo ḓisola

vha gomela vha fhihamelwa,

vha vhudzana vha ri,

₄“Ro vha ri matsilu!

Ngoyu muthu uḽa

we ra vha ri tshi ḓi mu kolela ra mu sema.

Ro vha ri tshi ri

kutshilele kwawe ndi tshipengo,

ra ri lufu lwawe lu a nyadzea.

₅Edzonu vhona, u vho vhalwa na vhana vha Mudzimu!

O wana mukovhe kha vhakhethwa!

₆Vhukuma riṋe ro pambuwa nḓilani ya ngoho,

a ro ngo vhonetshelwa nga tshedza tsha vhuvhuya,

ḓuvha a ḽo ngo ri ṱavhela.

₇A hu na nḓila ya vhuvhi na ndozwo ye ra si tshimbile ngayo;

ro tshimbila phangani dzi si na nḓila,

hone nḓila ya Muṋe washu a ro ngo vhuya ra i ḓivha.

₈U ḓihudza hashu ho ri farisani?

Lupfumo lwe ra vha ri tshi lu ṱongisa lwo ri ṋeani?

₉Zwoṱhe zwo fhira sa murunzi wa gole,

unga phungo i fhiraho nga luvhilo,

₁₀sa tshikepe

tshi buḓekanyaho maḓi a gabaho,

tshi sa sii vhuṱala he tsha fhira,

ha si vhonale nḓila ya muteo watsho kha magabelo.

₁₁Zwi ḓi nga tshiṋoni

tshi tshi khou fhufha muyani

hu si sale tsumbo ya nḓila yatsho;

tshi sokou tshea muya nga phapha dzatsho,

tsha fhufha tshe purrr,

tsha u swiela nga phapha dzatsho,

hone musi tsho fhira

a tshi sii tshiga tsha nḓila yatsho.

₁₂Zwi ḓi nga musi musevhe wo poswa kha tshipfulwa,

muya wo fhandekanywaho

wa mbo ḓi ṱangana hafhu kathihi,

ha si vhe na a no vhona nḓila ye wa fhira ngayo.

₁₃Riṋe-vho ro ralo:

ro bebwa,

ra sokou tshenuwa ri si tsheeho,

ha si sale na tshivhuya tshine ra nga sumba;

tshashu ro ḓilozwa nga vhuvhi hashu.”

₁₄Ee, zwe vhavhi vha zwi lavhelela

zwi nga mungu wo hwalwaho nga ḓumbu,

zwi nga khuli i hwalwaho nga muya;

zwi balanganywa nga maḓumbu unga vhutsi,

zwi nga mueni ane a ḓa

a dzula ḓuvha ḽithihi;

ha humbulwi.

₁₅Hone vhavhuya vha tshila lini na lini,

pfufho yavho i na Muṋe washu,

vha londolwa nga Waṱaḓuluṱaḓulu.

₁₆Zwenezwo Muṋe washu u ḓo vha ṋea khare ya vhugala na muṅene wa lunako;

u ḓo vha pilela nga tshanḓa tshawe tshauḽa,

a vha tsireledza nga tshishasha tshawe.

₁₇Muṋe washu u ḓo dzhia lufuno lwawe

lu sa tendi mudzimu muṅwe,

lwa vha philelo yavho;

u ḓo ṱama tsiko yawe nga zwihali

ya lwa na maswina;

₁₈u ḓo fuka khaṱhulo mbuya

ya vha tshipilakhana,

nguwane ya vha khaṱhulo i sa ṱaluli;

₁₉u ḓo dzhia vhukhethwa

ha vha tshiṱangu tshi sa phulei,

₂₀a ṱuṱula mbiti dzawe dzi sa khathutsheli

dza vha banga,

tsiko yoṱhe i ḓo ima nae

ha lwiwa na maswina awe a mahwarahwara.

₂₁Misevhe ndi dziphenyo,

dzi ḓo fhufha dzo livha he dza poswa

dzi tshi bva makoleni

dza nga dzo poswa nga vhura ho akhiwaho tshoṱhe.

₂₂Hu ḓo poswa matombo a tshifhango

ó fura mbiti,

a nga a bva kha gatho.

Maḓi a lwanzhe a ḓo vha sinyutshela,

milambo ya vha kumba i sa khathutsheli;

₂₃ḓumbu ḽa maanḓa ḽa vha vutshela,

ḽa vha fhefherela kule sa mungu

wo hwalwa nga tshiḓumbumukwe.

Vhuvemu

vhu ḓo phusukanya ḽifhasi ḽoṱhe nga u ralo,

vhutshinyi vhu ḓo tekula khuluṋoni dza vha maanḓa.