SIRAKHA 17

₁Muṋe washu

o vhumba muthu nga mavu,

a ri u ḓo dovha a vha mavu.

₂O tela muthu tshifhinga tshawe na maḓuvha awe a vhutshilo,

a ri a lange zwoṱhe ḽifhasini.

₃O ambadza muthu maanḓa a no nga a Ene muṋe,

a mu sika a tshi ḓifanyisa.

₄O ita uri zwoṱhe zwi tshilaho zwi ofhe muthu,

a lange dziphukha na zwiṋoni.

₆O vhumba ndimi dza vhathu na maṱo na nḓevhe,

a vha ṋea mbilu ya u humbula.

₇O vha ṋea nḓivho na vhuṱali,

a vha sumbedza zwi re zwivhuya na zwi re zwivhi.

₈O vhonetshela mbilu dzavho nga tshedza tsha Mudzimu,

uri vha vhone vhugala ha mishumo yawe,

₁₀uri vha ḓivhadze mishumo yawe ya maanḓa,

vha tshi renda dzina ḽawe ḽikhethwa.

₁₁O vha ṋekedza nḓivho,

a vha kovhela mulayo wa vhutshilo.

₁₂O vhofha navho mulanga wa lini na lini,

a vha dzumbululela khaṱhulo dzawe.

₁₃Maṱo avho o vhona khanya ya vhugala hawe,

nḓevhe dzavho dza pfa vhugala ha ipfi ḽawe.

₁₄O vha vhudza a ri,

“Tinyani vhukhakhi hoṱhe.”

Vhoṱhe a vha laya matshilisanele.

₁₅Nḓila dzavho

u dzula a tshi dzi ḓivha,

a vha dzumbami maṱo awe.

₁₇Lushaka luṅwe na luṅwe u lu vhetshela muvhusi,

hone mukovhe wawe vhukuma ndi Israele.

₁₉Phanḓa hawe zwoṱhe zwine vha ita zwi vhonadza unga ḓuvha,

maṱo awe a dzula a tshi sedza nḓila dzavho.

₂₀Vhuvhi havho a vhu mu dzumbami,

vhutshinyi havho hoṱhe vhu phanḓa ha Muṋe washu.

₂₂Mudzimu u vhona u ṋea vhashai hu tshi nga rinngi ya luswayo,

mapakulile u mu funa sa tshanga ya ḽiṱo ḽawe.

₂₃U ḓo vhuya a takuwa a mu pfufha, a mu ṋea nga he zwa mu fanela.

₂₄Huno vhane vha laṱa vhuvhi havho u a vha ṱanganedza,

vho no fulufhuwaho a vha ṱuṱuwedza vha khwaṱha.

₂₅Vhuelelani ha Muṋe washu ni laṱe vhuvhi;

mu luvheleleni, ni si tsha mu khakhela.

₂₆Humelani kha Waṱaḓuluṱaḓulu, ni vhe kule na vhuvhi,

zwine a zwi nengwa ni zwi nyalese.

₂₇Ndi nnyi

ane a nga renda Waṱaḓuluṱaḓulu ó no tsela dindini

arali ri sa rendi vhugala hawe ri tshee vhapenyu?

₂₈O faho,

u ḓi nga a songo vhuyaho a vha hone, ha koni u renda Mudzimu,

Mudzimu u fhululedzwa nga a tshilaho a re na mutakalo.

₂₉Edzonu vhona uri khathutshelo yawe

kha vhane vha vhuelela khae ndi nngafhani!

₃₀Vhathu a vha koni u vha na zwithu zwoṱhe;

ho ngo ri ṋea u sa fa.

₃₁Tshi penyaho u fhira ḓuvha ndi mini?

Hone na ḽone ḽi a kovhela.

Huno mihumbulo ya muthu wa ṋama ndi mivhi.

₃₂Mudzimu u dzudzanya ṋaledzi dza lutomboni,

zwino riṋe roṱhe hufha ri buse na milora.