SIRAKHA 18

₁Walininalini

o sika zwoṱhe zwi re hone.

₂Ndi Muṋe washu e eṱhe a sa khakhi.

₄Maanḓa a u ḓivhadza mishumo yawe yoṱhe o a ṋea nnyi?

Ndi nnyi ane a nga londolosa zwihulu zwe a ita?

₅Ane a nga ela maanḓa awe ndi nnyi?

Ndi nnyi ane a nga ṱhaphudza lungano lwa vhuthu hawe?

₆A vhu engedzei, a vhu fhungudzei,

zwimangadzo zwa Muṋe washu a zwi ṱoṱoredzei.

₇U tshi ri wo guma,

ndi hone u tshi khou tou thoma,

musi u tshi ima, u tshee wo hanganea.

₈Muthu ndi mini, u na mushumo-ḓe?

Ndi zwithu-ḓe zwine zwa mu tonda kana u mu tshinya?

₉Miṅwaha yawe a i fhiri ḓana;

₁₀miṅwaha yawe i si gathi

i tshi vhambedzwa na tshifhinga tsha Mudzimu tshi sa gumi,

zwi nga shotha ḽa maḓi a lwanzhe, zwi nga thoro ya muṱavha.

₁₁Ndi zwine Muṋe washu a si fhelele vhathu mbilu,

a ḓi vha shululela vhuthu hawe.

₁₂Mudzimu u a vhona,

a ṱalukanya uri vha ḓo fa vha tshi vhavha,

ndi zwine a ḓi endela u vha hangwela.

₁₃Muthu a nga ḓi itela wa hawe vhuthu,

hone ha Muṋe washu vhu katela zwoṱhe zwi tshilaho.

U a kaidza, a laya, a funza,

sa mulisa a tshi endedza sambi ḽa nngu dzawe.

₁₄U khathutshela vhane vha tenda a tshi vha laya,

vhane vha takalela ndayo dzawe nga mbilu yoṱhe.

₁₅ṅwananga, u tshi tonda muthu u songo mu vhaisa nga maipfi,

u tshi ṋea muthu tshifhiwa u songo mu ḽela vhuhali.

₁₆ṅwando a u dzimuli muya u fhisaho naa?

Ipfi ḽa vhulenda na ḽone ḽi fhira tshifhiwa.

₁₇Vhukuma, ipfi ḽavhuḓi ḽi fhira tshifhiwa tshavhuḓi,

hone muthu wa vhuthu u zwi ṱanganya zwoṱhe.

₁₈Ndi tsilu fhedzi

ḽine ḽa ranga u teketela ḽa konou ṋea;

tshifhiwa tsha muthu wa u gungula tshi rivhisa maṱo a muṋewa.

₁₉Thoma u guda u vhe na nḓivho u sa athu amba,

ḓitsireledze u sa athu lwala.

₂₀Thoma u ḓiṱola mbiluni u sa athu haṱulwa,

ndi hone u tshi ḓo pembela musi wa khaṱhulo.

₂₁ḓiṱukufhadze

u sa athu farwa nga vhulwadze;

wa tshinya u mbo ḓi laṱa.

₂₂Hu songo vha na

tshine tsha u kundisa u ṱavhanya u vuledza muano wau,

u songo thoma u u humbula u tshi vho fa.

₂₃Ranga u ḓidzudzanya u sa athu ana,

u songo nga muthu ane a linga Muṋe washu.

₂₄Humbula khaṱhulo yawe ya misi ya vhufhelo,

na tshifhinga tsha ndifhedzo

musi a tshi vho ḓo dzumba tshifhaṱuwo tshawe.

₂₅Musi wa nḓalo elelwa misi ya nḓala;

musi wo pfuma,

elelwa vhushai na vhusiwana.

₂₆ḽi ri u tsha ḽa mbo ḓi kovhela;

phanḓa ha Muṋe washu zwithu zwoṱhe zwi na luvhilo.

₂₇Muthu wa vhuṱali u na vhusedzi kha zwoṱhe,

musi vhuvhi vhu tshi hulela u sedza uri a si khakhe.

₂₈A hu na muthu a re na maano a sa ṱalukanyi vhuṱali

kana a sa hulisi a re naho.

₂₉Vha no ṱalukanya mirero vho ranga nga u i shishela mabiko,

vha konou sala vha tshi bula i pfalaho.

₃₀U songo vhuswa

nga zwine mbilu yau ya zwi swela,

phulela nyemulo dzau muhala.

₃₁Wa sa dzima zwa nyemulo dzau maswina au a ḓo u sea.

₃₂U songo ḓikumedza vhutshilo ha ludzula,

na u konana na vho raloho u songo konana navho.

₃₃U songo tambisa thundu yau yoṱhe nga u ita vhuṱambo.

ngeno tshikwamani u si na tshithu.