THOBITHI 2

₁Musi hu tshi vhusa Khosi Eshara Hadoni* nda vhuelela hayani hanga, mufumakadzi wanga Ana na murwa wanga Thobiasi vha vhuedzedzwa kha nṋe. Zwino nga vhuṱambo ha Pentekoste, hone vhuṱambo ha Dzivhege, nda bikelwa tshiswiṱulo tshavhuḓi, nda dzula fhasi nda tshingama nda ḽa. ₂Nda dzudzanyelwa ḓafula, musi ndi tshi vhona u anda ha zwiḽiwa zwe nda ṋewa, nda vhudza ṅwananga Thobiasi nda ri, “Thobiasi murwa wanga, ibva u yo ṱoḓa munna wa mushai kha mashaka a hashu vha re fhano vhuthubwani Ninive. Arali a tshi luvha Mudzimu nga mbilu yoṱhe, u vhuye nae uri a ḓe a ḽe na nṋe. Vhukuma ṅwananga, ndi ḓo u lindela wa vhuya wa vhuya.”

₃Thobiasi a bva a yo ṱoḓa shaka ḽa hashu ḽa mushai. Musi a tshi vhuya a ṱavha mukosi a ri, “Baba!”. Nṋe nda mu vhudzisa nda ri, “Ndi mini ṅwananga?” Ene a fhindula a ri, “Baba, muṅwe wa vhathu vha hashu o vhulahwa! O tshipiwa makete, tshitumbu tshawe tsho rambalala henefho.” ₄Nda takuwa nda ima, ndi sa athu vhuya nda swiṱula. Nda hwala mufu uyo afho mukotoni nda mu vhea rumuni iṅwe, uri ndi mu swiṱe ḽi tshi kovhela. ₅Ndi tshi vhuelela hayani, nda ṱamba muvhili, nda ḽa zwiḽiwa zwanga muṱodzi u shamani. ₆Zwa nkhumbudza vhuporofita ha Amusi musi a tshi teketela Bethele a tshi ri,

₈Vhadzulelani vha nkolela, vha ntsola vha ri, “Munna uyu ha tsha ofha? Zwiḽa o vhuya a londiwa uri a vhulahwe nga mulandu wa zwenezwi, a vhuya a shavha, zwino ngoyu u khou dovha u swiṱa vhafu!”

₉Vhusiku honoho nda ṱamba muvhili, nda yo eḓela tsini na murango wa muṱa wanga. Nda si khurumele nge ha vha hu tshi fhisa. ₁₀Ndo vha ndi sa ḓivhi uri hu na ṱhongola murangoni nga nṱha hanga. Maṱoṱo adzo a dudelaho e paṱa maṱoni anga, a tshenuluwa. Nda ya dziṅangani uri ndi lafhiwe, vha tshi shela mishonga yo fhambanaho ha tou vha u ṋaṋisa, nda vhuya nda pofula. Nda fhedza miṅwaha miṋa ndi bofu, mashaka anga oṱhe a ṱungufhala a tshi vhona zwine nda vha zwone. Nangwe zwo ralo, Ahikhara a nndondola ha vhuya ha fhela miṅwaha mivhili, a vhuya a ṱuwa a ya Elimaisi.

₁₁Misi iyo mufumakadzi wanga Ana o vha a tshi ḓi shuma mishumo ya tshisadzi, a luka masila, a tshi wana mali. ₁₂Musi a tshi isa thundu idzo kha vhaṋe vhadzo, vho vha vha tshi mu ṋea malamba. Vhuriha vhu tshi yo fhela Ana a fhedza u luka masila ayo a a isa kha vhaṋe vhao. Vhone vha mu ṋea malamba o fhelelaho, vha ita na u mu ṋea mbudzana ya u ṱhavha. ₁₃Musi a tshi dzhena nḓuni yanga mbudzi ya thoma u lila. Nṋe nda vhidzelela mufumakadzi wanga nda ri, “Mbudzi iyi i bva ngafhi? I songo vha yo tou tswiwa. Nga i vhuedzedzwe kha vhaṋe vhayo, a ri na pfanelo ya u ḽa zwiḽiwa zwo tou tswiwa.” ₁₄Hone Ana a mmbudza a ri, “Ndo tou ṋewa i tshi phaphelela malamba anga.” Nangwe zwo ralo, nda si tende, nda mu vhudza uri a i vhuedzedze kha vhaṋe vhayo. Nda mu ḽela vhuhali. Ndi hone a tshi mphindula a ri, “Mishumo yavho mivhuya ya u tonda vhathu i ngafhi zwino? Nga vha edzou vhona! Zwino ndi hone vho ḓidzumbulula.”