THOBITHI 1

₁Bugu iyi i ri anetshela mafhungo a Thobithi murwa wa Thobiele, murwa wa Ananiele, murwa wa Aduele, murwa wa Gabaele wa lutsinga lwa Asiele, wa tsinde ḽa Nafuthali. ₂Misi ya muvhuso wa Shalamanesere khosi ya Ashuru, Thobithi o hwalwa a iswa vhuthubwani a tshi bva Thishibe hune ha vha Tshipembe ha Kedeshe wa Nafuthali kha ḽa Galelia Devhula nga nṱha ha Ashere u ela vhukovhela, Devhula ha Tsefathi.

₃Nṋe Thobithi ndo fara nḓila ya ngoho na vhuvhuya vhutshilo hanga hoṱhe. Ndo shuma mishumo minzhi ndi tshi tonda mashaka anga na vha lushaka lwa hashu vhe vha hwalwa na nṋe ra iswa Ninive kha ḽa Ashuru. Musi ndi tshi kha ḓi vha muṱhannga muḓini wa hanga kha ḽa Israele, vha tsinde ḽoṱhe ḽa Nafuthali makhulukuku wanga vho shandukela nnḓu ya Dafita na Jerusalema. ₄Muḓi uyo ndi we Mudzimu a u nanga u woṱhe kha matsinde oṱhe a Israele uri thembele i fhaṱwe henefho, i ṋekedzwe Mudzimu, i vhe vhudzulo hawe, vhoṱhe vha mu ṋekedze zwiṱhavhelo zwavho henefho zwi tshi ya nga mirafho na mirafho i kha ḓi ḓaho. ₅Mashaka anga oṱhe na vhoṱhe vha tsinde ḽa Nafuthali makhulukuku wanga, vho vha vha tshi ṋekedza zwiṱhavhelo zwavho thavhani dzoṱhe dza Galelia vha tshi ita na u zwi ṋekedza mbohwana ye Jerobiamu khosi ya Israele a i vhumba a i vhea muḓini wa Dani.

₆Hone nṋe ndi ndoṱhe ndo vha ndi tshi anzela u ya vhuṱamboni muḓini wa Jerusalema nga he zwa tetshelwa Vhaisraele vhoṱhe nga ndayo ya lini na lini, nda isa mitshelo ya u ranga ya tsimuni na matanzhe a zwifuwo na tshafumi tsha zwe nda lima na vhukuse ha nngu ha u ranga, ₇nda zwi ṋea vhaphrista, vhana vha Aroni, aḽiṱarini. Vhalivi vha shumelaho Mudzimu Jerusalema ndo vha ndi tshi vha ṋea tshafumi tsha zwiliṅwa zwa thoro, waini, mapfura a muolivi, magranada, mahuyu, na mitshelo miṅwe. Arali hu si ṅwaha wa Sabatha, ndo vha ndi tshi rengisa tshafumi tsha vhuvhili nda hwala mali ya hone nda isa Jerusalema nda renga zwiḽiwa zwa kovhiwa. ₈Huno ṅwaha muṅwe na muṅwe wa vhuraru, nduvho idzo ndo vha ndi tshi dzi ṋea tsiwana na tshilikadzi na vho rembuluwaho vha ḓibaḓekanya na Vhaisraele, ra ḽa ri tshi tevhedza mulayo wa Mushe na ndayo dza Dibora makhulu wanga vho bebaho khotsi anga Thobiele, ngauri musi khotsi anga vha tshi tshinyala, vho ntsia ndi tsiwana.

₉Musi ndo no vha munna, ndo vhinga Ana, musadzi wa lutsinga lwa hashu, a mmbebela murwa we nda mu rina ḽa Thobiasi. ₁₀Zwino musi ndo no hwalwa nda iswa vhuthubwani kha ḽa Ashuru, nda swika Ninive, vha hashu vhoṱhe vha ḽa zwiḽiwa zwa vhannḓa, ₁₁hone nṋe nda ḓiilisa u ḽa zwiḽiwa zwo raloho, ₁₂nge nda dzula ndi tshi elelwa Mudzimu nga mbilu yanga yoṱhe. ₁₃Ndi zwe Waṱaḓuluṱaḓulu a ntakalela a ita uri Shalamanesere a tshi ntsedza a vhone ndi tshi mu takadza, nda vha muḓinḓa wa u renga zwoṱhe zwine a zwi ṱoḓa. ₁₄Ndo vha ndi tshi ḓi anzela u ya Media u yo mu rengela thundu a vhuya a dzama. Ndo ita na u vhulunga mikhwama yo pangwaho siliva i no eḓana thalennde dza fumi. Nda i sia na shaka ḽanga Gabaele, murwa wa Gabri we a vha a tshi dzula muḓini wa Ragese kha ḽa Media. ₁₅Hone musi Shalamanesere a tshi dzama, murwa wawe Sanakheribi a vha khosi vhudzuloni hawe; magondo a yaho Media a vho ofhisa, nṋe nda si tsha kona u ya.

₁₆Misi hu tshi kha ḓi vhusa Shalamanesere ndo shuma mishumo minzhi ya u tonda mashaka anga na vha tsinde ḽa hanga. Zwiḽiwa zwanga ndo vha ndi tshi ṋea vha re na nḓala, ₁₇vha re na tsiku nda vha shavhedza. Arali nda vhona muṅwe wa hanga o fa, a laṱwa nnḓa ha mitsheṱo ya Ninive, ndo vha ndi tshi mu swiṱa.

₁₈Sanakheribi o vha o ya Judia, a nyefula Khosi ya ḽiṱaḓulu, Mudzimu a mu lifhedza, a shavha a tshi bva Judia, a bvisela vuvu kha Vhaisraele, a vhulaha vhanzhi vhavho, nṋe nda ṋengeledza nda dzhia zwitumbu zwavho nda zwi swiṱa. Musi khosi i tshi ṱoḓa zwitumbu zwa si wanale. ₁₉Zwino mudzulapo muṅwe wa Ninive a yo sevha khosi uri ndi nṋe ndi no swiṱa vhafu, nṋe nda dzumbama. Musi ndi tshi pfa uri ndi khou ṱoḓiwa uri ndi vhulahwe, nda pfa ndi tshi ofha, nda shavha. ₂₀Thundu yanga ya thubiwa yoṱhe ya iswa pfamoni ya musanda nda si sale na tshithu, ha tou sala mufumakadzi wanga Ana na murwa wanga Thobiasi.

₂₁Hone hu sa athu fhela maḓuvha a mahumi maṋa (40), Sanakheribi a vhulahwa nga vharwa vhawe vhavhili, vha shavhela thavhani dza Ararathi. Ndi hone murwa wawe wa mutuka Eshara Hadoni a tshi vha khosi vhudzuloni hawe. Onoyo a vhea Ahikhara, murwa wa mukomana wanga Anaele uri a vhe mufaragwama wa muvhuso wawe, a vhe mulangi wa zwoṱhe. ₂₂Ahikhara a mphuphuthela, nda kona u vhuelela Ninive. Ndi uri misi ya Sanakheribi khosi ya Ashuru, Ahikhara o vha e ndumi khulwane, a tshi fara tshigivho tsha luswayo, e mulangi wa shango na mufaragwama, zwino Eshara Hadoni* a dovha a mu vhea kha vhuimo honoho. Ahikhara o vha e shaka ḽanga, vhukumakuma o vha e murwa wa mukomana wanga.