LUIMBOIMBO 3

₁Ndo ri ndo lala vhusiku

nda ṱulutshela ene mufunwa wa mbilu yanga,

nda mu ṱoḓa ndi si mu wane.

₂Nda ri, “Kha ndi vuwe

ndi tendeleke na muḓi,

ndi mu ṱoḓe magondoni na mikotoni,

ndi ṱoḓe mufunwa wa mbilu yanga!”

Nda mu ṱoḓa ndi si mu wane.

₃Nda ṱangana na vhalindi vha muḓi,

nda vha vhudzisa nda ri,

“A no ngo vhona mufunwa wanga naa?”

₄Ndi tshi tou furá nda mbo ḓi mu vhona

mufunwa wa mbilu yanga,

nda mu omelela nda si tende a tshi ṱuwa,

nda vhuya nda mu isa muṱani wa mme anga,

nḓuni ye nda bebwa khayo.

₅Inwi vhasadzi vha Jerusalema,

mpfulufhedziseni!

Anani nga tsephe na tholo dzi na ṱhoni,

ni ri a ni nga rithi lufuno lwanga kana na lu vusa.

Lu litsheni lu vuwe nga lwoṱhe!

₆Ndi tshini itsho tshi no bva phangani tshi no nga buluvhutsi, tshi no nukhelela unga zwinukheleli,

zwinukheleli zwi no rengiswa nga vhashavhi?

₇Solomoni ngouḽaa,

u khou ḓa o hwalwa nga khuluṋoni yawe,

ó lindwa nga vhahali vha mahumi maṱanu na ḽithihi,

vhone vhomakone vha vhahali vha Israele.

₈Vhoṱhe ndi vhomakone vha mafumo,

vhone vhaḓivhi vha nndwa;

muṅwe na muṅwe o kungela banga,

vho linda mudio wa vhusiku.

₉Khosi Solomoni o hwalwa nga khuluṋoni

yo vhaḓwaho nga muri wa u naka wa Libanoni;

₁₀mifhiṋi yayo yo fhomiwa nga siliva,

vhusendeko ho tibwa nga sila ḽo lukwaho nga musuku,

misiamelo yayo yo fukedzwa nga sila ḽa muridili,

yo lukwa nga lufuno nga vhasadzi vha Jerusalema.

₁₁Inwi vhasadzi vha Tsioni,

iḓani ni vhone khosi Solomoni!

O ambara khare ye a ambadzwa nga mme awe kha ṱhoho

ḓuvha ḽe a vhinga,

ḓuvha ḽe a vha o takala a tshi pembela.