MATIOSI 17

₁Ho no fhela maḓuvha maṱanu na ḽithihi Yesu a ṱuwa na Pitrosi na Jakopo na murathu wawe Johanisi, a gonya navho thavha ndapfu vhe nga tshavho; ₂tshivhumbeo tshawe tsha mbo ḓi shanduka vha tshi zwi vhona, tshifhaṱuwo tshawe tsha thoma u penya sa ḓuvha, zwiambaro zwawe zwa tshena sa tshedza. ₃Zwenezwo ha bvelela Mushe na Elia, vhafunziwa vha vha vhona vha tshi khou amba na Yesu. ₄Pitrosi a tshi zwi vhona a amba na Yesu a ri, “Muṋe washu, ro ita zwone ra ḓa fhano. Arali vha tshi funa nga vha litshe ndi fhaṱe thumba tharu fhano: iṅwe i ḓo vha yavho, iṅwe ya vha ya Mushe, iṅwe ya Elia.” ₅Musi a tshi kha ḓi amba ha alama gole ḽi penyaho ḽa vha tiba, ha mbo pfala ipfi ḽi bvaho kha gole ḽi tshi ri, “Hoyu ndi Murwa wanga muthihi fhedzi; u a ntakadza; ni mu thetshelese.”

₆Vhafunziwa vha tshi pfa ipfi iḽo vha wa nga zwifhaṱuwo vha dzhenwa nga nyofho khulu. ₇Ndi hone Yesu a tshi sendela a vha dzinginyisa a ri, “Takuwani; ni songo ofha.” ₈Vha tshi lilala vha vhona Yesu o sala e eṱhe, vhaḽa vha si tsheeho.

₉Musi vha tshi vho tsa thavha Yesu a vha laya a ri, “Ni songo vhuya na vhudza muthu zwe na vhona, Mubebwa-nga-muthu a vhuya a vuwa vhafuni.”

₁₀Vhafunziwa vha mu vhudzisa vha ri, “Khezwi vhaḓivhi vha Mulayo vha tshi ri hu fanela u ranga u ḓa Elia?” ₁₁Yesu a fhindula a ri, “Nangoho Elia u a ḓa uri a lugise zwoṱhe. ₁₂Hone ndi khou ni vhudza ndi ri: Elia o no ḓi ḓa vha si mu ṱalukanye, vha ita zwine vha funa ngae. Sa zwenezwo na Mubebwa-nga-muthu u fanela u tambudzwa ngavho.” ₁₃Ndi hone vha tshi zwi pfa uri matsina a tshi ralo o vha a tshi khou amba Johanisi Mulovhedzi.

₁₄Vha tshi vho dovha u sendela tsini ha magogo ha ḓa muṅwe munna a mu gwadamela ₁₅a ri, “Muṋe wanga, kha vha khathutshele ṅwana wanga! O rwiwa nga ṅwedzi, u khou tou tambula; u ṱolou wela muliloni na maḓini. ₁₆Zwino ndo mu ḓisa ha vhafunziwa vhavho, fhedzi vha kundwa u mu fhodza.” ₁₇Yesu a fhindula a ri, “Hee inwi ni sa fulufheli Mudzimu, vhadzia-u-xela! Ndi ḓo vha na inwi u swika lini? Ndi kha ḓi ḓo ni konḓelela u swika lini? Ḓisani uyo muṱhannga kha Nṋe!” ₁₈Yesu a mbo ḓi kaidza thuṅwa ya bva khae, u bva zwenezwo ṅwana a mbo ḓi vha o fhola.

₁₉Ndi hone vhafunziwa vha tshi ḓa ha Yesu vhe nga tshavho vha ri, “Riṋe ro kundwa u pandela iḽa thuṅwa?” ₂₀A vha fhindula a ri, “Ndi ngauri lutendo lwaṋu ndi luṱukusa. Thetshelesani ndi ni vhudze: ngavhe ni vhe na lutendo lune lwa tou lingana zwalwo na mbeu ya muhuyu, no vha ni tshi nga kona u vhudza thavha hei na ri, ‘Sudzulutshela ngei!’ ya sudzuluwa. A hu na tshe tsha vha tshi tshi nga ni kunda.”

₂₂Musi vho dovha vha kuvhangana Galelia Yesu a vhudza vhafunziwa vhawe a ri, “Mubebwa-nga-muthu u ḓo kumedzwa vhathu, ₂₃vha mu vhulaha, a dovha a vuswa nga ḓuvha ḽa vhuraru.” A tshi ralo zwa vha pfisa vhuṱungu nga maanḓa.

₂₄Vha tshi swika Kapernaumi vhathelisi vha muthelo wa thembele vha ḓa ha Pitrosi vha mu vhudzisa vha ri, “Nṋa mufunzi waṋu ha theli muthelo wa thembele naa?” ₂₅A fhindula a ri, “Vha a thela.” A tshi vho dzhena nḓuni Yesu a mbo mu vhudzisa a sa athu amba a ri, “Inwi ni zwi vhona hani Simoni? Mahosi a shango vha thelisa vhafhio muthelo? Vha bvisisa vhafhio lutho? Vha thelisa vha havho kana vhatsinda?” ₂₆Pitrosi a ri, “Vha thelisa vhatsinda.” Yesu a ri, “Ahaa, izwo vha havho a vha theliswi. ₂₇Naho zwo ralo, uri ri si vha khukhulise, sokonu ya dzivhani ni pose tshilazwulo ni fashe khovhe ine ya ḽela lwa u thoma. Ni tshi ṱolela mulomoni wayo ni ḓo wana yo khuba masheleni mavhili; a dzhieni ni yo nthelela, na inwi ni ḓithelele.”