MIRERO 6

₁Ṅwananga, arali wo ḓivhofha u lifha mulandu wa muṅwe,

wa ana wa ri u ḓo lifha mulandu wawe une a nga ita,

₂wa tshenuwa wó fashwa nga zwe wa amba,

wó ḓifasha nga maipfi au,

₃ḓivha uri wo wela zwanḓani zwa muṅwe.

Zwenezwo ita hezwi ṅwananga,

uri u kone u ḓivhofholola:

Iya khae u ḓisole,

u mu luvhelele uri a u vhofholole.

₄U songo vhuya wa eḓela,

u songo vhuya we khofhe zhambu,

₅u sa athu ḓivhofholola

unga ntsa yo ponyoka muzwimi,

unga tshiṋoni tsho ponyoka tshikwekweni tsha murei.

₆Mubva ndiwe, edzou sedza lusunzi,

edzou sedza maitele alwo u ṱalifhe:

₇A lu na mulangi,

a lu na muingameli,

a lu na muvhusi,

₈naho zwo ralo lu ḓivhulungela mbuvha tshilimo,

lwa ḓikuvhanganyela zwiḽiwa zwalwo nga tshifhinga tsha khaṋo.

₉Mubva ndiwe, u ḓo lala u swika lini?

U ḓo vuwa lini khofheni dzau?

₁₀“Khofhenyana nandi,

ndi tou zhambu kathihi,

ndi ḓikuvhatedze ndi awelenyana!”

₁₁Ndi hone vhushai vhu tshi u ḓela unga ḽivemu ḽi na thonga,

vhusiwana ha u ḓela unga muhali o kungelaho zwihali.

₁₂Muthu ane a enda a tshi shanda mafhungo nga lulimi lwawe

ndi muthu muvhi a sa ḓivhalei.

₁₃Ú sinyedza nga maṱo,

a ita na u kwetedza nga ṋayo,

a sumba nga minwe;

₁₄u dzula a tshi luka vhunwa nga mbilu yawe,

a endela u luṱanya vhathu.

₁₅Onoyo ha nga lengi u welwa nga khombo,

kathihi fhedzi u ḓo pwashekanywa lu sa lafhei.

₁₆Hu na zwithu zwiṱanu na tshithihi zwine Muṋe washu a zwi vhenga;

zwine zwa mu nengisa zwi swika zwiṱanu na zwivhili:

₁₇ndi maṱo a u ḓihudza,

ndi lulimi lwa u zwifha,

ndi zwanḓa zwi no shulula malofha a vhathu vha si na mulandu,

₁₈ndi mbilu i no luka maano mavhi,

ndi milenzhe i no gidimela vhuvhini,

₁₉ndi ṱhanzi i si ya ngoho i no amba mazwifhi,

ndi muthu a no luṱanya vhana vha munna.

₂₀Ṅwananga, vhulunga ndayo

dza khotsi au,

u songo nyadza pfunzo ya mme au;

₂₁i vhulunge mbiluni misi yoṱhe,

i kungele mukuloni wau;

₂₂u tshi tshimbila, i ḓo u endedza,

wó lala i ḓo u londola,

u tshi vuwa i ḓo davhidzana na iwe.

₂₃Milayo ndi luvhone,

pfunzo ndi tshedza,

u kaidzwa na u laiwa ndi yone nḓila ya vhutshilo;

₂₄zwi u tsireledza kha musadzi muvhi,

uri musadzi a si wau a si u fashe nga haṋwani hawe ha u ḓifha.

₂₅Mbilu yau i songo tama lunako lwawe,

u songo tenda a tshi u kunga nga u u sinyedza;

₂₆musadzi wa phombwe u rengwa nga mukonde wa vhurotho,

hone musadzi wa muṅwe u lixwa nga ṱhoho yau.

₂₇U nga okela mulilo khanani nguvho dzau dza si swe naa?

₂₈U nga tshimbila nṱha ha masimbe ṋayo dzau dza si rungunye naa?

₂₉Zwo ralo kha muthu a no ya kha musadzi a si wawe:

ane a mu kwama a nga si kundwe u lifhedzwa.

₃₀A ri nyadzi fobvu

arali ḽi tshi tswiswa nga nḓala,

₃₁hone arali ḽa farwa ḽi ḓo lifha kaṱanu na kavhili;

ḽi ḓo lifha ḽa sala ḽi si na tshithu.

₃₂Ane a ita vhupombwe ene ha na ṱhalukanyo;

ane a vhuya a ralo u a ḓivhulaha.

₃₃U ḓo vha na mbonzhe a nyadzea;

ṱhoni dzawe dzi nga si phumulwe.

₃₄A hu na tshi no sinyusa munna u fhira u pwashelwa muḓi;

a tshi lifhedza ha tsha khathutshela;

₃₅ha tsha tenda tshipfumelo;

tshifhiwa naho tshi tshingafhani

a tshi mu rudzi mbilu.