DZIPHISALEMA 89

₁Muṋe washu, ndi ḓo imba

nda ḓivhadza lufuno lwau lini na lini,

mulomo wanga

u ḓo hanelela mirafho yoṱhe u fulufhedzea hau.

₂Ndo ri, “Lufuno lwau a lu dzinginyei lini na lini,

u fulufhedzea hau ho ima ho khwaṱha unga ḽiṱaḓulu.”

₃Wo ri, “Ndo vhofha mulanga na munangiwa wanga,

ndo anela Dafita muḓinḓa wanga nda ri,

₄‘Vhaḓuhulu vhau vha ḓo ḓi vha hone lini na lini,

ndi ḓo khwaṱhisa khuluṋoni yau

zwi tshi ya nga mirafho na mirafho.’ ”

₅Muṋe washu,

ḽiṱaḓulu ḽi renda zwimangadzo zwau,

vharuṅwa vha renda u fulufhedzea hau!

₆Ndi nnyi makoleni a eḓanaho na Muṋe washu?

Ane a nga Muṋe washu kha zwivhumbwa zwa ṱaḓulu ndi nnyi?

₇Khoroni ya ngei ṱaḓulu hu ofheswa Mudzimu;

ndi muhulu, u ofhisa u fhira vhoṱhe vho mu tangaho.

₈Muṋe washu,

Mudzimu Ramaanḓaoṱhe,

ndi nnyi ane a nga Iwe?

Muṋe washu,

u na maanḓa mahulu,

wo tangwa nga u fulufhedzea hau.

₉U vhusa lwanzhe lwo sinyuwa,

wa dzikisa magabelo alwo a tshi takuwa.

₁₀Wo pwashekanya Rahaba ḓiragoni ḽa lwanzhe,

ḽa vha khuvhabvu,

wa balanganya maswina au

nga tshanḓa tshau tsha maanḓa.

₁₁Ḽiṱaḓulu ndi ḽau, na ḽifhasi ndi ḽau;

wo tea ḽifhasi,

wa sika zwoṱhe zwi re khaḽo.

₁₂Ndi Iwe wo sikaho devhula na tshipembe,

Thaboro na Heremoni dzi fhululedza dzina ḽau.

₁₃Tshanḓa tshau tshi na maanḓa,

u na nungo,

maanḓa au ndi mahulu,

tshanḓa tshau tshi fhira zwoṱhe.

₁₄Khuluṋoni yau yo tewa kha ngoho na khaṱhulo mbuya,

zwoṱhe zwine wa ita

zwi vhonala zwi lufuno na u fulufhedzea.

₁₅Vha na mashudu vhe vha guda u u renda,

vhane vha tshimbila tshedzani tsha tshifhaṱuwo tshau,

Iwe Muṋe washu.

₁₆Vha fhululedza dzina ḽau ḓuvha ḽoṱhe,

vha pembelela vhuvhuya hau.

₁₇U vha ṋea vhugala na nungo,

wa vha ombela shambo nge wa vha funa.

₁₈Ngoho thovhele tshiṱangu tshashu

u bva kha Muṋe washu,

khosi yashu ro ṋewa nga Iwe Mukhethwa wa Israele.

₁₉Zwiḽa kale wo amba na vhalanda vhau

vha fulufhedzeaho,

wa amba nga bono wa ri,

“Ndi na muhali we nda mu ṋea nungo;

ndo hulisa muṱhanngana we nda mu nanga vhukati ha vhathu.

₂₀Ndo wana Dafita muḓinḓa wanga,

nda mu ḓodza mapfura anga makhethwa,

ha vha hone u mu rwela ṱari.

₂₁Tshanḓa tshanga tshi ḓo mu tika;

ngoho u ḓo khwaṱhiswa nga tshanḓa tshanga tsha maanḓa.

₂₂A hu na swina ḽi no ḓo mu kunda nga maano;

muvhi a no ḓo mu kandeledza haho.

₂₃Hoṱhe hune a ya ndi ḓo pwashekanya maswina awe,

nda vhulaha vha mu vhengaho.

₂₄Ndi a fulufhedzea,

ndi ḓo mu funa nga lufuno lu sa dzinginyei,

dzina ḽanga ḽi ḓo mu ombela shambo,

₂₅a vhusa lwanzhe,

muvhuso wawe wa pfuka milambo.

₂₆U ḓo mmbidzelela a ri,

‘U Khotsi anga, u Mudzimu wanga,

bako ḽi no ntshidza.’

₂₇Nṋe ndi ḓo mu ita tanzhe ḽanga,

a vha muhulwane wa mahosi a ḽifhasi.

₂₈Ndi ḓo mu londola nga lufuno lu sa dzinginyei lini a lini,

mulanga we nda vhofha nae a u nga fi;

₂₉vhana vhawe vha ḓo dzula vhe hone lini na lini,

khuluṋoni yawe i ḓo lalama unga lutombo.

₃₀Hone vhana vhawe vhá laṱa Mulayo wanga,

vha si tsha tevhedza zwe nda vha laya,

₃₁vha nyadza ndaela dzanga,

vha si dzi vhulunge,

₃₂ndi ḓo vha laṱisa vhuvhi havho nga luḓo,

vhukhakhi havho nda vha laṱisa nga ṱhamu.

₃₃Ene a thi nga litshi u mu funa nda si tsha fulufhedzea.

₃₄A thi nga vhofhololi mulanga wanga,

zwe nda amba thi nga shandukisi.

₃₅Ndo ana nga vhukhethwa hanga zwa vha zwo fhela,

ndi nga si zwifhele Dafita.

₃₆Vhana vhawe vha ḓo dzula vha hone,

khuluṋoni yawe i ḓo lalama unga ḓuvha,

₃₇i ḓo ima lini na lini unga ṅwedzi,

wone ṱhanzi i fulufhedzeaho ya makoleni.”

₃₈Hone zwino wo laṱa khosi ye wa i ta,

wa i landula, wa i sinyutshela;

₃₉wo vhofholola mulanga we wa vhofha na mulanda wau,

tshiala tshawe tsha vhuhosi wa tshi mbulumbudza buseni.

₄₀Wo thutha mitsheṱo yawe yoṱhe,

wa phusukanya madzhavhelo awe ha sala matumba.

₄₁U ṱangulwa nga vhafhiri vhoṱhe vha gondo,

ndi munyadziwa-nga-vhahura.

₄₂Wo ṋea maswina awe maanḓa a u mu kunda,

wa a takadza oṱhe.

₄₃Wo gomadza vhuhali ha pfumo ḽawe;

nndwani ha tsha kunda.

₄₄Wo tshinya vhuḽa vhugala hawe,

khuluṋoni yawe we i thenu ye fhasi huru!

₄₅Wo mu ṱungufhadza,

a kalaha a tshi kha ḓi vha nga hawe,

wa mu shonisa.

₄₆Muṋe washu, zwi ḓo guma lini?

U ḓo ḓi ri furalela naa?

Mbiti dzau dzi ḓo ḓi duga unga mulilo naa?

₄₇Elelwa uri vhutshilo hanga ho pfufhifhala hani.

A u vhoni uri vhathu vhoṱhe vhe wa vha sika

ndi mahandana fhedzi?

₄₈U hone ane a nga lalama a si fe naa?

Ndi nnyi ane a nga ḓitshidza a si dzhene tshaloni?

₄₉Muṋe wa zwoṱhe,

luḽa lufuno lwau lu sa dzinginyei lu ngafhi?

Zwiḽa zwe wa anela Dafita

nga u fulufhedzea hau zwi ngafhi?

₅₀Muṋe wa zwoṱhe,

sedza u nyadziwa ha mulanda wau,

zwine mbiluni yanga nda konḓelela

u seṅwa nga ditshakha,

₅₁ndi tshi ṱambuludzwa nga maswina au, Muṋe washu,

a tshi poṋodza khosi ye wa i ta,

a i nyadzisa.

₅₂Muṋe washu nga a rendwe lini na lini!

AMEN! AMEN!