Milayo ya u tonda vhaṅwe
1Arali u tshi tonda muthu,
u ḓivhe uri u tonda nnyi,
ndi hone vhuthu hau vhu tshi ḓo livhuhwa.
2Tonda muthu a ofhaho Mudzimu, pfufho i ḓo vha yau,
ya si bva khae,
i ḓo bva kha Waṱaḓuluṱaḓulu.
3Muthu ane a endela u ita vhuvhi na u sa ṋea vhashai zwifhiwa,
ha nga nakelwi nga tshithu.
4Ṋea a ofhaho Mudzimu,
u dzime muvhi.
ṋea wa u ḓiṱukufhadza,
a nyadzaho Mudzimu u songo mu ṋea tshithu.
5Vhuswa na hone u songo mu ṋea, a sa vho ḓo u fhira nga nungo.
Tshivhuya tshau tshiṅwe na tshiṅwe ene u ḓo livhuha nga mipama mivhili.
6Waṱaḓuluṱaḓulu Ene muṋe u sanda vhatshinyi,
u lifhedza vhavhi nga he zwa vha fanela.
7Tonda muvhuya u si phalale muvhi.
Khonani vhukuma na dza muhoyo
8ḽó lala a re khonani ya vhukuma u nga si mu ḓivhe,
hone musi u khomboni u ḓo ḓivha swina.
9Musi zwi tshi u nakela maswina au na one a ḓiita khonani dzau,
musi u khomboni na khonani a i tsha kanda.
10U songo vhuya wa fulufhedza swina ḽau,
vhuvhi hawe vhu nga vhulali kha musina.
11Nangwe a tshi ḓiṱukufhadza a tshi sumbedza vhuhwavho,
ḓilinde, u dzule wo mu vhea ḽiṱo.
U mu huṱe sa muthu a phumulaho tshivhoni,
u ḓo vha wo phumula vhulali.
12U songo tenda a tshi ima tsini hau,
a sa ḓo u tekula a dzhia vhuimo hau.
U ḓo fhedza nga u elelwa nyeletshedzo yanga
wa ḓisola wa tenda uri ndo vha ndo amba zwone.
13Muphuphudzi wa ṋowa á luṅwa,
ndi nnyi a no mu pfela vhuṱungu?
Muthu ane a tamba na tshivhanda na ene zwo tou ralo.
14Zwo tou ralo arali u tshi konana na muvhi
wa nga ntsa i tshi vhuvha nga tshiṱaka:
U ḓo rwiwa na tshiṱaka.
15U ḓo ima na iwe tshifhinganyana,
hone wa vhuya wa tenda zwine a amba,
u ḓo u fasha tshoṱhe.
16Swina ḽi na haṋwani ha u ḓifha,
hone mbiluni yawe u luka vhunwa ha u sukumedzela iwe dindini.
Naho swina ḽau ḽi tshi tsengisa miṱodzi,
arali ḽa wana nḓila,
ḽi ḓo nwa malofha au ḽa si pfelele.
17Arali wa welwa nga khombo,
u ḓo mu wana o no vha henefho,
a ita unga u khou u farisa, ngeno a tshi u piringedza.
18Zwenezwo u vho ḓo u holedza a vhanda zwanḓa,
a hevhedza mavhi manzhi a tshi dovha,
vhuḽa vhuhwavho vhu si tsheeho.
