SIRAKHA 30

₁Muthu a no funa ṅwana wawe

u anzela u mu rwa,

uri musi o no aluwa a mu takadze.

₂Muthu a no laya ṅwana wawe nga tshiṱuhu

u ḓo vhuelwa ngae,

a mu khoḓa o dzula na khonani dzawe.

₃Muthu a no funza ṅwana wawe

u zwondololwa nga maswina awe,

hone u ḓo mu tongisa e na khonani dzawe.

₄Naho khotsi awe vho fa, vha ḓo nga a vho ngo fa;

vha ḓo vha vho sia a no nga vhone.

₅Vho mu vhona

vha tshi kha ḓi tshila vha takala, vha ita na u fa vha sa ḽi mbilu.

₆Vho sia mulifhedzeli wa maswina avho,

ene a no ḓo tonda-vho khonani dzavho nga vhuthu.

₇Muthu ane a lema ṅwana wawe u ḓo mu pomba mbonzhe;

tshililo tshiṅwe na tshiṅwe tshi ḓo mu ḽisa mbilu.

₈Bere i songo gudiswaho i vha na tshipimbi;

ṅwana a sa langiwi u a lemala.

₉Wa lema ṅwana u ḓo u ḽela vhuhali; wa tamba nae, u ḓo u ḽisa mbilu.

₁₀Wa sea nae, u vho ḓo lila nae, wa fhedza nga u shenganya maṋo.

₁₁U songo tenda a tshi ita tshine a funa a tshee nga hawe;

a tshi khakha u songo tsinya iṱo.

₁₂Mu khothe mutsinga a tshee nga hawe; mu rwe dzimbabvu a tshee muṱuku,

a sa ḓo vha na tshipimbi a u nyadza, a u ḽisa mbilu.

₁₃Laya ṅwana wau nga tshiṱuhu, u songo fhela mbilu,

a sa ḓo u shonisa.

₁₄Mushai a re na nungo o takala

u fhira mupfumi a no tambula nga vhuhoṱa.

₁₅Mutakalo na u vuwa zwavhuḓi zwi fhira musuku woṱhe,

muvhili wa zwifhanga u fhira lupfumo luhulu.

₁₆Lupfumo lu no fhira muvhili wo takalaho

a luho;

a hu na dakalo ḽi no fhira ḽa mbilu yo takalaho.

₁₇Lufu ndi khwiṋe u fhira u tshila u tshi tambula,

u eḓela tshoṱhe zwi fhira vhuhoṱa vhu sa fheli.

₁₈Madzanga a no khokhiwa phanḓa ha muthu a sa koni u ḽa

a nga nduvho ya zwiḽiwa zwo vhewaho tshaloni.

₁₉Zwi farisani u ṋea tshitungulo tshiṱhavhelo?

Hufha tshi sa ḽi, tshi sa nukhedzi.

₂₀Muthu o ṱungufhadzwaho nga Muṋe washu

ri nga mu fanyisa na mini?

U nga muluvhedzwa

a tshi kuvhatedza khomba; a fhihamelwa!

₂₁U songo ḓikumedza u ṱungufhala,

u songo ḓitambudza nga u ṱolou ḽa mbilu.

₂₂Mbilu yo takalaho

ndi hone vhutshilo ha muthu; dakalo ḽi ita uri a lalame.

₂₃Kudza mbilaelo dzau kule, u rudze mbilu, u pandele u ṱungufhala.

Vhanzhi vho fa nga u ṱungufhala, a u vhuelwi nga tshithu.

₂₄Vivho na mbiti

zwi fhungudza vhutshilo ha muthu,

mbilaelo dzi ṱavhanyisa muthu u kalaha.

₂₅Muthu a no ḽa o takala, mbilu yo rula, u ḓiphiṋa nga zwiḽiwa zwawe.