MATIOSI 2

₁Musi Yesu o no bebwa muḓini wa Betlehema shangoni ḽa Juda, hu tshi vhusa khosi Herude, ho ḓa vhaṱali vha zwa ṋaledzi vha tshi bva Vhubvaḓuvha, vha swika Jerusalema ₂vha vhudzisa vha ri, “U ngafhi uḽa we a bebwa e khosi ya Majuda? Ro vhona ṋaledzi yawe i tshi bva, zwino ro ḓa u mu luvha.” ₃Vhamusanda Vho-Herude vha tshi pfa zwenezwo vha tshenuwa, na muḓi woṱhe wa Jerusalema wa tshenuwa. ₄Herude a kuvhanganya vhoṱhe vhotshifhe vhahulwane vha lushaka na vhaḓivhi vha Mulayo a vha vhudzisa uri Mesia u pfi u ḓo bebwa ngafhi. ₅Vha mu fhindula vha ri, “U ḓo bebwa Betlehema kha ḽa Juda, ngauri muporofita o ṅwala a ri,

₇Herude a konou vhidzela vhaḽa vhaṱali tshiphirini a vha vhudzisesa tshifhinga tshe ṋaledzi ya vhonala ngatsho, ₈a vha ruma Betlehema a ri, “Iyani ni yo sedzesa zwa uyo ṅwana. Musi no mu wana ni ḓe ni nnḓivhise uri na nṋe ndi kone u ya ndi mu luvhe.” ₉Musi vho no pfa maipfi a khosi vha takuwa. Iḽa ṋaledzi ye vha vhona i tshi bva ya vha endedza ya vhuya ya swika ya ima nṱha ha henefho fhethu he ṅwana a vha e hone. ₁₀Vha tshi vhona ṋaledzi vha takala nga maanḓa. ₁₁Vha tshi swika nḓuni ya hone vha wana ṅwana e na mme awe Maria, vha gwadama vha luvha. Ndi hone vha tshi putulula maputo avho vha ṋekedza nduvho dze vha ḓa nadzo: ndi musuku na zwioro na zwiḓolo zwi nukhelelaho.

₁₂Zwino Mudzimu a vha sevha nga muloro uri vha songo tsha vhuelela ha Herude. Ndi zwe vha tshi humela ha havho vha bva nga iṅwe nḓila.

₁₃Musi vhaṱali vho no ṱuwa, ha ḓa muruṅwa wa Muṋe washu a ḓisumbedza Josefa nga muloro a ri, “Dzhia ṅwana na mme awe ni shavhele Egipita, ni dzule henengei ndi vhuye ndi u vhudze. Herude u ḓo ṱoḓa ṅwana uri a mu vhulahe.” ₁₄Josefa a takuwa vhusiku a ṱuwa na ṅwana na mme awe vha pfulutshela Egipita, ₁₅vha dzula henengei Herude a vhuya a fa. Hezwo zwo itea uri hu khunyelele ḽe Muṋe washu a amba nga muporofita a tshi ri,

₁₆Herude a tshi vhona uri vhaṱali vho mu tikisa luwa a sinyuwa nga maanḓa, a ruma vhathu u vhulaha vhatukana vhoṱhe vha Betlehema na mivhunduni yoṱhe ya henefho vha re na miṅwaha mivhili na vhaṱuku khavho, hu u tevhedza tshifhinga tsho ambiwaho nga vhaṱali. ₁₇Ndi hone he ha khunyelela ḽo ambiwaho nga muporofita Jeremia a tshi ri,

₁₉Musi Herude o no fa, muruṅwa wa Muṋe washu a ḓisumbedza Josefa nga muloro henengei Egipita ₂₀a ri, “Takuwa u dzhie ṅwana na mme awe ni vhuelele shangoni ḽa Israele. Vhe vha vha vha tshi ṱoḓa u vhulaha ṅwana vho fa.” ₂₁Ndi hone Josefa a tshi takuwa a ṱuwa na ṅwana na mme awe vha vhuelela shangoni ḽa Israele. ₂₂Hone nge a pfa uri Akhilaosi o no vha khosi ya Judia vhudzuloni ha khotsi awe Herude, a ofha u vhuelela shangoni ḽeneḽo. Mudzimu a mu eletshedza nga muloro uri a ṱutshele thungo dza Galelia. ₂₃A tshi swika henefho a ya a dzula muḓini u no pfi Nazaretha. Zwenezwo zwo itea uri hu khunyelele ḽo ambiwaho nga vhaporofita vha tshi ri, “U ḓo pfi Munazaretha.”