DZIPHISALEMA 94

₁Muṋe washu,

u Mudzimu ane a lifhedza;

Iwe Mudzimu Mulifhedzi, ḓivhonadze!

₂Takuwa, Iwe Muhaṱuli wa ḽifhasi;

lifhedza vhadzia-u-ḓihudza

u tshi tevhedza zwiito zwavho!

₃Muṋe washu,

vhavhi vha ḓo ḓiphiṋa u ya ho ya naa?

Vha ḓo gumafhi?

₄Maṱamba vha tou pfa vha tshi vhea;

vhaitazwivhi vhoṱhe vha a ḓikhoḓa.

₅Vha kandeledza vhathu vhau,

Muṋe washu,

vha tsikeledza vhanangiwa vhau.

₆Vha vhulaha tshilikadzi na ṱhunḓu,

vha ponda tsiwana.

₇Vha ri Muṋe washu ha zwi vhoni;

Mudzimu wa Jakopo ha zwi londi.

₈Ni vhone, inwi ni si na ṱhalukanyo;

inwi matsilu, ni ḓo ṱalifha lini?

₉Kani we a ni ṋea nḓevhe ndi dzinganḓevhe?

We a ni fha maṱo ndi bofu kani?

₁₀Kani-ha ane a onyolosa dzitshakha ha laṱisi?

Ene ane a gudisa vhathu ha na nḓivho kani?

₁₁Muṋe washu u ḓivha mihumbulo ya vhathu;

u ḓivha uri a vha tshithu.

₁₂Muṋe washu,

ú na mashudu ane wa mu laya,

wa mu funza mulayo wau,

₁₃u mu rudza mbilu musi wa khombo,

vhavhi vha vhuya vha swiṱwa.

₁₄Muṋe washu a nga si laṱe vhathu vhawe,

a nga si furalele vhanangiwa vhawe.

₁₅Hu ḓo dovha ha vhuya khaṱhulo mbuya;

vhoṱhe vha mbilu dzo ṱambaho vha ḓo i tevhela.

₁₆Ndi nnyi ane a ḓo nndwela ndi tshi imedzana na vhavhi?

Ndi nnyi ane a ḓo nnyimelela vhaitazwivhi vha tshi mmvutshela?

₁₇Ngavhe Muṋe washu a si mpfarise,

ndi musi ndo fa.

₁₈Ndi tshi ri,

“Mulenzhe wanga u khou redzemuwa,”

Iwe Muṋe washu wa ntika,

ngauri u na lufuno.

₁₉Musi mbilu yanga i tshi swa,

wa nkhuthadza wa nthudza mbilu.

₂₀Nṋa vhavhusi vhavhi vhane vha ḓivhetshela

milayo ya vhukwila,

vha nga konana na Iwe?

₂₁Vha luka vhunwa ha u fasha vha fulufhedzeaho,

vha si na mulandu vha haṱulelwa lufu.

₂₂Muṋe washu ndi Ene vhushavhelo hanga;

Mudzimu wanga ndi Ene bako ḽi ntsireledzaho.

₂₃Ú ḓo vha lifhedzela vhutshinyi havho,

a vha fhedza nga mulandu wa vhuvhi havho.

Mudzimu Muṋe washu u ḓo vha lozwa.