DZIPHISALEMA 90

₁Muṋe wa zwoṱhe,

wo ḓi vha dzhavhelo ḽashu

zwi tshi ya nga mirafho na mirafho.

₂Zwiḽa thavha dzi sa athu bebwa,

u sa athu sika ḽifhasi na shango,

u ḓi vha Mudzimu

u bva kale-kale, na lini na lini.

₃Iwe u vhuedzedza muthu mavuni,

wa ri,

“Vhuelelani kha zwe na vha ni zwone,

inwi vhana vha vhathu.”

₄Kha Iwe tshigidi tsha miṅwaha

tshi tou nga ḓuvha ḽa mulovha ḽo fhiraho,

tshi nga muthu a tshi rembuluwa kathihi vhusiku.

₅U kumba vhathu, zwa nga muloro une ḽi tshi tsha wa hangwiwa;

vha nga hatsi vhu melaho nga matsheloni:

₆nga matsheloni vhu a titima,

nga madekwana ha puta ha oma.

₇Ri fhiswa nga mbiti dzau,

u tshi dinalea zwi ofhisa hani!

₈Milandu yashu a yo ngo u dzumbama;

u dzumbulula zwiphiri zwashu nga tshedza tshau.

₉Maḓuvha ashu oṱhe a nyamaladzwa nga mbiti dzau;

vhutshilo hashu vhu nga mufemo,

a vhu lengi u fhela.

₁₀Ri tshila miṅwaha ya 70,

vha lalamaho vha tshila 80,

hone zwine ya ri ḓisela zwi zwidini na maṱungu fhedzi;

i tou fhufha ra vha ri si tsheeho.

₁₁Ndi nnyi o no thetshelaho maanḓa a mbiti dzau?

Ndi nnyi a no ḓivha uri wa sinyuwa zwi ofhisa hani?

₁₂Ri funze u vhala maḓuvha ashu ri vhone uri ha gathi,

mbilu dzashu dzi vhe na vhuṱali.

₁₃Muṋe washu, humisa mbiti dzau,

zwi ḓo guma lini?

Khathutshela vhalanda vhau.

₁₄Kha ri vuwe ro fushwa nga lufuno lwau,

ri imbe ri takale maḓuvha oṱhe a vhutshilo hashu.

₁₅Ri takadze zwi eḓane na zwiḽa u tshi ri ṱungufhadza,

zwi eḓane na miṅwaha ye ra ṱangana na zwi konḓaho.

₁₆Ngavhe vhalanda vhau vha tshi vhona mishumo yau ya maanḓa,

vhana vhavho vha vhona vhugala hau.

₁₇Ngavhe Muṋe wa zwoṱhe Mudzimu washu

a tshi ri itela vhulenda,

zwe ra shuma zwi si vhe mahandana,

ndi zwone, nga a khwaṱhise mishumo ya zwanḓa zwashu.