SIRAKHA 21

₁ṅwananga, arali wo tshinya,

u songo tsha dovha.

Tshau rabela uri u hangwelwe vhuvhi hau ha kale.

₂Shavha vhutshinyi unga u tshi shavha ṋowa;

wa sendela tsini haho vhu a luma.

Maṋo aho ndi maṋo a ndau,

vhu ponda vhathu.

₃Vhukhakhi vhuṅwe na vhuṅwe ndi banga ḽa mutsheahoṱhe,

mbonzhe yaho a i lafhei.

₄Hayani ha mudzia-u-ḓihudza hu ḓo phusukanywa

u ḓi nga u levhelana na u huvhadzana

zwi tshi lovhisa lupfumo lwe mbwandaa.

₅Thabelo ya mushai i mbo ḓi pfiwa nga Mudzimu;

Mudzimu a mbo ḓi haṱula o mu khakhelaho.

₆A no vhenga u laiwa u tshimbila nḓilani ya mutshinyi,

hone a no ofha Muṋe washu u laṱa vhuvhi hawe.

₇Phungo mmbi ya vavhi i ḓihwa kule,

hone wa vhusedzi,

a hu na vhukhakhi vhu no mu dzhena maṱoni.

₈U fhaṱa nnḓu yau nga mali ya muṅwe

zwi nga u kuvhanganya matombo a no ḓo khokhiwa tshaloni tshau.

₉Tshivhidzo tsha mavemu tshi nga thulwi ya phula,

vha ḓo fhelela khavhuni ya mulilo.

₁₀Nḓila ya vhatshinyi

a i konḓi u tshimbila,

hone i guma dindini.

₁₁Muthu a no vhulunga mulayo u langa mihumbulo yawe,

u ofha Muṋe washu hu khunyelela kha vhuṱali.

₁₂Muthu a songo thanyaho ha funzei,

hone hu na kuthanyele ku ṋaṋisaho mbiti.

₁₃Nḓivho ya muṱali i nga mulambo wo ḓala,

nyeletshedzo yawe ndi tshisima tshi elelaho.

₁₄Muhumbulo wa tsilu u nga mvuvhelo ya mutwe

a u koni u vhulunga nḓivho.

₁₅Muṱali a tshi pfa murero wa vhuṱali,

u a u khoḓa, a sevhedza nga muṅwe;

ḓabaḓaba ḽone ḽi tshi u pfa ḽi a u nyala ḽa u posa kule.

₁₆Zwiambo zwa tsilu zwi nga muhwalo lwendoni,

hone u pfa muṱali zwi a ḓifha.

₁₇Tshivhidzoni vha tama u pfa muṱali a tshi amba,

maipfi awe a na tshileme.

₁₈Vhuṱali ha tsilu vhu nga nnḓu ya dumba,

nḓivho ya danana ndi u sokou fhafhaḓa.

₁₉Ndayo kha tshidzingindi

i nga khotho dzo vhofhaho milenzhe,

i nga mbofho dza tsimbi kha tshanḓa tshawe tshauḽa.

₂₀Tsilu ḽi tshi sea ḽi tou thathaba, muṱali u tou mwemwela.

₂₁Pfunzo kha muṱali i nga nungu ya musuku,

i nga mulinga tshanḓani tshawe tshauḽa.

₂₂Tsilu ḽi dzhena nḓuni nga mutsindo,

ngeno o laiwaho a tshi ima nnḓa.

₂₃Muphani u ṱodzimela nga vothi ḽa nnḓu,

hone muthu-muthu u lavhelesa fhasi.

₂₄Ndi vhuphani u thetshelesa mafhungo muthu e muṋangoni,

muthu wa ṱhalukanyo u pfa e na ṱhoni.

₂₅Vhotshiisaphungo vha anea zwitshele;

vhaṱali vha elekanya vha sa athu amba.

₂₆Mihumbulo ya matsilu i milomoni yavho;

maipfi a vhaṱali a mbiluni dzavho.

₂₇Muvhi a tshi teketela Saṱhane, vhukuma u khou ḓiteketela.

₂₈Tshiisaphungo u ḓishata tshika, muḓi woṱhe u a mu vhenga.