VHUṰALI 11

₁Vhuṱali ho pfumbisa

mishumo yavho

nga Mushe, muporofita mukhethwa.

₂Vho tshimbila

vha buḓekanya phanga i sa dzuli muthu,

vha akha dennde dzavho

fhethu hu sa tshimbili muthu.

₃Vho imedzana na maswina avho,

vha lifhedza vhatovholi vhavho.

₄Musi vha tshi pfa ḓora vho vhidzelela Iwe,

vha ṋewa maḓi a tshi gubunyea kha tombo,

vha dzimula ḓora nga maḓi

a tshi bva kha lutombo lu konḓaho.

₅Ngauralo zwithu

zwe maswina avho a laṱiswa ngazwo,

zwo tshidza vhone vhe khomboni.

₆Maswina avho o vha e na mulambo fhedzi wo dzikuswaho

nga matope na malofha a sa xi,

₇i ṱhamu yavho ya u vhulaha dzitshetshe,

hone vhathu vhau wo vha ṋea maḓi manzhi

vhá songo zwi lavhelela.

₈Wo tou thoma u sumbedza nga ḓora ḽe ḽa vha ḽo vha fara

uri wo lifhedza maswina avho

nga ṱhamu nngafhani.

₉U tshi vha tambudza

ho vha hu u tou vha laya nga lufuno,

vha zwi vhona zwe vhavhi vha tambudzwa u tshi vha haṱula wo sinyuwa,

₁₀hu uri vhone wo vha linga sa khotsi a tshi kaidza,

hone vhavhi wo vha sengisa

sa khosi ya tshiṱuhu i tshi haṱula.

₁₁Vha re kule na vha re tsini,

vhoṱhe vho pfiswa vhuṱungu.

₁₂Vho ṱungufhala luvhili vha tshi khou gomela

vha tshi humbula zwo iteaho,

₁₃nge vha pfa uri

vhavhuya vho vhuelwa nga u tambula havho,

vha zwi ḓivha uri zwo itwa nga Muṋe washu.

₁₄Munna uyo we kale vha mu nzhonzhowedza vha mu landula,

vha fhedza vha tshi mu tama,

vhunga ḓora ḽavho

ḽo vha ḽi sa ngi ḽa vhavhuya.

₁₅Iwe wo vha lifhedza

nga u vha rumela sambi ḽa zwiḓula,

zwipuka zwi si na mihumbulo,

u tshi vha lifhedzela

mihumbulo yavho mivhi ya vhutsilu

ye ya vha xedza

vha luvha ṋowa dzi si na mihumbulo

na zwikhokhonono zwi nyadzeaho,

₁₆uri vha ḓivhe uri muthu u lifhedzwa

nga zwenezwo zwithu zwine a tshinya ngazwo.

₁₇Vhukuma tshanḓa tshau tsha maanḓa oṱhe

tsho sikaho shango nga zwi si na tshivhumbeo,

tsho vha tshi sa kundwi u vha rumela sambi ḽa dzibiara kana dzindau dzi ofhisaho,

₁₈kana zwivhanda zwi sa ḓihwi zwa vhuhali

zwine zwa kha ḓi bva u sikwa,

zwi tshi bvisa mufemo wa mulilo

kana zwa bvisa buluvhutsi ḽi nukhaho,

kana zwa bvisa ṱhase dzi ofhisaho maṱoni azwo.

₁₉Zwo vha zwi tshi nga vha lozwa tshoṱhe nga vhuhali hazwo,

kana vha fa nga nyofho

nga u tou vhona u ofhisa hazwo fhedzi.

₂₀Zwi si izwo fhedzi;

ndifhedzo ya Mudzimu yo vha i tshi nga vha lozwa

nga u tou vha vhudzula fhedzi, vha swielelwa kule

nga mufemo wa maanḓa a Mudzimu.

Hone Iwe wo dzudzanyela zwoṱhe

muelo na tshivhalo na tshileme.

₂₁Nungo dzau khulu Iwe u dzula u nadzo,

ane a nga konḓelela maanḓa a tshanḓa tshau ndi nnyi?

₂₂Vhukuma, maṱoni au shango ḽoṱhe

ḽi nga shotha ḽa ṅwando u tshi wela fhasi;

a ḽi dzinginyisi tshikalo.

₂₃Naho zwo ralo u khathutshela vhoṱhe, ngauri u Ramaanḓaoṱhe,

u tshi vhona vhutshinyi ha vhathu u tsinya iṱo

wa vha ṋea tshifhinga tsha u shanduka.

₂₄Vhukuma

u funa zwithu zwoṱhe zwi re hone,

a u nyali na tshithihi tshe wa tshi vhumba,

ngauri tshine wa tshi vhenga,

wo vha u tshi ḓo vha ú songo tshi vhumba.

₂₅Tshithu tsho vha tshi tshi ḓo dzula tshi hone hani,

arali Iwe u sa zwi funi,

kana tsha londolwa,

arali tshi songo pfi tshi vhe hone nga Iwe?

₂₆Aiwa nandi Muṋe washu,

Iwe u vhulunga zwithu zwoṱhe,

ngauri ndi zwau, u mufuni wa vhutshilo!