VHUṰALI 18

₁Huno vhakhethwa vhau

vho vha vhe na tshedza tshihulu.

Vhaegipita vho pfa maipfi avho

hone vha si vha vhone,

vha ri vha na mashudu

nge vha si tambule-vho unga vhone,

₂vha vha livhuha nge vha si ḓilifhedzele

zwe vhone vha ranga u vha tambudza,

vha vha humbela uri vha vha hangwele zwa vengo ḽa kale.

₃Huno vhathu vhau a vho ngo tshimbila swiswini,

wo vha ṋea phuphu ya khavhu ya mulilo

ya vha tsumbanḓila lwendoni lu sa ḓihwi,

na ḓuvha ḽi si vha fhise musi vhe nḓilani vhó luma mbilu nga u ralo.

₄Hone maswina avho

zwo vha zwo vha fanela u dzimelwa tshedza,

vha hoṋelwa swiswini;

hufha vhone vho hoṋela vhana vhau dzhele

vhenevho vhe shangoni

vha ḓisa tshedza tshi sa dzimi tsha mulayo.

₅Vhunga Vhaegipita vho elekanya

u vhulaha tshetshe dza vhakhethwa vhau,

ha tshidzwa mutukana muthihi fhedzi

wa vhoṱhe vho laṱwaho nnḓa,

Iwe wo vha ṱungufhadza

wa hwala gogo ḽa vhana vhavho

wa ṱuwa navho,

wa vha lozwa vhoṱhe nga muḓalo wa maḓi.

₆Vhusiku uho ho dzula ho ḓihwa nga vhokhotsi ashu,

uri vha ḓivhe we vha mu fulufhela

vha vhe na ngoho ya zwe a vha fulufhedzisa.

₇Vhathu vhau vho vha vho lindela u tshidzwa ha vhavhuya

na u lozwiwa ha maswina avho,

₈ngauri musi u tshi ṱungufhadza maswina ashu,

ho vha hu u hulisa riṋe

nga u ri vhidza ra vha vhau.

₉Ngauralo vhana vhakhethwa vha vhavhuya

vho ṋekedza tshiṱhavhelo vho dzumbama,

vha tenda mazha mulayo uyu mukhethwa

wa uri vhakhethwa vhau

vha kovhekane zwoṱhe nga u eḓana –

zwivhuya na phanzi.

U ralo vha mbo ḓi imba thendo dza vhokhotsi avho.

₁₀Hone ha fhindula mukosi

wo vilinganaho wa maswina avho,

tshililo tshi ṱungufhadzaho

tsha u lilela vhana vhavho tsha pfala kule.

₁₁Phuli na muṋe wayo

vha ṱungufhadzwa nga ṱhamu nthihi,

vhathu zwavho na khosi vha tambudzwa u fana.

₁₂Vhoṱhe vha fa lufu lu fanaho,

vha vha na vhafu vha si na mbalo.

Vhapenyu vho vha vha songo eḓana u vha swiṱa,

nge vhana vhavho vhavhuḓisa vha lozwiwa vhoṱhe kathihi.

₁₃Vhaṅwe vho ḓitika

nga musika na phamba,

vha si tende uri zwi ḓo vha wela,

hone vha tshi vhona matanzhe o fa,

vho tenda uri Israele ndi ṅwana wa Mudzimu.

₁₄Ḽo vha ḽo lala ho tou tshete,

ha tshenuwa hó no vha vhukati ha vhusiku,

₁₅ipfi ḽau ḽa maanḓa oṱhe

ḽa mbo ḓi fhufha ḽi tshi bva makoleni kha khuluṋoni ya vhuhosi,

sa muhali wa tshiṱuhu a tshi ḓa shangoni

ḽe ḽa pfi ḽi tshinyadzwe,

₁₆ó fara banga ḽa vhuhali ḽa ndayo yau i sa khakhisi.

Ipfi ḽau ḽa ima,

ḽa ḓadza hoṱhe-hoṱhe nga lufu,

ḽa swika makoleni ḽó ima fhano fhasi.

₁₇Kathihi fhedzi vha mbo ḓi welwa nga nyofho

nga mabono a miloro i ofhisaho ye vha i vhona,

vha sokou ofha

zwe vha vha vha songo zwi lavhelela;

₁₈vha poswa fhasi

vha tou hasekana na mavu vhó dzidzivhala,

muṅwe na muṅwe a tshi ḓivha

uri u felani,

₁₉ngauri miloro ye ya vha dina

yo vha yo dzula yo vha sevha,

uri vha sa ḓo fa vha sa ḓivhi uri vha tambulelani.

₂₀Huno na vhavhuya vho ḓi vhona lufu;

vhanzhi-vhanzhi vho lozwiwa phangani.

Hone mbiti idzo dzau a dzo ngo ya thambo,

₂₁ngauri vho phalalwa nga Mushe,

munna a sa solisei.

O vha pfumelela ó fara zwihali

zwa mushumo wawe mukhethwa,

thabelo na tshipfumelo tsha zwioro

a imedzana na mbiti dzau a fhelisa bulayo,

ha vha u sumbedza uri ndi muḓinḓa wau.

₂₂O vha pfumelela, vhuswina ha fhela,

a si kunde nga nungo dza muvhili

kana nga maanḓa a pfumo,

o kunda Mulifhedzi nga zwe a amba,

nga u mu humbudza milanga

ye Mudzimu a anela vhokhotsi ashu.

₂₃O wana zwitumbu zwo no ḓi rambalala zwo khokhana,

a mbo ḓi dzhenelela a humisa ṱhamu,

a i thivhela nḓila

ya si tsha swika kha vha tshilaho.

₂₄Vhukuma kha khanzu yawe ndapfu ho vha ho ṅwalwa shango ḽoṱhe,

madzina a vhugala a vhokhotsi ashu

o vha o koriwa kha matombo a miduba miṋa,

vhugala hau vhu kha khare i re ṱhohoni yawe.

₂₅Mulozwi o ri u vhona madzina ayo,

a a ofha a huma.

Vho ri u vhona ndifhedzo luthihi

zwa vha zwo eḓana.