VHUṰALI 12

₁Muya wau u sa lovhi

u kha zwithu zwoṱhe!

₂Ndi zwine wa laṱisa vhatshinyi

nga zwiṱuku nga zwiṱuku, wa vha kaidza,

wa vha humbudza zwine vha tshinya,

uri vha ṱutshele vhuvhi havho,

vha fulufhele Iwe Muṋe washu!

₃Vhukuma, vhadzuli vha kale vha shango ḽau ḽikhethwa

₄wo vha vhengela zwiito zwavho zwi nengisaho, na vhuloi havho,

na maluvhele a si makhethwa.

₅Idzo phondi dza vhushie,

madyavhathu vha u ḽa mala

na ṋama dza vhathu, na malofha,

vhe vha tshinya nga mahoro avho a tshidzumbe,

₆vha vhulaha vhana vhavho vha sa koni u ḓilwela!

Iwe wo tou funa u vha lozwa

nga zwanḓa zwa vhokhotsi ashu,

₇uri shango iḽi ḽine wa ḽi funa u fhira oṱhe

ḽi dzule vhana vha Mudzimu vha ḓivhaleaho.

₈Hone na vhenevho, vhunga vhe vhathu,

a wo ngo vha itela tshiṱuhu,

tshau wo rumela mabu

a rangela mmbi yau

uri a vha lozwe nga zwiṱuku nga zwiṱuku.

₉A si uri wo vha u si na maanḓa a u vha kumedza vhavhuya

vha lozwa vhavhi nndwani,

kana vha swielwa nga zwivhanda kathihi fhedzi

kana nga ipfi ḽau ḽa vhuhali.

₁₀Hone u tshi vha haṱula nga zwiṱuku nga zwiṱuku,

wo vha ṋea tshifhinga tsha uri vha laṱe.

Wo vha u tshi zwi ḓivha uri tsiko yavho ndi mmbi,

na uri vhuvhi havho ndi ha u mamela,

na uri nzulele yavho i nga si shanduke,

₁₁ngauri ndi lushaka lwo dzulaho lwo teketelwa

u bva mathomoni.

Musi u tshi vha hangwela vhutshinyi ho vha hu si nga u ofha muthu muṅwe.

₁₂Ndi nnyi ane a nga u sengisa a ri, “Wo itani?”

kana a sola khaṱhulo yau?

Musi tshakha dzi tshi lovha,

ane a nga sengisa Iwe Muvhumbi wadzo ndi nnyi?

Ndi nnyi ane a nga ḓa phanḓa hau

a vha musengeli wa vhavhi?

₁₃Hufha hu si na mudzimu muṅwe

arali e si Iwe Mulondoli wa vhoṱhe,

ane wa fanela u mu sumbedza uri khaṱhulo yau a yo ngo khakha.

₁₄Nahone a hu na khosi kana muvhusi ane a nga kona u imedzana na Iwe

a tshi lwela vhe wa vha ṱungufhadza.

₁₅Vhunga Iwe u muvhuya,

u vhusa zwithu zwoṱhe u sa khakhi;

u vhona u laṱa muthu a si na mulandu zwi songo fanela maanḓa au.

₁₆Maanḓa au ndi tshisima

tsha vhuvhuya hau ha u tshidza vhathu,

u vhusa hau zwithu zwoṱhe hu ita

uri u si itele muthu na muthihi tshiṱuhu.

₁₇Maanḓa au u a sumbedza avho fhedzi

vha sa tendi maanḓa au a si na mugumo,

nahone vhane vha a ḓivha

u vha kaidzela lunyadzo.

₁₈Hone a u vha lifhedzi nga maanḓa au oṱhe,

u haṱula nga khathutshelo;

u ri vhusa u tshi ri konḓelela zwihulu,

ngauri wa vhuya wa tou zwi funa, maanḓa au a mbo ḓi shuma.

₁₉U tshi ita nga u ralo, ho vha hu u laya vhathu vhau,

wa vha funza uri muvhuya a vhe na vhuthu,

wa ṋea vhana vhau fulufhelo ḽa uri naho vho tshinya

u ḓo vha ṋea muya wa u shanduka.

₂₀Hufha na maswina a vhalanda vhau

wo vha ṋea tshifhinga tsha u laṱa vhuvhi havho,

naho vho vha vho livhana na lufu,

₂₁zwino vhana vhau

vhe wa ṋea vhokhotsi avho milanga nga miano,

wa vha fulufhedzisa zwingafhongafho,

vhone u ḓo vha haṱula nga vhusedzi vhungafhani!

₂₂Zwino u tshi lifhedza maswina ashu u sa kaluli,

ndi u ri laya uri riṋe ri tshi haṱula ri songo hangwa vhuthu hau,

na uri musi ri tshi haṱulwa ri lavhelele khathutshelo.

₂₃Ndi zwe wa tambudza avho vhavhi

vha kutshilele kuvhi kwa vhutsilu,

wa vha vhaisa nga hone vhuṱudzi havho.

₂₄Vho vha vho pambuwa vha esa kule

vhó fara nḓila dza u khakha,

vha dzhia zwone zwipuka zwi nengisaho zwi nyadzeaho

vha zwi ita midzimu,

vha fhurwa unga vhushie vhu si na maano.

₂₅Ndi zwe wa vha rumela khaṱhulo dzau

vha vhonala vhe matsilu,

dza nga dzo wela vhana vha si na maano.

₂₆Hone vhe vha si londe ṱhamu ya u vha goḓa,

vho mbo ḓi wana khaṱhulo yo sumbedzaho uri Mudzimu ha khakhi:

₂₇Zwipuka zwenezwiḽa zwe vha zwi ita midzimu,

ndi zwone zwe wa vha lifhedza ngazwo,

zwa vha tambudza, vha vho bonyolowa

vha vhona zwine zwa vha zwone,

vha ri zwi ṱuwe!

Onouḽa we vha ḓi mu landula

vha vhona e Mudzimu wa ngoho.

Ndi zwe vha welwa

nga khaṱhulo yavho ya u fhiledza.