DZIPHISALEMA 86

₁Muṋe washu, mpfe u mphindule,

ndi muheḓana, ndi mushai!

₂Nndondole,

hufha ndi tshi fulufhedzea!

U Mudzimu wanga, ndi fulufhela Iwe,

ntshidze!

₃Muṋe wa zwoṱhe, nkhathutshele,

ḓuvha ḽoṱhe ndi vhidzelela Iwe.

₄Nthudze mbilu, Muṋe wa zwoṱhe,

ndi livhisa mbilu yanga ha Iwe.

₅Muṋe wa zwoṱhe, u na vhuthu,

u a hangwela,

vhane vha u vhidzelela u vha sumbedza lufuno luhulu.

₆Muṋe washu, ipfa thabelo yanga,

thetshelesa mukosi wanga.

₇Musi wa khombo ndi a u vhidzelela;

u ḓo mphindula.

₈Muṋe wa zwoṱhe,

kha midzimu yoṱhe

a hu na a no nga Iwe;

a hu na mishumo ine ya nga vhambedzwa na yau.

₉Wo vhumba tshakha dzoṱhe;

dzi ḓo ḓa dza u luvha,

dza renda dzina ḽau,

Iwe Muṋe wa zwoṱhe.

₁₀Muhuluhulu ndi Iwe,

u ita zwimangadzo,

ndi Iwe Mudzimu u woṱhe.

₁₁Muṋe washu,

mpfunze u ita zwine wa zwi funa,

ndi ḓo konou tshimbila ngohoni yau;

mphe mbilu nthihi,

ndi ofhe dzina ḽau.

₁₂Muṋe wa zwoṱhe, Mudzimu wanga,

ndi ḓo u renda nga mbilu yanga yoṱhe,

ndi ḓo hulisa dzina ḽau lini na lini.

₁₃A u mpfuni zwone,

wo nṋula fhasi-fhasi tshaloni.

₁₄Mudzimu, vhadzia-u-ḓihudza vha khou nndevhela,

vhadzia-tshiṱuhu vha khou mmbulaha;

ndi vhathu vha sa u londi.

₁₅Hone Iwe Muṋe wa zwoṱhe

u Mudzimu wa tshilidzi na khathutshelo;

a u fheli mbilu,

lufuno lwau a lu dzinginyei,

u a fulufhedzea.

₁₆Ntsedze, u nkhathutshele,

nṋee nungo dzau;

ntshidze,

hufha na mme anga o vha mulanda wau.

₁₇Ntsumbedze tshiga tsha vhuthu hau,

maswina anga a zwi vhone, a shone.

Vhukumakuma Iwe Muṋe washu

wo mpfarisa wa mphumudza.