DZIPHISALEMA 74

₁Mudzimu, wo ri laṱelani?

U ḓo sinyutshela riṋe sambi ḽau tshoṱhe naa?

₂Elelwa vhathu vhau vhe wa ḓinangela kale-kale,

hufha wo vha vhofholola vhupulini

uri vha vhe lushaka lwau;

elelwa thavha ya Tsioni he wa dzula hone.

₃Edzou tshimbila vhukati ha matumba haya a kale,

u vhone uri maswina o thuthekanya hani nnḓu yau khethwa.

₄Henefho he ra vha ri tshi ṱangana na Iwe

maswina vha vho ṱavha mukosi wa gundo,

vha ṱoma fulaga dzavho.

_5-6Vho pwashekanya zwivhaḓwa zwoṱhe,

vha zwi remekanya nga mbaḓo na tsanga,

vha tshi nga vha khou haḓa zwiṱaka,

₇vha fhisa thembele yau ya tou lore,

hune wa luvhiwa vho hu kumadza.

₈Mbiluni dzavho vha ri,

“Ri ḓo vha lozwa tshoṱhe!”

vha fhisekanya hoṱhe he Mudzimu a vha a tshi luvhiwa.

₉A ri tsha vhona na tshiga tsha maḓembe;

a hu tshee na a no ri ḓivhadza zwine wa funa;

a hu na a ḓivhaho uri zwi ḓo fhela lini.

₁₀Mudzimu, maswina a ḓo u nyefula u swika lini?

Vha ḓo ḓi dzula vha tshi u kolela naa?

₁₁Khefha u tshi sokou ṱanzwa maṱo wa lavhelesa?

U ḓo ri phalala lini wa vha lozwa?

₁₂Hufha Iwe Mudwimu wo ḓi vha Khosi yanga

tsha kale na kale.

A si Iwe we wa ri tshidza nga maanḓa au

fhano shangoni naa?

₁₃Wo ritha lwanzhe nga maanḓa au,

wa devhekanya ṱhoho dza maṋowa a lwanzhe.

₁₄Ndi Iwe we wa pwashekanya ṱhoho dza Liviathani,

wa ḽi ṋea phukha dza phangani dza ḽa.

₁₅Ndi Iwe Muphuli wa zwisima;

wo elisa milambo,

wa xisa milambo i sa xi.

₁₆Vhusiku na masiari ndi zwau;

wo tea ḓuvha na ṅwedzi.

₁₇Ndi Iwe wo vheaho mikano ya shango,

wa ri hu vhe na tshilimo na vhuriha.

₁₈Muṋe washu, u songo hangwa

uri maswina a a u nyefula;

ndi matsilu, a a u nyadza.

₁₉Ḽiivha ḽau u songo ḽi kovhela zwivhanda;

vhathu vhau vha khou tambula,

u songo vha hangwa tshoṱhe.

₂₀Elelwa mulanga wau;

hoṱhe-hoṱhe vhathu vha sokou levhelana.

₂₁U songo litsha vhakandeledzwa vha tshi shoniswa,

vhaheḓana na vhashai nga vha u rende.

₂₂Mudzimu, vuwa u ḓilwele,

u songo hangwa uri matsilu a ṱwa a tshi u nyefula;

₂₃mukosi wa maswina au u songo u hangwa,

mukosi wa maswina u sa tumuwi!