NZUMBULULO 2

₁“Ṅwalela muḓinḓa a re tshivhidzoni tsha Efesa u ri, ‘Uḽa o faraho ṋaledzi ṱhanu na mbili nga tshanḓa tshauḽa, a tshimbilaho vhukati ha zwivheambone zwa musuku, u ri: ₂Zwoṱhe zwine na ita ndi a zwi ḓivha: ndi ḓivha u ḓinetisa haṋu, na u konḓelela haṋu, na u sa kona u konḓelela vhavhi, na u ṱalula vhane vha sokou ḓiita vhaapostola ngeno vhe si vhone, vhe vha khole-khole – ndi zwi ḓivha zwoṱhe. ₃Na u konḓelela ni a konḓelela ni sa fheli mbilu, na ita na u tambudzelwa Nṋe ni sa neti.

₄“ ‘Hone hu na tshine na nndina ngatsho, asitshi: a ni tsha mpfuna sa kale.

₅“ ‘Edzonu vhona he na wa ni hone, uri ndi hungafhani. Zwino-ha shandukani ni dovhe ni ite zwe na vha ni tshi ita kale. Arali na sa shanduka ndi ḓo ḓa nda bvisa tshivheambone tshaṋu vhudzuloni hatsho. ₆Hone tshi kha ḓi vha hone-vho tshine nda ni khoḓela tshone: ni vhenga zwiito zwa vhafunziwa vha Nikolasi unga na Nṋe ndi tshi zwi vhenga.

₇“ ‘A na nḓevhe nga a thetshelese zwine Muya a vhudza zwivhidzo.

“ ‘Ane a kunda ndi ḓo mu tendela u ḽa muri wa vhutshilo u re Pharadisoni ya Mudzimu.’

₈“Ṅwalela muḓinḓa a re tshivhidzoni tsha Simirina u ri, ‘Uḽa a re mathomo na magumo, we a vha o fa a dovha a tshila, u ri: ₉Nṋe ndi ḓivha u tambula haṋu na vhushai haṋu, naho zwo ralo no pfuma. Ndi ḓivha na phungo ye na iselwa yone nga vhane vha ḓiita Majuda ngeno vhe si vhone, vhe tshivhidzo tsha Saṱhane.

₁₀“ ‘Zwino inwi ni songo ofha dambudzo ḽo ni livhaho. Ndi ralo ngauri diabolo u ḓo linga vhaṅwe vhaṋu, vha farwa vha kudzwa dzhele, vha tambudzwa maḓuvha a fumi. Hone naho ni tshi nga pfi ni a vhulawa, inwi ni ḓi dzula ni tshi fulufhedzea. Tshiala tshine nda ḓo ni ṋea ndi vhutshilo.

₁₁“ ‘A na nḓevhe nga a thetshelese zwine Muya a vhudza zwivhidzo.

“ ‘Ane a kunda, lufu lwa vhuvhili lwone a lu nga mu iti tshithu.’

₁₂“Ṅwalela muḓinḓa a re tshivhidzoni tsha Pergamoni u ri, ‘Uḽa o faraho banga ḽa mutsheahoṱhe ḽo ṱuṱulwaho u ri: ₁₃Hune na dzula hone ndi a hu ḓivha: ndi hune ha vhusa Saṱhane. Naho zwo ralo ni ḓi dzula no mpfulufhedza. Na musi Antipasi ṱhanzi yanga i fulufhedzeaho yo vhulawa henefho hayani ha Saṱhane, a no ngo nndandula.

₁₄“ ‘Naho zwo ralo hu na zwi si gathi zwine nda zwi sanda kha inwi, khezwi: hu na vhaṅwe henefho vho faraho pfunzo ya Biliamu, uḽa we a funzedza Balaka u retshela Vhaisraele zwikwekwe nga u vha ḽisa zwiḽiwa zwo sumelwaho midzimu na u vha itisa vhupombwe. ₁₅Hu ḓi nga vha tevhelaho pfunzo ya Nikolasi vha ḓi vha hone henefho.

₁₆“ ‘Zwino-ha shandukani; na sa shanduka ndi ḓo ṱuwa ndi tshi ni ḓela, nda ḓo lwa na vhenevho nga banga ḽo ṱoṱomowaho mulomoni wanga.

₁₇“ ‘A na nḓevhe nga a thetshelese zwine Muya a vhudza zwivhidzo.

“ ‘Ane a kunda ndi ḓo mu ṱusela mana ye nda dzumba, nda mu fha na tombo ḽitshena ḽo ṅwalwaho dzina ḽiswa ḽi sa ḓihwi nga muthu arali e si onoyo fhedzi we nda mu ṋea.’

₁₈“Ṅwalela muḓinḓa a re tshivhidzoni tsha Thiathira u ri, ‘Murwa wa Mudzimu, ane maṱo awe a penya sa khavhu ya mulilo, milenzhe yawe ya penya sa musinaseṱha, u ri: ₁₉Zwoṱhe zwine na ita ndi a zwi ḓivha: ndi ḓivha lufuno lwaṋu, na lutendo, na u tonda vhaṅwe, na u konḓelela, ndi zwi ḓivha zwoṱhe. Na uri zwine na ita zwino zwi fhira zwa kale, na zwone ndi a zwi ḓivha.

₂₀“ ‘Tshine na nndina ngatsho asitshi: uḽa musadzi Jesebele ane a sokou ḓiita muporofita no a sokou mu litsha a tshi xedza vhalanda vhanga nga u vha itisa vhupombwe na u vha ḽisa zwiḽiwa zwo sumelwaho midzimu. ₂₁Ene ndo vha ndo mu ṋea tshifhinga tsha u laṱa zwa vhupombwe, hone a si laṱe. ₂₂Zwino-ha ndi ḓo mu ladza thovhoni i fhisaho, vhane vha ita vhupombwe nae arali vha sa zwi laṱi ndi ḓo vha tambudza zwihulu. ₂₃Vhana vhawe vhone ndi ḓo vha vhulaha nga dwadze. Ndi hone zwivhidzo zwoṱhe zwi tshi ḓo ḓivha uri ndi Nṋe a no fhenḓa mihumbulo na dzimbilu, nahone ndi ḓo lifhedza noṱhe ndi tshi tevhedza mishumo yaṋu.

₂₄“ ‘Hone inwi vhaṅwe henefho Thiathira ni sa tevheli pfunzo heyo ya uyo musadzi, ni songo gudaho hezwo zwine vhe ndi zwone zwiphiri vhukuma zwa Saṱhane, inwi a thi tsha ḓo ni hwesa muṅwe muhwalo. ₂₅Tshaṋu hu vhe u farelela zwine na vha nazwo u swika ndi tshi ḓa.

₂₆“ ‘Ane a kunda, a si litshe u ita zwine Nṋe nda funa, a vhuya a khunyeledza, onoyo ndi ḓo ri a vhuse dzitshakha.

₂₈“ ‘Zwi ḓi nga zwe nda ṋewa nga Khotsi anga. Ndi ḓo dovha nda mu ṋea na Masase ya vha yawe.

₂₉“ ‘A na nḓevhe nga a thetshelese zwine Muya a vhudza zwivhidzo.’