SIRAKHA 27

₁Vhanzhi vha tshinya

nga u funesa u bindula,

u kakarikela lupfumo zwi tsinyisa muthu ḽiṱo

a nga ha vhoni vhutshinyi.

₂Kha u renga na u rengisa vhuvhi vhu a sunguvhela,

unga khokho i tshi rwelwa vhukati ha matombo mavhili.

₃Arali wa sa tou nambatela u ofha Muṋe washu,

nnḓu yau i ḓo phusukanywa kathihi fhedzi.

₄Musi luselo lu tshi fhefhera, hu vhonala mungu;

musi muthu a tshi amba hu vhonala vhukhakhi hawe.

₅Khali dza muvhumbi dzi lingwa biseloni;

muthu ene u lingwa nga zwine a amba.

₆Mutshelo wa muri u sumbedza u londolwa hawo;

tshe mulomo wa amba ndi tshe mbilu ya amba-vho.

₇U songo khoḓa muthu a sa athu amba,

ngauri ndi henefho hune vhathu vha lingwa.

₈Arali u tshi ṱoḓa vhuvhuya u ḓo vhu wana,

wa vhu ambara unga khanzu ya maṱeleṱele.

₉Zwa madzanga zwi a ṱoḓana;

u fulufhedzea hu ḓa kha vhane vha fulufhedzea.

₁₀Ndau i lalela tshine ya ṱoḓa u ponda;

vhutshinyi vhu lalela vhaitazwivhi.

₁₁Nyambo dza vha ofhaho Mudzimu dzi dzula dzi dza vhuṱali,

hone dza vhavhi dzi shanduka unga ṅwedzi.

₁₂Musi u na matsilu ṱoḓa tshivhana tsha u ṱuwa,

hone musi u na vha ṱhalukanyo u songo ṱavhanya u ṱuwa.

₁₃Zwiambo zwa matsilu zwi a nengisa,

hu pfala maseo avho na mapwapwalala vha tshi ḓiphiṋa nga u tshinya.

₁₄Zwiambo zwa vhathu vha maṱamba zwi imisa mavhudzi;

u tshi pfa mikosi yavho u thivhe nḓevhe.

₁₅Mufhirifhiri wa vha u ḓihudza u fhedza nga u shulula malofha,

maṱamba avho a a vhavha u tshi a pfa.

₁₆Muthu ane a dzumbulula tshidzumbe a nga si fulufhedzwe,

a nga si vhuye a wana khonani ya mbiluni.

₁₇Funa khonani yau, u songo mu laṱedza,

hone arali wa dzumbulula tshidzumbe tshawe,

u songo tsha mu tevhela;

₁₈wo vhulaha vhukonani ha mudzulelani wau

unga swina ḽi tshi vhulaha muthu.

₁₉Wo litsha khonani yau a tshi ṱuwa

sa tshiṋoni tsho ponyokaho tshanḓani;

u nga si tsha mu wana.

₂₀U songo tsha mu tevhela, u kulesa,

o shavha unga ntsa yo ponyoka mulavhuni.

₂₁Mbonzhe i nga pombiwa,

samba ḽi nga hangwelwa,

hone a no dzumbulula zwidzumbe o vhulaha vhukonani tshoṱhe.

₂₂Muthu wa u sinyedza u ṱoḓa u silinga,

a hu na ane a nga kona u mu thivhela.

₂₃U u fhura nga haṋwani ha u ḓifha ú henefho,

a nga ú takalela maipfi oṱhe ane wa amba,

hone wó no ṱuwa u vho amba zwiṅwe,

a piringanya maipfi au a u lozwa.

₂₄Hu na zwinzhi zwi nnengisaho,

hone a hu na tshine nda tshi vhenga u fhira hetsho;

na Muṋe washu u a mu sanda.

₂₅Muthu a no posa tombo nṱha ḽi wela nṱha ha ṱhoho yawe;

u rema muṅwe ndi u ḓirema.

₂₆Khunḓa i fasha muvei;

tshikwekwe tshi fasha murei;

₂₇muthu a ita vhuvhi,

vhu ḓo vhuela khae,

a si vhuye a ḓivha uri zwo mu wela hani.

₂₈Tshiambela na maṱamba ndi zwa muḓihudzi;

ndifhedzo yo mu lalela unga ndau.

₂₉Vhane vha takalela muvhuya a tshi wa

vha ḓo fashwa nga mulavhu;

vhuṱungu vhu ḓo vha hadzinga vha sa athu fa.

₃₀U farana nga mbilu, na mbiti,

na zwone ndi zwithu zwi nengisaho,

huno ndi zwone zwine muvhi a zwi kona.