DZIPHISALEMA 78

₁Vhathu vhanga, ipfani pfunzo yanga!

Thetshelesani maipfi ane nda amba.

₂Ndi ḓo amba nga zwifanyiso,

nda bula zwe zwa vha zwo dzumbama u bva kale,

₃zwithu zwe ra zwi pfa ra zwi ḓivha,

zwe ra vhudzwa nga vhokhotsi ashu.

₄A ri nga zwi dzumbeli vhana vhavho,

ri ḓo zwi vhudza murafho u ḓaho,

mishumo ya maanḓa ya Muṋe washu i rendeaho,

na zwimangadzo zwe a ita.

₅O vhetshela Jakopo ndaela,

a tetshela Israele mulayo

we a vhudza vhomakhulukuku washu uri vha vhudze vhana vhavho,

₆uri mirafho i ḓaho i u ḓivhe,

na vhana vha sa athu bebwa,

na vhone vha vhudze vhana vhavho.

₇Ndi hone vha tshi ḓo fulufhela Mudzimu,

vha si hangwe mishumo yawe,

vha vhulunge milayo yawe.

₈Ndi hone vha sa nga ngi vhomakhulukuku wavho,

mavhanga a tshipimbi,

vha mbilu dza mashandukwa

vhane Mudzimu a vhona vha sa fulufhedzei.

₉Vhana vha Efraimi naho vho vha vho fara vhura,

musi wa nndwa vho shavha.

₁₀A vho ngo tevhedza mulanga wa Mudzimu,

vho landula zwe a vha laya.

₁₁Vho hangwa zwe a ita,

zwimangadzo zwe a vha sumbedza.

₁₂O ita maḓembe vhokhotsi avho vha tshi zwi vhona,

shangoni ḽa Egipita,

mudavhini wa Tsuani.

₁₃O fhandekanya lwanzhe a vha pfukisa,

a imisa maḓi a khwaṱha unga luvhondo.

₁₄Masiari a vha endedza nga gole,

vhusiku a vha vhonetshela nga mulilo.

₁₅O fhandula matombo phangani,

a vha fha maḓi a si na vhukono,

vha nga vha khou nwa lwanzhe;

₁₆a bveledza milambwana kha tombo,

maḓi a ela unga mulambo.

₁₇Hone vhone vha ḓi mu khakhela,

vha shandukela Waṱaḓuluṱaḓulu phangani,

₁₈vha linga Mudzimu nga khole,

vha ri a vha ṋee zwiḽiwa zwine vha funa;

₁₉vha ṱunga Mudzimu vha ri,

“Mudzimu a nga kona u ri ṋea zwiḽiwa phangani?

₂₀Ndi ngoho,

o ri u rwa tombo maḓi a gubunyea,

milambwana ya ela.

Hone na zwiḽiwa a nga kona u ri ṋea naa?

Avha vhathu a nga kona u vha ṋea ṋama?”

₂₁Muṋe washu a tshi pfa vha tshi ralo a sinyuwa;

a fhisa Jakopo nga mulilo,

a sinyutshela Israele,

₂₂nge vha si fulufhele Mudzimu,

vha si tende uri u na maanḓa a u vha tshidza.

₂₃Naho zwo ralo Ene o amba na lutombo,

a vula mahothi a ḽiṱaḓulu,

₂₄a nisela vhathu mana uri vha ḽe,

a vha ṋea thoro dzi bvaho ṱaḓulu;

₂₅muthu wa ṋama a ḽa zwiḽiwa zwa vharuṅwa,

vha ṋewa mbuvha i si na vhukono;

₂₆a vulela muya wa vhubvaḓuvha ngei ṱaḓulu,

a swoga muya wa tshipembe nga maanḓa awe;

₂₇a vha nisela ṋama ya nga buse,

zwiṋoni zwa nga muṱavha khunzikhunzini,

₂₈a zwi wisela mitumbani yavho,

zwa phapha u mona dennde dzavho;

₂₉vha ḽa vha pfa vha si tsha funa,

nge a vha ṋea zwe vha zwi lilela.

₃₀Ho ri vha sa athu fura nga zwiḽiwa zwe vha zwi lilela,

zwi tshi kha ḓi tou vha haṋwani havho,

₃₁mbiti dza Mudzimu dza vha vutshela,

a vhulaha vhanna vha havho vha maanḓa,

a wisa vhaṱhannga vha Israele.

₃₂Nangwe zwo ralo vho ḓi endela u tshinya;

naho o vha itela zwimangadzo a vho ngo mu fulufhela.

₃₃Ndi zwe a fhedza maḓuvha avho unga mufemo,

iṱo ḽi tshi tou poi miṅwaha yavho ya vha yo fhela.

₃₄Mudzimu a tshi vha vhulaha vha vho mu ṱoḓa;

vha dovha u humela khae vha tshi tou ḓifunga;

₃₅vha elelwa uri Mudzimu ndi Ene bako ḽavho,

Waṱaḓuluṱaḓulu ndi Ene Mulamuleli wavho.

₃₆Hone ho vha hu u mu hoya nga milomo,

vha mu zwifhela nga maipfi avho.

₃₇Mbilu dzavho dzo vha dzi siho khae;

vho vha vha tshi pambuwa mulangani wawe.

₃₈Naho zwo ralo o vha khathutshela;

o vha hangwela vhuvhi havho a si tsha vha lozwa.

Ndi kanzhi a tshi humisa mbiti dzawe a dzi kanda;

₃₉a elelwa uri ndi vhathu vha ṋama,

ndi muya une wa sokou vhudzula wa fhira,

u si tsha vhuya.

₄₀Ndi lungana vha tshi mu shandukela phangani,

vha mu ṱungufhadza sogani!

₄₁Vha linga Mudzimu vha dovha,

vha levhela Mukhethwa wa Israele.

₄₂A vho ngo tsha humbula maanḓa awe,

zwiḽa a tshi vha vhofholola kha vhatambudzi,

₄₃zwiḽa a tshi sumbedza maḓembe awe shangoni ḽa Egipita,

a tshi ita zwimangadzo mudavhini wa Tsuani.

₄₄Milambo ya Vhaegipita a i shandula malofha,

vha si tsha nwa maḓi milongani yavho.

₄₅O ruma guma ḽa thunzi dza vha ḽa,

a ruma zwiḓula zwa vha konḓisela vhutshilo;

₄₆mavhele avho a ḽiwa nga magerere,

zwibveledzwa zwavho zwa fhedzwa nga nzietshikume.

₄₇O wisa tshifhango minḓirivhe ye tshote,

mihuyu yavho ya kumbiwa;

₄₈kholomo dzavho a dzi ruthutha nga tshifhango,

thakha yavho a i fhedza nga nḓadzi.

₄₉O vha shoshela nga mbiti dzawe dzi ofhisaho,

na dambudzo, na u dinalea,

na zwi konḓaho –

tshigwada tshoṱhe tsha vharuṅwa vha lozwaho.

₅₀O vulela mbiti dzawe nḓila;

ho ngo vhuya a vha litsha vha tshila,

o vha kumedza bulayo.

₅₁O vhulaha matanzhe oṱhe a Egipita,

yone mitshelo ya u thoma ya munna muṱani wa Hamu.

₅₂Vhathu vhawe vhone o vha pfulusa unga sambi ḽa nngu,

a vha endedza phangani unga miṱambi.

₅₃O vha dededza zwavhuḓi uri vha si ofhe,

hone maswina avho a milwa nga lwanzhe.

₅₄A vhuya a vha swikisa

mukanoni wa shango ḽawe ḽikhethwa,

mivhundu ye a i wana nga maanḓa awe.

₅₅O thatha dzitshakha phanḓa havho,

a vha ṋea shango ḽa vha ifa ḽavho,

a ṋea matsinde a Israele mahaya avho.

₅₆Hone vhone vha linga Mudzimu,

vha shandukela Waṱaḓuluṱaḓulu,

vha si tsha tevhedza zwe a vha laya.

₅₇Vho vha vha tshi ḓi nga vhokhotsi avho,

vha si na vhuluvha, vha sa fulufhedzei,

vha tshi nga vhura ho kombamaho,

nga u sa fulufhedzea havho.

₅₈Vho mu ṱunga nga u yo luvha zwikwarani

hune ha luvha vhannḓa,

vha vusa mbiti dzawe nga u luvha zwifanyiso.

₅₉Mudzimu a ri u vha pfa a sinyuwa zwihulu,

a landula Israele tshoṱhe.

₆₀O ṱutshela vhudzulo hawe Shilo,

dennde ye a vha o i akha vhukati ha vhathu.

₆₁O litsha maswina a tshi thuba mbulungelo,

tshone tshiga tsha maanḓa awe na vhugala.

₆₂O vha o sinyutshela vhathu vhawe vhe a ḓinangela,

a vha kumedza pfumo.

₆₃Mulilo wa lozwa vhaṱhannga vhavho,

vhasidzana vhavho vha si tsha imba dza mbingano;

₆₄vhotshifhe vhavho vha ḽiwa nga pfumo,

tshilikadzi dzavho dza si lile.

₆₅Ndi hone Muṋe wa zwoṱhe a tshi vuwa khofheni,

unga muhali o dzelelaho nga waini a tshi dzivhuluwa;

₆₆a rwa maswina awe vha huma,

vha shona lini na lini.

₆₇A sala a tshi landula nnḓu ya Josefa,

tsinde ḽa Efraimi a si tsha ḽi nanga;

₆₈a nanga tsinde ḽa Juda,

na Thavha ya Tsioni ye a i funa.

₆₉Ndi hone he a fhaṱa thembele yawe,

a i tea ya vha ya lini na lini,

ya khwaṱha unga ḽifhasi,

ya ṋanzwa makole.

₇₀A nanga Dafita muḓinḓa wawe,

a yo mu dzhia pfuloni;

₇₁a mu dzhia a tshi khou lisa nngu a ḓa nae,

uri a vhe mulisa wa vhathu vhawe Jakopo,

a lise Israele lushaka lwa Mudzimu.

₇₂Dafita a vha lisa o ḓikumedza,

a vha endedza nga vhukoni.