VHUṰALI 1

₁Inwi vhane na vhusa ḽifhasi,

ni songo funa zwa u hoya,

humbulani Muṋe washu nga nḓila yone-yone,

ni mu ṱoḓe

nga mbilu dzi si na vhufhura;

₂u wanwa nga vha sa mu lingi,

u ḓivhonadza kha vha sa timatimi.

₃Hone mihumbulo i sa ḓivhalekani

i fhandekanya muthu na Mudzimu,

ane a linga maanḓa awe u ḓo dzumbululwa

ha vhonala vhutsilu hawe.

₄Vhuṱali a vhu dzheni

kha muya wa muitazwivhi na kathihi,

a vhu dzuli muvhilini u re phuli ya vhutshinyi.

₅Muya mukhethwa wa u ri laya

u shavha vhufhura,

u ṱutshela ngelekanyo dza vhutsilu,

a u dzuli na tshi re tshivhi.

₆Vhuṱali ndi muya wa vhuthu,

hone a vhu litshi munyefuli

á songo laṱiswa;

Mudzimu ndi ṱhanzi ya zwa ngomu hau,

ndi Ene muṱoli wa mbilu yau,

a hu na tsho mu dzumbamaho,

a hu na ipfi ḽine a si ḽi pfe.

₇Muya wa Muṋe washu u ḓadza ḽifhasi,

u katela zwoṱhe,

u ḓivha zwine muthu a amba.

₈A hu na ane a amba mavhi a si ḓihwe;

ṱhamu ya a sa khakhi

a i nga mu pfuki.

₉Tshimbevha

tsha a nyadzaho Mudzimu

tshi ḓo sedzeswa,

maipfi awe a ḓo pfala ha Muṋe washu,

uri a laṱiswe vhukhakhi hawe.

₁₀Hu na nḓevhe i sa tendi vhuvhi

i no pfa zwithu zwoṱhe,

wa gungula ha kundwi u zwi pfa.

₁₁Zwino thanyelani u sokou gungula,

u lange lulimi lwau lu si sasaladze;

naho wa hevhedza wo dzumbama

a u nga shai ṱhamu,

mulomo wa mazwifhi u lozwa muya.

₁₂U songo ḓiṱulela lufu

nga kutshilele kwau kwo kombamaho,

u songo ḓilozwa nga zwine wa ita;

₁₃Mudzimu ho ngo ita lufu,

ha takaleli u lozwa vha tshilaho;

₁₄Zwithu zwoṱhe

ho ngo zwi vhumbela u lovha,

o zwi vhumba uri zwi vhe hone,

zwivhumbwa zwi re ḽifhasini

zwi na vhutshilo khazwo,

a zwi na mulimo u lozwaho.

Lufu a lu vhusi ḽifhasini,

₁₅ngauri vhuvhuya a vhu fi.

₁₆Vhavhi ndi vhone vhe vha ṱula lufu

nga zwine vha amba na zwine vha ita;

vha lu ita khonani,

vha ḓidinela lwone,

vha vhofha mulanga nalwo,

hufha vhe vhalwo.