MATIOSI 7

₁“Ni songo haṱula vhaṅwe, ndi hone Mudzimu a sa nga ni haṱuli. ₂Khaṱhulo ine na haṱula vhaṅwe ngayo na inwi Mudzimu u ḓo ni haṱula ngayo; muelo une na elela vhaṅwe ngawo, na inwi Mudzimu u ḓo ni elela ngawo. ₃Khezwi u tshi kona u vhona lufhanza lu re iṱoni ḽa muṅwe, ngeno danda ḽi re iṱoni ḽau u sa ḽi londi? ₄Nṋa u nga amba hani na muṅwe wa ri, ‘Litshani ndi bvise lufhanza lu re iṱoni ḽaṋu,’ ngeno iwe u na danda iṱoni ḽau? ₅Muhoi ndiwe! Thoma u bvisa danda ḽi re iṱoni ḽau, ndi hone u tshi ḓo kona u vhona zwavhuḓi u tshi bvisa lufhanza lu re iṱoni ḽa muṅwe.

₆“Zwikhethwa ni songo zwi ṋea dzimmbwa, dzi sa ḓo ni vutshela dza ni huvhadza; na nungu dzaṋu ni songo dzi posa nguluvhe, dzi sa ḓo sokou dzi kandekanya.

₇“Ni ḓi dzula ni tshi humbela, ni ḓo ṋewa; ṱoḓani, ni ḓo wana; khokhonyani, ni ḓo vulelwa vothi. ₈Ane a dzula a tshi humbela, Mudzimu u ḓo vhuya a mu fha; ane a ṱoḓa u ḓo wana; ane a khokhonya u ḓo vhuya a vulelwa vothi. ₉Ndi nnyi ane ṅwana wawe a tshi mu humbela vhurotho a mu fha tombo, ₁₀kana a tshi mu humbela khovhe a mu fha ṋowa? ₁₁Arali inwi na vhuvhi háṋu ni tshi kona u ṋea vhana vhaṋu zwivhuya, Khotsi aṋu wa ṱaḓulu a nga kundwa ngani u ṋea zwivhuya vha mu humbelaho?

₁₂“Zwoṱhe zwine na funa vhaṅwe vha tshi ni ita, na inwi ni vha ite zwenezwo. Ndi hone no khunyeledza Mulayo na Maṅwalo a vhaporofita.

₁₃“Dzhenani nga khoro tsekene; nḓila i yaho hune wa lovha yo aṱama, na khoro ya hone ndi khulwane, ndi vhanzhi vhane vha dzhena ngayo. ₁₄Nḓila i yaho vhutshiloni ndi tsekene-tsekene, na khoro yayo ndi ṱhukhu, vhane vha i wana a si vhanzhi.

₁₅“Thanyelani vhaporofita vha khole-khole vhane vha ḓa kha inwi vho fuka mikumba ya nngu, ngeno nga ngomu havho vhe maṱalerwa a ni pondaho. ₁₆Ni ḓo vha ḓivha nga mitshelo yavho. A ri fuli nḓirivhe kha muunga; mahuyu ri a wana kha mutshetshete na? ₁₇Muri wavhuḓi u aṋwa mitshelotshelo, u vhavhaho wa aṋwa mitshelo i kalakataho. ₁₈Muri wavhuḓi a u aṋwi mitshelo i kalakataho, zwi ḓi nga muri u vhavhaho u sa aṋwi mitshelo i ḓifhaho. ₁₉Muri muṅwe na muṅwe u sa aṋwi mitshelo i ḓifhaho u a remiwa wa kudzwa muliloni. ₂₀Izwo-ha ni ḓo vha ḓivha nga mitshelo yavho.

₂₁“A si uri vhoṱhe vhane vha tshi nnyamba vha ri, ‘Muṋe washu! Muṋe washu!’ vha ḓo dzhena muvhusoni wa Mudzimu, hu ḓo dzhena vhane vha ita zwine Khotsi anga wa ṱaḓulu a zwi funa. ₂₂Ndi vhanzhi vhane vha ḓo amba na Nṋe nga heḽo ḓuvha vha ri, ‘Muṋe washu! Muṋe washu! A ro ngo porofita nga dzina ḽau naa? A ro ngo pandela thuṅwa nga dzina ḽau naa? A ro ngo ita maḓembe mahulu nga dzina ḽau naa?’ ₂₃Nda konou amba navho nda vha fhedzela nda ri, ‘A tho ngo vhuya nda ni ḓivha; ṱuwani afha phanḓa hanga inwi vhadziautshinya!’

₂₄“Zwenezwo onoyo ane a pfa maipfi anga haya a ya a zwi ita, u fana na muthu wa vhuṱali ane a fhaṱa nnḓu yawe kha lutombo. ₂₅Mvula ya na, milambo ya ḓala, maḓumbu a vhudzula, a thudza iḽa nnḓu i si we, ngauri yo vha yo tewa kha lutombo. ₂₆Hone ane a pfa maipfi anga haya a si zwi ite, u fana na muthu wa tsilu we a fhaṱa nnḓu yawe muṱavhani; ₂₇mvula ya na, milambo ya ḓala, maḓumbu a vhudzula a thudza iḽa nnḓu, ya mbo fhasi huru.”

₂₈Musi Yesu o fhedza u amba, vhathu vha kanuka pfunzo yawe, ₂₉ngauri o vha a sa funzi sa vhaḓivhi vha Mulayo, o vha a a tshi pfala e Muṋe wa mafhungo.