Thobithi a tshi dovha a kona u vhona
1Ndi hone vha tshi takuwa vha fara lwendo vho livha hayani. 2Musi vha tshi vho hovhelela Kaserini, vha sa athu swika Ninive, Rafaele a ri, “Ni a ḓivha uri khotsi aṋu ro vha sia vho tou ita hani. 3Nga ri ṱavhanye ri fhire phanḓa ri sie mufumakadzi waṋu na havha vhaṅwe, ri vhe ri tshi lugisa nnḓu vhoṱhe vha tshee vho sala murahu.” 4Ndi hone vhuvhili havho vha tshi fhira phanḓa, Rafaele a vhudza Thobiasi a ri, “Farani tshavhuṱungu nga tshanḓa.” Mmbwa iḽa ya vha sala murahu.
5Zwenezwo ndi musi Ana o dzula o sedza nḓila ine murwa wawe a ḓo vhuya ngayo. 6Musi Ana a tshi tou mu vhona a tshi khou ḓa, a ṱavha mukosi a tshi vhudza khotsi awe a ri, “Thobiasi murwa wavho ngouḽaa u khou ḓa na munna we a farisana nḓila nae.”
7Vha sa athu swika ha khotsi awe, Rafaele a vhudza Thobiasi a ri, “Ndi na ngoho ya uri khotsi aṋu vha ḓo dovha vha vhona. 8Rothedzani tshavhuṱungu tsha khovhe maṱoni avho. Mushonga uyu u ḓo hwetekanya lukoko lu re maṱoni avho lwa ṋaruwa, ndi hone khotsi aṋu vha tshi ḓo kona u dovha vha vhona tshedza.”
9Ndi hone Ana a tshi gidimela murwa wawe, a mu kuvhatedza, a mu vhudza a ri, “Zwino ndo dovha nda ni vhona ṅwananga, ndi nga ḓi ḓifela zwanga!” Ana a lila. 10Thobithi a vuwa, a dedengela a bvela vanḓani. Thobiasi a ya khavho 11ó fara tshavhuṱungu tsha khovhe, a vha fara a vha tika, a vhudzulela maṱoni avho a ri, “Vha songo fulufhuwa, baba.” 12Huno a rothedza tshavhuṱungu maṱoni avho, a thoma u imanyana. 13Ndi hone Thobiasi a tshi thoma u fara masia oṱhe a maṱo a Thobithi nga zwanḓa zwawe zwivhili a ṋarula lukoko luḽa. Ndi hone Thobithi a tshi vho kona u vhona murwa wawe, a mu kuvhatedza, 14a lila, a ṱavha mukosi a ri, “Ndi khou u vhona ṅwananga, tshedza tsha maṱo anga!” Ndi hone a tshi ri,
“Nga hu rendwe Mudzimu,
dzina ḽawe ḽihulu nga ḽi khoḓiwe!
Nga hu rendwe vharuṅwa vhawe vhakhethwa vhoṱhe.
Dzina ḽawe ḽikhethwa ḽi ḓi rendwa lini na lini!
15Ndi Ene we a nthwa,
ndi Ene we a dovha a mpfela vhuṱungu.
Zwino ndi khou kona u vhona murwa wanga Thobiasi!”
Ndi hone Thobiasi a tshi dzhena muṱani a tshi khou pembela, a tshi renda Mudzimu a tshi tou ṱavha mukosi. Thobiasi a vhudza khotsi awe uri zwo mu nakela lwendoni lwawe na uri o vhuya na siliva iḽa na zwauri o vhinga ṅwananyana wa Reguele, Sara a no ḓo ṱuwa a tshi swika ngauri o vha a tshi vho swika khoroni ya Ninive.
16Thobithi a bva a livha khoroni ya Ninive u yo ṱanganedza mazwale wawe a tshi khou pembela, a tshi renda Mudzimu. Vhathu vha Ninive vha tshi mu vhona a tshi tou hwenya hu si na muthu a no khou mu endedza o mu fara nga tshanḓa, vha akhamala. 17Thobithi a ḓivhadza vhoṱhe vha re henefho zwe Mudzimu a mu pfela vhuṱungu a ita uri a dovhe a vhone. Musi Thobithi a tshi swika hune Sara mufumakadzi wa murwa wawe Thobiasi a vha hone, a mu resha a ri, “Dzhena ṅwananga! Nga hu rendwe Mudzimu wau we a u ḓisa kha riṋe, ṅwananga! Khotsi au na mme au nga vha vhe na mashudu. Thobiasi ṅwananga a vhe na mashudu, na iwe murwa wanga u vhe na mashudu! Fhano ndi hayani hau vhukuma; dzula fhano nga dakalo na mashudu. Dzhena ṅwananga!” Musi uyo wo ḓisela Majuda vhoṱhe vha dzulaho Ninive dakalo. 18Ahikhara na murwa wa mukomana wawe Nadaba na vhone vha ḓa u pembela na Thobithi.
