U MIRERO YO KUVHANGANYWAHO
Tshisima tsha vhuṱali
1Vhuṱali hoṱhe
vhu bva kha Muṋe washu,
vhu dzula vhu nae lini na lini.
2Muṱavha wa khunzikhunzini ya lwanzhe, marotha a mvula,
maḓuvha a lini na lini –
zwenezwo zwi nga vhalwa nga nnyi?
3Vhulapfu ha ḽiṱaḓulu u ya nṱha, vhuphara ha ḽifhasi,
vhudzivha ha dindi ḽa vhudzulavhafu – ane a nga zwi tandula ndi nnyi?
4Vhuṱali ho sikwa
hu sa athu vha na tshithu na tshithihi,
na ṱhalukanyo i hone tsha kale na kale.
6Mudzi wa vhuṱali wo vhuya wa dzumbululelwa nnyi?
U thanya haho hu ḓihwa nga nnyi?
8Ndi muthihi fhedzi o ṱalifhaho, a no ofhisa vhukuma,
9o dzula kha khuluṋoni yawe:
Ndi Muṋe washu, ndi Ene o sikaho vhuṱali, a vhu ṱola a vhu ela,
a konou vhu shululela kha mishumo yawe yoṱhe,
a vhu shululela kha zwoṱhe zwi tshilaho
10zwi tshi ya nga he a zwi takalela ngaho,
a vhu ṋea na khonani dzawe.
U ofha Mudzimu
11U ofha Muṋe washu ndi vhugala na u gagamiswa,
ndi dakalo na muṅene wa u pembela.
12U ofha Muṋe washu hu takadza mbilu,
ha u ṋea dakalo na bembelo na ndalamo.
13Muthu a no ofha Muṋe washu
u ḓo fhedza o takala;
na nga ḓuvha ḽa lufu lwawe u ḓo shudufhadzwa.
14Tshisima tsha vhuṱali ndi u ofha Muṋe washu,
vhu vhumbwa na mufulufhedzea muvhilini wa mme awe.
15Ho ḓifhaṱela muṱa na lushaka lwa vhathu u bva tsha kale,
na vhana vhavho a vhu nga vha shandukeli.
16U ofha Muṋe washu ndi hone vhuṱali ho fhelelaho;
vhu fusha vhanna nga mitshelo yaho.
17Vhu ḓadza nnḓu yavho yoṱhe nga lupfumo,
maḓulu aho ha a ḓadza nga khaṋo yaho.
18Tshiala tsha vhuṱali ndi u ofha Muṋe washu;
vhu fhufhumisa mulalo na mutakalo.
19Muṋe washu o vhu vhona a vhu fhenḓa,
o tou nisa nḓivho na ṱhalukanyo;
o ita uri vha re naho vha huliswe zwihulu.
20U ofha Muṋe washu ndi wone mudzi wa vhuṱali,
matavhi aho ndi ndalamo.
U sa fhela mbilu na u ḓifara
21Mbiti dza muvhi a dzi mu vhuedzi tshithu,
u wiswa nga u lemela ha mbiti dzawe.
22Muthu a sa fheli mbilu u konḓelela tshifhinga tsha vhuya tsha swika,
ndi hone a tshi ḓo pfa o takala.
23U fara lulimi lwawe tshifhinga tsha vhuya tsha swika,
ndi hone milomo ya vhanzhi i tshi ḓo ṱanzilela vhuṱali hawe.
A na vhuṱali ha na muhoyo
24Tshisikuni tsha vhuṱali hu na nyambo dza vhuṱali,
hone u ofha Muṋe washu hu nengisa muvhi.
25Arali u tshi tama vhuṱali, tevhedza milayo ya Mudzimu,
ndi hone Muṋe washu a tshi ḓo u ṋea hone.
26Ndi uri u ofha Muṋe washu ndi vhuṱali na ndayo,
Ene u takalela u fulufhedzea na vhulenda.
27U songo litsha u ofha Muṋe washu,
u songo mu luvha u na mbilu mbili.
28U songo ita muhoyo vhathuni, u linde milomo yau.
29U songo ḓihudza u sa ḓo wela fhasi, wa vho ḓinyadza,
30ngauri Muṋe washu u ḓo dzumbulula vhukwila hau,
a u tekula vhathu vho sedza,
nge wa si tshile u tshi ofha Muṋe washu,
wa vha na mbilu ya vhufhura.
