SIRAKHA 38

₁Hulisa dokotela

nga he zwa mu fanela;

u a mu lila;

mushumo wawe o u ṋewa nga Muṋe washu.

₂Dzilafho ḽone ḽiṋe ḽi bva kha Waṱaḓuluṱaḓulu;

ḽi fana na tshifhiwa tshe wa ṋewa nga khosi.

₃Vhutsila ha dokotela vhu a mu gagamisa,

ha ita uri vhahulwane vha mu hulise.

₄Muṋe washu o medza miri ya mishonga mavuni;

a hu na wa ṱhalukanyo ane a nga i nyadza.

₅Maḓi ho ngo ḓifhiswa nga lutanda

uri vhathu vha ḓivhe maanḓa alwo naa?

₆Mudzimu u ṋea vhathu nḓivho,

uri vha tshi ita zwimangadzo Ene a rendwe.

₇Ndi nḓivho ya u fhodza vhathu na u dzikisa vhuṱungu;

ramishonga u vanganya miri a ita mishonga.

₈Mishumo ya Mudzimu a i gumi;

ndi Ene a no tshidza vhathu ḽifhasini.

₉ṅwananga, musi u tshi lwala u songo shandukela Muṋe washu;

mu rabele, u ḓo u fhodza.

₁₀Laṱa vhukhakhi hoṱhe,

zwanḓa zwau zwi songo shuma zwivhi,

u vhe na mbilu yo ṱambaho.

₁₁Dubisela Mudzimu zwioro,

u mu ṋekedze nduvho ya tshihumbudzo ya vhukhopfu vhusekene;

u ṋekedze nduvho khulu nga hune wa kona,

₁₂u konou vhidza dokotela.

Hufha na ene o vhumbwa

nga Muṋe washu.

U songo mu litsha a ṱuwa;

na ene u a mu lila.

₁₃Miṅwe misi a u nga vhi na mutakalo u si na dokotela,

₁₄ngauri na ene u humbela Muṋe washu

uri a kone u ḓivha vhulwadze,

a ilafhe muthu a mu fhodze.

₁₅U nyadza dokotela

ndi u khakhela Muvhumbi wau!

₁₆ṅwananga, lilela mufu u tou honḓa u ṱungufhale,

u konou tonda tshitumbu nga he zwa fanela,

tshi tshi swiṱwa u vhe hone.

₁₇Lila mbilu i pfe vhuṱungu, honḓa u ṱavhe mukosi,

mu lilele nga he zwa mu fanela,

u fhedze ḓuvha ḽithihi kana mavhili uri hu si vhe na zwisolo,

u kone u fhumula wó no fhedza u ṱungufhala.

₁₈Hone u ṱungufhalesa hu kula muthu nungo,

u ḽa mbilu hu nga mu vhulaha.

₁₉U songo ḽesa mbilu ngae musi o no swiṱwa;

u sokou dzula u tshi lila ndi u ḓitambudza.

₂₀U songo tou ḓikumedza kha u ṱungufhala,

zwi laṱe, elelwa lufu lwau.

₂₁U songo hangwa uri o faraho lwendo ulwo ha vhuyi;

ene zwi nga si mu farise tshithu, zwi ḓo sokou vhaisa iwe.

₂₂Lufu lwawe lu a u vhudza lu ri,

“Elelwa lufu lwanga,

na iwe u ḓo ḓi fa unga nṋe;

mulovha ho fa nṋe, ṋamusi ndi iwe.”

₂₃Musi mufu o swiṱwa, litsha u mu humbula;

rudza mbilu musi muya wawe wo ṱuwa.

₂₄Arali muṅwali a sa shumesi

u wana tshifhinga tsha u andisa vhuṱali hawe;

muthu a songo farakaneaho u a ṱalifha.

₂₅Muthu a nga ṱalifha hani a tshi ṱwa o fara dzembe,

a tshi tshilela u vaya dziphulu fhedzi dzi tshi khou lima,

a tshi amba nga kholomo fhedzi?

₂₆Mbilu yawe i dzula i migeroni,

u dzedza a tshi ṱoḓela zwifuwo pfulo.

₂₇Zwo tou ralo na kha mutsila na mushumi makone;

u shuma vhusiku na masiari.

U vhaḓa makolo kha matombo,

muhumbulo u wa u ita zwifanyiso zwiswa.

Mbilu yawe o i vhea kha u fhoma tshifanyiso

tshine tsha nga tshi a tshila,

u shuma a sa fari khofhe

a vhuya a fhedza makolo awe.

₂₈Zwo tou ralo na kha mufuli ó ima tsini na muvuvha,

a tshi khou fula ngweḓi i tshi vha tsimbi.

Mulilo u fhisa lukanda lwawe

a tshi shisha mabiko henefho ṋanḓoni ya mulilo.

Nundo i tshi kanḓa i dzingisa nḓevhe dzawe,

maṱo awe o sedza tshine a khou tshi fula.

Mbilu yawe i kha u fhedza mushumo wawe,

ha fari khofhe

a tshi kulutedza tshifulwa tshawe nga vhudele.

₂₉Zwo tou ralo kha muvhumbi wa khali ó dzula a tshi khou shuma,

a tshi monisa ḽilinga nga ṋayo dzawe.

Ha sedzi thungo e mushumoni wawe,

ha isi munwe á songo ranga u humbula.

₃₀U vhumba vumba nga zwanḓa zwawe,

a ḽi suka nga ṋayo dzawe.

Mbilu yawe o i livhisa kha u fhoma khali zwavhuḓi,

u dzedza a tshi kunisa ṋanḓo yawe.

₃₁Vhoṱhe avho vha na vhutsila ha zwanḓa,

muṅwe na muṅwe ndi makone mushumoni wawe.

₃₂Muḓi a u dzulwi vha siho, na u dalwa a hu dalwi.

₃₃Hone vhathu avho a vha wanali khoroni ya muḓi,

a si vhaḓivhalea tshivhidzoni.

A vha dzuli na vhahaṱuli,

a vha dzuleli u elekanya Mulayo wa Mudzimu.

₃₄A vha ḓivhelwi pfunzo kana ṱhalukanyo,

a vha dalelani na vhaṱali.

Tshavho vha tika mbumbano ya shango;

na thabelo yavho i livhiswa kha mushumo wavho.