U humbela u tsireledzwa kha maswina a vhunwa
Phisalema ya Dafita ye a sikela malogwane.
Vhunwa
1Muṋe washu,
ntshidze kha vhathu vhavhi,
ntsireledze kha vha nndevhelaho!
2Vha luka vhunwa mbiluni dzavho,
vha dzulela u vusa nndwa;
3ndimi dzavho dzo halifha unga dza ṋowa,
vho mara vhuṱungu ha mavuluvulu.
4Muṋe washu, nndondole,
vhavhi vha si nkunde,
ntsireledze kha vha nndevhelaho!
Vha dzula vho langana u mpiringedza.
5Vhadzia-u-ḓihudza vho nthetshela tshikwekwe,
vho nthea nga thambo,
vha ṱharamudza mambule,
vha mmbetshela milavhu nḓilani.
U teketela maswina
6Ndi amba na Muṋe washu nda ri,
“Iwe u Mudzimu wanga.”
Muṋe washu, ipfa zwililo zwanga!
7Yawee, Muṋe washu, Muṋe wa zwoṱhe,
Mutshidzi wanga wa maanḓa,
wo mpilela ṱhoho musi wa nndwa.
8Muṋe washu, u songo ṋea vhavhi zwine vha tama,
u songo tenda zwe vha langana zwi tshi itea,
vha sa ḓo ḓihudza.
9Vhuṱungu he vho ntangaho vha mphomela,
na zwe vha nnyita,
ngavhe zwi tshi vha ḽa ṱhoho.
10Ngavhe vha tshi welwa nga masimbe;
kha vha posiwe muliloni,
kha vha poswe dindini,
vha si tsha vuwa.
11Vhasasaladzi kha vha shaye vhudzulo fhano shangoni;
khombo kha i londe vhadzia-u-levha,
i vha lozwe!
Fulufhelo
12Nṋe ndi ḓivha uri Muṋe washu u lamulela vha tambudzwaho,
a imelela vha kandeledzwaho.
13Ngoho vha fulufhedzeaho vha ḓo renda dzina ḽau,
vha si na vhufhura vha ḓo u luvha.
