DZIPHISALEMA 112

₁Haleluya,

nga hu rendwe Muṋe washu!

U na mashudu ane a ofha Muṋe washu,

a takalela milayo yawe.

₂Vhana vhawe vha ḓo vha vhahulwane shangoni,

mirafho yoṱhe ya vha si na vhufhura i ḓo vha na mashudu.

₃Ú ḓo khokha madzanga na lupfumo nḓuni yawe,

u a fulufhedzea lini na lini.

₄Vha si na vhufhura vha vhonetshelwa nga tshedza swiswini;

vha na tshilidzi na khathutshelo,

vha a fulufhedzea.

₅Mapakulile zwi ḓo mu nakela;

u tshimbidza mafhungo nga u fulufhedzea.

₆Ngoho a no fulufhedzea ha tupulei,

vha ḓo mu elelwa lini na lini.

₇A tshi pfa mavhi ha nga ofhi;

mbilu yawe a i tseki,

i fulufhela Muṋe washu.

₈Mbilu yawe a i tseki,

ha ofhi tshithu;

u ḓo fhedza nga u kunda maswina awe.

₉Ndi mapakulile, u tonda vhashai,

u a fulufhedzea lini na lini;

u ḓo ombelwa shambo a huliswa.

₁₀Muvhi u ḓo ri u zwi vhona,

zwa mu dina,

a shenganya maṋo nga mbiti,

a fhelela.

Zwe muvhi a zwi lavhelela a zwi nga vuwi zwo itea.