THOBITHI 6

₁Ndi hone mme awe vha tshi litsha u lila.

₂Thobiasi a takuwa hayani e na muruṅwa, a tshi bva nḓuni mmbwa yawe ya mu sala murahu ya ṱuwa nae. Vha tshimbila ḽa vhuya ḽa kovhela, vha fhaṱa mushasha tsini ha mulambo wa Thigirisi. ₃Zwino Thobiasi a tsela mulamboni u yo ṱamba milenzhe, ha bva khovhe khulu maḓini ya mbo ḓi mu thamutshela, ya linga u mila lwayo lwawe, ene a ṱavha mukosi. ₄Hone muruṅwa a mu vhudza a ri, “Farani khovhe iyo, ni songo i ponyokisa!” Muṱhannga a fara khovhe iyo, a i posa khunzikhunzini. ₅Ndi hone muruṅwa a tshi mu vhudza a ri, “Fhandulani khovhe iyo, ni bvise tshavhuṱungu tshayo na mbilu na tshivhindi, ni zwi vhulunge, ni laṱe vhula. Tshavhuṱungu na mbilu na tshivhindi ndi mishonga.” ₆Muṱhannga uyo a fhandula khovhe iyo, tshavhuṱungu na mbilu na tshivhindi a zwi vhetshela thungo. Ndi hone a tshi ṱhaṱha khovhe iyo a ḽa, ye a sia a i lunga muṋo a ita mbuvha ya lwendo.

₇Ḽi tshi tsha vha tshimbila vha vhuya vha swika tsini na Media. Muṱhannga a vhudzisa muruṅwa a ri, “Wa hashu Azaria, nṋa mbilu ya khovhe na tshivhindi na tshavhuṱungu ndi mushonga wa mini?” ₈Ene a fhindula a ri, “Ri tshi ḓa kha a mbilu ya khovhe na tshivhindi, arali wa zwi fhisa, mutsi wazwo wa dubela muthu o kavhiwaho nga ḽidimoni kana thuṅwa dza Saṱhane, vhulwadze vhu ḓo mu ṱutshela tshoṱhe, a hu na madimoni a no ḓo dovha a vhuelela khae. ₉Zwino tshavhuṱungu, arali wa tshi ḓodza maṱoni a muthu o dzulwaho, wa vhudzula, u ḓo dovha a vhona.”

₁₀Musi vho no dzhena kha ḽa Media, vha tshi vho hovhelela Ekhibathana, ₁₁Rafaele a vhudza muṱhannga uyo a ri, “Wa hashu Thobiasi.” Thobiasi a ri, “Ndi mini?” Rafaele a ri, “Ṋamusi ri ḓo dzula na Reguele shaka ḽaṋu. Reguele u na ṅwananyana a no pfi Sara, ₁₂ha na ṅwana muṅwe. Vhunga inwi ni shaka ḽa Sara ḽa tsinisa, ndi inwi a re na pfanelo ya u mu dzea u fhira vhaṅwe. Thundu ya khotsi awe na yone nga pfanelo ndi ifa ḽaṋu. Zwino musidzana uyo u na ṱhalukanyo, ha ofhi, nahone o nakesa; khotsi awe vha a mu funesa.” ₁₃Rafaele a ri, “Vhunga ni na pfanelo ya u mu dzea, nthetsheleseni wa hashu. Vhusiku vhuno ndi ḓo humbela khotsi a musidzana uri vha ri tendele ri mu wane a vhe muselwa waṋu. Musi ri tshi vhuya ri tshi bva Ragese, ndi hone ri tshi ḓo mu itela vhuṱambo ha mbingano. Ndi a ḓivha uri Reguele a nga si hane ni tshi mu vhinga, hufha a sa ḓo tenda a tshi dzewa nga munna muṅwe, uyo u nga vha mulandu wa ṱhamu ya lufu, hu tshi tevhedzwa mulayo wa Bugu ya Mushe, nahone u a zwi ḓivha uri ndi pfanelo yaṋu uri ni vhe wa u ranga u dzea ṅwananyana wawe. Zwino wa hashu nthetsheleseni: Vhusiku vhuno ri fanela u ambisa musidzana uyo uri a dzewe nga inwi. Musi ri tshi vhuya ri tshi bva Ragese, ri ḓo mu dzhia, ra ṱuwa nae ra mu isa ha haṋu.”

₁₄Huno Thobiasi a hanedza a ri, “Azaria wa hashu, ndo no zwi pfa uri musadzi uyu o no ḓi dzewa luṱanu na luvhili, na uri vhanna vhawe vho fa vha sa athu mu dzhenisa nḓuni. Vhusiku honoho vhune vha sendela tsini nae vha sokou fa. Nahone ndo pfa hu tshi pfi vho vhulahwa nga ḽidimoni. ₁₅Zwino na nṋe ndi a ḽi ofha ḽidimoni iḽo. Ḽidimoni ene a ḽi mu iti tshithu, ngauri ḽi a mu funa, hone ḽi vhulaha munna ane a tama u sendela tsini nae. Nṋe ndi tou vha ṅwana muthihi fhedzi wa khotsi anga, a thi funi u fa. Arali nda fa, khotsi anga na mme anga vha nga ḽa mbilu nga nṋe vha vhuya vha dzhena tshaloni. Nahone a vha na ṅwana muṅwe wa mutuka ane a nga vha swiṱa.”

₁₆Rafaele a fhindula a ri, “Ndayo dza khotsi aṋu a ni tsha dzi humbula naa? Vho ni laya uri ni dzee musadzi a re shaka ḽaṋu. Zwino thetshelesani ndi ni vhudze wa hashu, hangwani zwa ḽidimoni iḽi, ni dzee Sara. Ndi a ḓivha uri vhusiku vhuno ni ḓo mu ṋewa a vha mufumakadzi waṋu. ₁₇Musi ni tshi dzhena rumuni ya muselwa, ni dzhie tshivhindi tsha khovhe na mbilu yayo, ni zwi vhee kha masimbe, ni ite tsemo. ₁₈Hezwi ḽidimoni ḽi tshi tou hambela munukho u no bva khazwo, ḽi ḓo shavha ḽa si tsha dovha ḽa sendela tsini nae. Zwino musi ni tshi ṱoḓou mu dzhenisa nḓuni, vhuvhili haṋu ni thome ni takuwe ni rabele. Ni humbele Muṋe wa ḽitaḓulu uri a ni itele tshilidzi a ni tshidze. Ni songo ofha tshithu, ngauri Sara o vha o dzula o khethelwa inwi shango ḽi sa athu vha hone. Inwi ni ḓo mu lamukisa, nahone u ḓo ṱuwa na inwi. Ndi vhona uri u ḓo ni bebela vhana vha no ḓo tou nga vharathu vhaṋu. Zwenezwo ni songo ḽa mbilu.”

Musi Thobiasi a tshi pfa Rafaele a tshi ri Sara ndi shaka ḽawe, wa lutsinga lwa muṱa wa hawe, a pfa a tshi mu funesa, mbilu yawe ya dzula i khae.