DZIPHISALEMA 97

₁Muṋe washu u a vhusa,

ḽifhasi nga ḽi fhululedze!

Mashango a kule nga a takale!

₂O tangwa nga makole na swiswi;

khuluṋoni yawe yo tewa

kha u fulufhedzea na khaṱhulo mbuya.

₃Mulilo u mu ranga phanḓa,

u fhisa maswina awe thungo dzoṱhe.

₄Phenyo dzawe dzi tshi ri vhenge dzi vhonetshela shango;

ḽifhasi ḽi tshi zwi vhona ḽi a tetemela.

₅Dzithavha dzi ṋoka sa phula phanḓa ha Muṋe washu,

phanḓa ha Muṋe wa ḽifhasi ḽoṱhe.

₆Ḽiṱaḓulu ḽi ḓivhadza u fulufhedzea hawe;

tshakha dzoṱhe dzi vhona vhugala hawe.

₇Vhoṱhe vha no rerelela zwifanyiso vha a shona;

ndi vha no ṱongisa midzimu i si tshithu.

Muṋe washu u gwadamelwa nga midzimu yoṱhe.

₈Tsioni i tshi zwi pfa i a takala,

miḓi ya Juda i a fhululedza,

i tshi vhona khaṱhulo yau,

Muṋe washu.

₉Iwe Muṋe washu, u Waṱaḓuluṱaḓulu a no fhira zwoṱhe fhano fhasi;

u muhulwane, u fhira midzimu yoṱhe.

₁₀Vha funaho Muṋe washu nga vha nengwe vhuvhi;

u londola vhalanda vhawe vha fulufhedzeaho,

a vha lamukisa zwanḓani zwa vhavhi.

₁₁Hu si kale ḓuvha ḽa vha fulufhedzeaho ḽi ḓo bva,

vha mbilu dzo ṱambaho vha pembela.

₁₂Inwi vha fulufhedzeaho,

takalelani Muṋe washu,

mu rendeni,

ḓivhani uri ndi mukhethwa!